اتىراۋ وبلىسىندا «بەكىرە-2017» اكتسياسى كەزىندە براكونەرلەردەن 64 توننادان استام بالىق, 118 ءجۇزۋ قۇرالى جانە 11 كيلوگرامم ۋىلدىرىق تاركىلەندى
27 جەلتوقساندا اتىراۋ وبلىستىق اكىمدىگىندە قۇقىق بۇزۋشىلىقتىڭ الدىن الۋ جونىندە ۆەدومستۆوارالىق كوميسسيانىڭ وتىرىسى ءوتتى دەپ حابارلايدى اتىراۋ وبلىستىق وڭىرلىك كوممۋنيكاتسيالار قىزمەتى.
وبلىس اكىمى نۇرلان نوعاەۆتىڭ توراعالىعىمەن وتكەن جينالىسقا بارلىق قۇقىق قورعاۋ جانە قاداعالاۋ ورگاندارى مەن قۇزىرلى مەملەكەتتىك قۇرىلىمداردىڭ باسشىلارى قاتىستى. كۇن تارتىبىندەگى ماسەلەلەردىڭ ءبىرىن قاراۋ بارىسىندا ايماق باسشىسى براكونەرلىكپەن كۇرەس بويىنشا اتقارىلعان جۇمىستار تۋرالى ەسەپتى تىڭدادى.
«بەكىرە-2017» تابيعات قورعاۋ اكتسياسى كەزىندە 826 زاڭ بۇزۋشى اكىمشىلىك جاۋاپكەرشىلىككە تارتىلدى, 21 ءىس بويىنشا سوت شەشىمى شىقتى. بالىق قورعاۋ زاڭناماسىن بۇزعاندارعا 13 ملن تەڭگە اكىمشىلىك ايىپپۇل سالىندى. بالىق قورىنا زالال كەلتىرگەنى ءۇشىن بالىق قورعاۋ زاڭناماسىن بۇزعاندارعا 2 ملن 230 مىڭ تەڭگە كولەمىندە قۋىنىم بەرىلدى. 64 توننا بالىق تاركىلەندى, ونىڭ 3 توننا 126 كيلوگرامى بەكىرە تۇقىمداس جانە 11 كگ ۋىلدىرىق. زاڭسىز اينالىمنان 118 ءجۇزۋ قۇرالى مەن 42 بىرلىك اۆتوموتوكولىك شىعارىلدى.
نۇرلان نوعاەۆ بارلىق دەڭگەيدەگى مەملەكەتتىك ورگان قىزمەتكەرلەرى تۇرعىندارمەن ءتۇسىندىرۋ جۇمىستارىن جۇرگىزۋ كەرەكتىگىن اتاپ ءوتتى. جينالىستا تۇرعىنداردىڭ زاڭسىز بالىق اۋلاۋمەن اينالىسۋلارىنا سەبەپ جوقتىعى دا ايتىلدى. ايماقتا ءار ءتۇرلى سالادا لايىقتى جۇمىس تابۋعا قاجەت جاعدايدىڭ ءبارى جاسالۋدا.
ايماق باسشىسى ورىنباسارلارىنا ناقتى تاپسىرمالار بەردى.
-از جۇمىس ىستەلگەن جوق, ءبىز ءبىراز وڭ كورسەتكىشتەرگە قول جەتكىزدىك, بىراق ءالى دە قىزمەتىمىزدى كۇشەيتۋىمىز كەرەك,-دەدى نۇرلان نوعاەۆ.- براكونەرلىك - ءبىزدىڭ قوعامنىڭ ازعىندىعى, ونىڭ تامىرىنا بالتا شابۋىمىز كەرەك, ول ءۇشىن مەملەكەتتىك ورگاندار ءوزارا ارەكەتتە جۇمىلىپ جۇمىس ىستەۋى ءتيىس. بالىق اۋلاۋمەن زاڭدى تۇردە اينالىسقىسى كەلەتىن بالىقشىلار سالىق ورگانىندا جەكە كاسىپكەر رەتىندە تىركەلىپ, بالىق تاپسىراتىن وندىرىستىك كووپەراتيۆتەرمەن رەسمي كەلىسىم شارتقا وتىرۋلارى كەرەك. ءبارى اشىق, ايقىن بولۋى قاجەت.
باقىتگۇل باباش,
"ەگەمەن قازاقستان"