وزبەكستان پرەزيدەنتى شاۆكات ميرزيەەۆ العاش رەت ولي ماجىلىسىنە جولداۋ ارنادى. وزبەكستان تاريحىنداعى پرەزيدەنتتىڭ العاشقى جولداۋى 4 ساعاتقا سوزىلدى, دەپ حابارلادى gazeta.uz وزبەكستان پرەزيدەنتىنىڭ ءباسپاسوز قىزمەتىنە سىلتەمە جاساپ.
باسىلىمنىڭ حابارلاۋىنشا, جولداۋدا وزبەكستان پرەزيدەنتى حالىقپەن ديالوگ جانە ادام مۇددەسى جىلى رەتىندە بەكىتىلگەن 2017 جىلدى قورىتىندىلاپ, مەملەكەت دامۋىنىڭ بولاشاقتاعى العىشارتتارىن اتاعان. سونىمەن قاتار پرەزيدەنت شاۆكات ميرزيەەۆتىڭ ۇسىنىسىمەن 2018 جىل بەلسەندى كاسىپكەرلىكتى, يننوۆاتسيالىق يدەيالار مەن تەحنولوگيالاردى قولداۋ جىلى بولىپ بەكىتىلگەن. پرەزيدەنت ءوز سوزىندە جىلدى بەكىتكەندە ونىڭ اتاۋىنا ەمەس, ناتيجەسىنە باسا نازار اۋدارۋ كەرەك ەكەنىن ايتتى.
وزبەكستاندىق باق-تاردىڭ جازۋىنشا, وزبەكستان پرەزيدەنتى مەملەكەتتە جۋرناليستيكا جانە بۇقارالىق كوممۋنيكاتسيا ۋنيۆەرسيتەتىن قۇرۋ قاجەتتىلىگى تۋرالى ايتقان. "بۇگىندە رەسپۋبليكامىزدا 1500 باق بار. ولاردىڭ بارلىعىنا جوعارى بىلىكتى ماماندار قاجەت. وكىنىشكە قاراي, وزبەكستاندا وسى سالاداعى پروبلەمالاردى ورتالىقتاندىرىلعان تارتىپپەن شەشەتىن جوعارى وقۋ ورنى جوق", دەدى شاۆكات ميرزيەەۆ.
ايتا كەتۋ كەرەك, ءىس-شاراعا سەنات مۇشەلەرى مەن زاڭ شىعارۋشى پالاتا دەپۋتاتتارىمەن قاتار بارلىق اتقارۋشى جانە شارۋاشىلىق بيلىك وكىلدەرى, ۇكىمەتتىك ەمەس ۇيىم مۇشەلەرى, شەت ەلدەردىڭ ەلشىلەرى قاتىسقان.