بۇل جايىندا وبلىس اكىمدىگىندە وتكەن دەنساۋلىق ساقتاۋ باسقارماسىنىڭ جىلدىق قورىتىندى ەسەبىندە ايتىلدى.
وڭىردەگى قالالار مەن اۋدانداردا 26 اكۋشەر-گينەكولوگ, 23 جالپى پراكتيكا دارىگەرى, 20 انەستەزيولوگ دارىگەر, 15 تەراپەۆت, 13 نەۆروپاتولوگتىڭ ورىندارى بوس تۇر. بۇعان سەبەپ جەرگىلىكتى اكىمدىكتەردەن «ديپلوممەن اۋىلعا!» باعدارلاماسىمەن كەلگەن جاس ماماندارعا ناقتى كوڭىل ءبولىپ, ىنتالاندىرۋدىڭ بولماۋى دەلىندى.
وبلىس اكىمى بولات باقاۋوۆ اۋدان ورتالىقتارى مەن اۋىلداردا دارىگەرلەردى تۇرعىن ۇيمەن قامتاماسىز ەتۋدى تاپسىردى. وبلىستىق دەنساۋلىق ساقتاۋ باسقارماسىنىڭ مالىمەتىنشە, بيىل بالا كوتەرگەن ەكى ايەل دارىگەرلەردىڭ كىناسىنەن كوز جۇمىپتى. دارىگەرلەر تارتىپتىك جازاعا تارتىلعان. بيىل بالا تۋ كورسەتكىشى 4,2 پايىزعا كەمىپتى.
مەرزىمىنەن بۇرىن تۋعان 500-900 گرامدىق سابيلەردى امان الىپ قالۋ قيىنعا سوعاتىن كورىنەدى. جۇكتى ايەلدەردىڭ ۋاقىتىلى تىركەۋگە الىنۋى ماڭىزدى. قان اينالىمى جۇيەسى اۋرۋلارىنان قايتىس بولعاندار جالپى ءولىم-ءجىتىمنىڭ 40 پايىزدان استامىن قۇرايدى. ونكولوگيالىق اۋرۋلاردان ءولىم كورسەتكىشى قاشىر اۋدانى, وبلىس ورتالىعىندا جوعارى.
فاريدا بىقاي
«ەگەمەن قازاقستان»
پاۆلودار