نۇرسۇلتان نازارباەۆ بالالاردى جاڭا جىل مەرەكەسىمەن قۇتتىقتادى

«قىمباتتى بالالار! بارشامىز اسىعا كۇتەتىن جارقىن مەرەكە - جاڭا جىلعا ساناۋلى كۇندەر قالدى. مەن سەندەردى كەلە جاتقان جاڭا جىلمەن شىن جۇرەكتەن قۇتتىقتايمىن! بۇل سەندەردىڭ مەرەكەلەرىڭ - قىزىقتى ساتتەردىڭ, ەرتەگىلەر مەن سىيلىقتاردىڭ كەزى. بارلىعىڭ جاقسى وقىپ, سپورتتىق جەتىستىكتەرگە جەتىپ, قايىرىمدى ىستەر جاساپ, جاڭا جىلدىق مەرەكەگە ەڭبەك سىڭىردىڭدەر دەپ ويلايمىن. جاڭا جىلدا ءبارى باسقاشا بولادى, جاڭا تابىستارعا قول جەتكىزىپ, جاڭا ءبىلىمدى يگەرەسىڭدەر. بۇل رەتتە وتباسىڭا دەگەن ماحابباتتى, دوستارعا دەگەن ادالدىقتى, ۇستازدارعا دەگەن قۇرمەتتى جانە ەلىڭە دەگەن سۇيىسپەنشىلىكتى ساقتاپ قالۋ كەرەك», - دەدى ن.نازارباەۆ ەلورداداعى وقۋشىلار سارايىندا وتكەن «اسقاق وردام - استانا» جاڭا جىل مەرەكەسىندەگى بەينەقۇتتىقتاۋدا.

پرەزيدەنت بالالار ءۇشىن بارلىق مۇمكىندىكتەردىڭ قولجەتىمدى ەكەنىن ەرەكشە اتاپ ءوتتى. ء«بىزدىڭ ەلىمىز جىلدان-جىلعا قارىشتاپ دامىپ, سەندەرگە عالامات بولاشاق سىيلاۋ ءۇشىن جاڭا ماقساتتاردى باعىندىرىپ كەلەدى. ءدال وسى ۋاقىتتا ءوسىپ كەلە جاتقان سەندەر - باقىتتى ۇرپاقسىڭدار. سەندەر ءۇشىن بارلىق جول اشىق, بار ارماندارىڭ ورىندالادى. اينالايىن بالالار! جاڭا جىلدا بارىڭە مول يگىلىك پەن جارقىن بولاشاق تىلەيمىن. بالالىق شاقتارىڭ بازارلى, ومىرلەرىڭ اجارلى بولسىن! جاڭا جىلدا ارماندارىڭ ورىندالىپ, تاۋەلسىز ەلىمىزبەن بىرگە ءوسىپ-وركەندەي بەرىڭدەر», - دەدى پرەزيدەنت.

ايتا كەتەيىك, ەلورداداعى وقۋشىلار سارايىندا وتكەن مەرەكەلىك باعدارلاماعا ەرتەگى الەمىندەگى كەيىپكەرلەردىڭ قاتىسۋىمەن شوۋ-قويىلىمدار ءوتتى. شاراعا 200 بالا قاتىستى.