ءوتىپ بارا جاتقان جىلى ايماقتاعى ۇزدىك 10 وقيعا. ەكونوميكانىڭ بارلىق ماڭىزدى سالالار بويىنشا دامۋدىڭ وڭ ديناميكاسىنا قول جەتكىزىلدى. ونىڭ ىشىندە, كەيبىر سالالاردىڭ كورسەتكىشتەرى رەسپۋبليكا بويىنشا كوش باسىندا تۇر.
2017 جىلى وبلىستا 600 مىڭعا جۋىق شارشى مەتر تۇرعىن ءۇي پايدالانۋعا بەرىلدى. اتاپ ايتقاندا, وبلىس ورتالىعىندا 61 كوپقاباتتى ءۇي قۇرىلىسى سالىنىپ جاتىر, ونىڭ ىشىندە 24 ءۇي, نەمەسە 957 پاتەر, جەكە ينۆەستورلاردىڭ قاراجاتى ەسەبىنەن جانە 37 ءۇي (2014 پاتەر) مەملەكەتتىك تۇرعىن ءۇي باعدارلامالارىنىڭ اياسىندا.
2017 جىلى وڭىردە اپاتتى ۇيلەر مەن مەكتەپتەر ماسەلەسى تولىق شەشىمىن تاپتى.
ودان بولەك, قىزىلوردا قالاسىندا سىرداريا وزەنىنىڭ سول جاعالاۋىنداعى جاڭا قالانىڭ العاشقى نىساندارىنىڭ قۇرىلىسى باستالدى. اتاپ ايتقاندا, 18 كوپقاباتتى تۇرعىن ءۇي, 320 ورىندىق بالاباقشا جانە «بولاشاق» ۋنيۆەرسيتەتىنىڭ ستۋدەنتتەر قالاشىعى سالىنۋدا.
سونداي-اق, بيىل بايقوڭىر قالاسىن گازداندىرۋ جۇمىستارى باستالىپ, قىزىلوردا قالاسى ماڭىنداعى بەلكول كەنتىنە كوگىلدىر وتىن بەرىلدى. ياعني, وبلىس تۇرعىندارىنىڭ 64 پايىزى تابيعي گازدى پايدالانىپ وتىر.
بيىل دا سىر ديحاندارى رەكوردتىق ءونىم جيناپ, ەل قامباسىنا 500 مىڭ توننادان استام كۇرىش قۇيىلدى. ايتا كەتەيىك, ءونىم ءوسىمى ەگىن القاپتارىنىڭ ۋلعايۋى ەمەس, سەلەكتسيالىق جۇمىستاردىڭ تابىستى جۇرگىزىلۋى مەن كۇرىش سورتتارىنىڭ ونىمدىلىگىن ارتتىرۋدىڭ ارقاسىندا جۇزەگە استى.
وتكەن جىلى ايماعىمىزدىڭ اۋىلشارۋاشىلىق ءونىم وندىرۋشىلەرى الىس شەتەلدىك نارىققا شىعا باستادى. يران يسلام رەسپۋبليكاسىمەن كۇرىشتى ءوسىرۋ, وڭدەۋ جانە ەكسپورتتاۋ بويىنشا ارىپتەستىك ورناتىلدى. ەستەرىڭىزگە سالا كەتەيىك, 2016 جىلى قىزىلوردا وبلىسىندا يراندىق «تورەم حوشەمي» سورتىنىڭ سىنامالىق پارتياسى ەگىلدى, ال اعىمداعى جىلدىڭ قاراشا ايىندا «بايقوڭىر ينۆەست» ينۆەستيتسيالىق فورۋمىنىڭ اياسىندا يران يسلام رەسپۋبليكاسىنا قىزىلوردا وبلىسىنان كۇرىش جەتكىزۋ تۋرالى كەلىسىمگە قول قويىلدى.
2017 جىلى سىر وڭىرىنەن العاشقى ەت ونىمدەرى يران مەن ءباا ەكسپورتتالدى.
جالپى, 2017 جىلى اۋىلشارۋاشىلىق ونىمدەرىنىڭ ەكسپورتى 42 پايىزعا, ونىڭ ىشىندە كۇرىشتىڭ ەكسپورتى 45 پايىزعا ءوستى.
ءبىلىم سالاسىنداعى جەتىستىكتەر دە ايتارلىقتاي. ماسەلەن, بيىل مەكتەپ وبلىس تۇلەكتەرىنىڭ 97 پايىزى جوعارى جانە ورتا ارناۋلى ورىندارعا وقۋعا ءتۇستى. رەسەي فەدەراتسياسىنىڭ تەحنيكالىق جوو-دارىمەن ناتيجەلى سەرىكتەستىك ورناتۋدىڭ ناتيجەسىندە 452 قىزىلوردالىق تۇلەك ماسكەۋ جانە سانكت-پەتەربۋرگ قالالارىندا ءبىلىم الىپ جاتىر. ايتا كەتەيىك, قىزىلوردا وبلىسى – ءوز تۇلەكتەرىن رەسەي فەدەراتسياسى ۇكىمەتىنىڭ گرانتتارى ەسەبىنەن وقىتىپ جاتقان بىردەن-ءبىر ءوڭىر.
سونىمەن قاتار, كەلەسى جىلدان باستاپ م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتى جىل سايىن قىزىلوردالىق جاستارعا «كيبەرقاۋىپسىزدىك» جانە «پروتسەستەردى ماتەماتيكالىق ادىسپەن مودەلدەۋ» ماماندىقتارى بويىنشا ماگيستراتۋراعا 20 گرانتتان بولەتىن بولدى.
رەسەي فەدەراتسياسىنىڭ چەليابينسك قالاسىندا رەسەي جانە قازاقستان باسشىلارىنىڭ قاتىسۋىمەن وتكەن ءحىV وڭىرارالىق ىنتىماقتاستىعى فورۋمى اياسىندا تاعى ءبىر قىزىلوردا وبلىسى ءۇشىن وتە ماڭىزدى ماسەلە شەشىمىن تاپتى: 12 مىڭ گەكتارعا جۋىق جەر رەسەي فەدەراتسياسىنىڭ ارەنداسىنان شىعارىلىپ, قازاقستان رەسپۋبليكاسىنا شاعىن جانە ورتا بيزنەستى دامىتۋ ءۇشىن قايتارىلىپ بەرىلدى.
ءوتىپ بارا جاتقان جىل سىر ءوڭىرى ءۇشىن تابىستى بولدى.