ۇلتتىق يادرولىق ورتالىقتىڭ باس ديرەكتورى ەرلان باتىربەكوۆ كۋرچاتوۆ قالاسىنىڭ قۇرمەتتى ازاماتى اتاندى.
كۋرچاتوۆ قالاسىنداعى قر ۇلتتىق يادرولىق ورتالىعىندا ەنەرگەتيكتەر كۇنىنە وراي سالتاناتتى جيىن بولىپ ءوتتى. جيىنعا كۋرچاتوۆ قالاسىنىڭ اكىمى الماس وڭداقانوۆ, قالالىق ءماسليحات حاتشىسى گۇلميرا قارىمباەۆا جانە تاعى باسقا دا مەكەمە, ۇيىم باسشىلارى قاتىسىپ وتىردى. جيىندا كۋرچاتوۆ قالاسىنىڭ اكىمى الماس وڭداقانوۆ ۇلتتىق يادرولىق ورتالىقتىڭ باس ديرەكتورى ەرلان باتىربەكوۆكە «كۋرچاتوۆ قالاسىنىڭ قۇرمەتتى ازاماتى» ماراپاتىن تاپسىردى.
-ەرلان عادىلەت ۇلىن وسى ماراپاتقا ناعىز لايىق ازامات قالالىق ءماسليحاتتىڭ كەزەكتى سەسسياسىندا دەپۋتاتتار ارنايى شەشىم شىعاردى,-دەدى قالا اكىمى الماس وڭداقانوۆ,- ەرلان باتىربەكوۆ كاسىبي مامان, بىلىكتى باسشى. وسى ازاماتتىڭ جەتەكشىلىگىمەن بۇگىنگى تاڭدا قر ۇلتتىق يادرولىق ورتالىعىندا اتوم سالاسىنىڭ يننوۆاتسيالىق باعدارلامالارى, اتاپ ايتقاندا «كتم توكاماك» جوباسى ىسكە قوسىلۋدا. ەل پرەزيدەنتى نۇرسۇلتان نازارباەۆتىڭ تاپسىرماسىمەن بەيبىت اتومدى ناسيحاتتاۋدا اقش, جاپونيا, فرانتسيا, رەسەي سياقتى كوپتەگەن الىس جانە جاقىن شەتەلدەرمەن ىسكەرلىك بايلانىس ورناتىپ كەلەدى. شەتەلدىك عالىمدار بۇگىندە قازاقستاندىق اتوم سالاسىنىڭ ماماندارىنىڭ جۇمىسىنا قىزىعۋشىلىق تانىتسا, ول بىردەن-ءبىر وسى ەرلان عادىلەت ۇلى باتىربەكوۆتىڭ ەڭبەگىنىڭ جەمىسى دەپ بىلەمىز.
ايتا كەتۋ كەرەك, ۇلتتىق جاراتىلىستانۋ اكادەمياسىنىڭ اكادەميگى, ۇلتتىق يادرولىق ورتالىقتىڭ باس ديرەكتورى ەرلان باتىربەكوۆ يادرولىق ەنەرگەتيكاسى سالاسىنداعى ىشكى رەاكتورلىق تاجىريبەلەر مەن يادرولىق ەنەرگيانىڭ وپتيكالىق ساۋلەلەنۋىن تەرەڭ زەرتتەگەن ۇزدىك مامان بولىپ تابىلادى. ول يادرولىق ەنەرگەتيكا, يادرولىق ەنەرگيانىڭ جاڭا تۇرگە ەنۋى تاقىرىبىندا 100-دەن اسا عىلىمي ماقالا جازعان. ونىڭ ىشىندە «عارىشتىق باعىتتاعى يادرولىق-ەنەرگەتيكالىق رەاكتورلاردى ورناتۋدىڭ جانە لازەرلەردى جاساۋدىڭ فيزيكالىق ماسەلەلەرى» تاقىرىبىنداعى زەرتتەۋ جۇمىسى عىلىمي ورتادا ايرىقشا اتالادى.
راۋشان نۇعمانبەكوۆا
كۋرچاتوۆ قالاسى.
سۋرەتتى تۇسىرگەن اۆتور.