استانادا ء«سوز قازىناسى» انيماتسيالىق ءفيلمىنىڭ بالالارعا ارنالعان الدىن الا كورسەتىلىمى ءوتتى.
ەلىمىزدە تىلدەردى دامىتۋ مەن قولدانۋدىڭ 2011-2020 جىلدارعا ارنالعان مەملەكەتتىك باعدارلاماسى اياسىندا قر مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتىنىڭ تاپسىرىسىمەن كوپتەگەن جوبالار ىسكە اسۋدا. ونىڭ ىشىندە ەلىمىزدىڭ رۋحاني قۇندىلىقتارىن جاڭعىرتىپ, باي قازىنامىزدى تولىقتىرا تۇسەتىن كىتاپتار, قازاق ءتىلىن قولدانۋ اياسىن كەڭەيتۋگە سەپتىگىن تيگىزەتىن وقۋ-ادىستەمەلىك قۇرالدار, جاستاردى ءتىلدى مەڭگەرۋگە جەتەلەيتىن تەلەۆيزيالىق جوبالار, ت.ب. بار. ىلكىمدى ىستەردىڭ قاتارى جۋىردا تاعى ءبىر تىڭ جوبا, ء«سوز قازىناسى» اتتى انيماتسيالىق فيلممەن تولىقتى.
مۋلتفيلم قازاقتىڭ باي ءتىل مۇراسى مەن سالت-داستۇرلەرىن بالالارعا ناسيحاتتاۋ, ادەتتە ءبىز ماعىناسىنا كوپ ۇڭىلە بەرمەيتىن ىرىم-تىيىمداردىڭ ءمان-ماڭىزىن اشىپ كورسەتۋ ماقساتىندا دايىندالعاندىقتان ولار ويىن ەلەمەنتتەرى ارقىلى قازاق ەرتەگىلەرىنىڭ كەيىپكەرلەرىنىڭ شىتىرمان وقيعالارىمەن بەينەلەنگەن.
«فيلم پەرسوناجدارىن دايىنداۋ كەزىندە جاڭا تۇجىرىمداما جاسالىپ, كەيىپكەرلەردىڭ بارىنشا تارتىمدى بولۋى ويلاستىرىلدى. بۇل انيماتسيالىق ءفيلمنىڭ ادەتتەگى ونىمدەردەن ايىرماشىلىعى – ستسەناري قۇرىلىمى ۇلتتىق فولكلور ەرەكشەلىكتەرىن بالالارعا وڭاي ءتۇسىندىرۋ ءۇشىن وقيعالار قيال-ەرتەگى ەلەمەنتتەرىنە سۇيەنگەن. وندا 13 كەيىپكەر بار. قوسالقى كەيىپكەرلەردىڭ سانى 30-عا جۋىقتايدى. ءفيلمدى دىبىستاۋعا ەلىمىزگە تانىمال اكتەرلار تارتىلدى. ءونىم 15 سەريادان تۇرادى, 2D, 3D فورماتتا دايىندالدى», دەيدى جوبانىڭ شىعارماشىلىق جەتەكشىسى ازامات كەڭەس ۇلى.
«بالالاردىڭ ءتىلىن, وي-ءورىسىن دامىتۋعا باعىتتالعان كونتەنتتى كوبەيتۋ ماقساتىندا 2013 جىلدان باستاپ انيماتسيالىق فيلمدەر شىعارىپ كەلە جاتىرمىز. مىسالى, 2013 جىلى 50 سەريالى انيماتسيالىق فيلم شىققان بولسا, 2014-2016 جىلدارى دا تۋرا سولاي. «دينا مەن دانيك», «كۇنىكەي جانە ونىڭ دوستارى», «جاندوس جانە ونىڭ دوستارى» كوپ سەريالى انيماتسيالىق فيلمدەر شىعارىلدى. ولاردىڭ بارلىعى دا بالالاردىڭ وي-ءورىسىن, سويلەۋ قابىلەتىن, ءتىلىن دامىتۋ ماقساتىندا شىعارىلىپ وتىرعان انيماتسيالىق فيلمدەر. قازاق ءتىلىن ۇيرەتۋگە باعىتتالعان كۋرستىق انيماتسيالىق فيلمدەر دەپ ايتۋعا دا بولادى. بيىلعى جوبامىز ء«سوز قازىناسى» دەپ اتالاتىن مۋلتفيلم. بۇل دا قازاقتىڭ كوپتەن كونەرگەن سالت-داستۇرلەرىن جاڭعىرتۋ, بالالارعا ناسيحاتتاۋ, ءتۇسىندىرۋدى كوزدەيتىن جوبا. كونەرگەن سوزدەردىڭ ءمان-ماعىناسىن اشىپ جەڭىل, بالالارعا ۇعىنىقتى تۇردە ءتۇسىندىرۋ ماقساتىندا شىعارىلىپ جاتىر», دەيدى قر مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتىنىڭ باس مامانى, جوبا جەتەكشىسى ولجاس شىنجىگىتوۆ.
ء«سوز قازىناسى» انيماتسيالىق ءفيلمى 2018 جىلى «بالاپان» تەلەارناسىنىڭ ەفيرىنەن كورسەتىلەتىن بولادى.