اقتاۋ حالىقارالىق اۋەجايىندا ميلليونىنشى جولاۋشىنى انىقتاۋ ءراسىمى سالتاناتتى تۇردە ءوتتى. شارا ەلوردامىز استانا قالاسىنىڭ 20 جىل تولۋىنا وراي ۇيىمداستىرىلعان.
2016 جىلى اۋەجايدا 865 مىڭنان استام جولاۋشىعا قىزمەت كورسەتىلگەن. ال, بيىل 1 ملن. جولاۋشى ساپارعا شىققان. مۇندا الىس جانە جاقىن شەتەلدەرگە 24 باعىت بويىنشا ۇشۋعا مۇمكىندىك بار. اقتاۋ اۋەجايىنان ماسكەۋ, ستامبۋل, باكۋ قالالارى ارقىلى الەمنىڭ كەز-كەلگەن جەرىنە ساياحاتتاۋعا بولادى. بولاشاقتا ميلان, امستەردام, لوندون, دۋباي, گورگان, تۋركمەنباشى, ساماركاند باعىتىنا رەيستەر اشىلماق.
-بۇگىن كيەلى تۇبەكتە 21 جىل بۇرىن سالىنعان شاعىن اۋەجاي, قازىر ەۋرازيا كونتينەنتىندەگى زاماناۋي اۋەجايلارعا ساي كەلەتىن اۋەجايلاردىڭ ءبىرى. 2009 جىلى اقتاۋ اۋەجايى – «تمد ەلدەرى اراسىنداعى ەڭ ۇزدىك اۋەجاي» اتاعىن يەلەنسە, 2010 جىلى «تمد ەلدەرىنىڭ اۋەجايلارى اراسىنداعى ەڭ قارقىندى دامۋشى اۋەجاي» اتاندى. بۇگىندە وسى اۋەجايدان ەلوردامىزعا وڭىرىمىزدەن 1 ميلليونىنشى جولاۋشىسىن شىعارىپ سالعالى تۇر. ساپارلارىڭىزعا ساتتىلىك تىلەيمىن!, دەدى ءسوز العان ايماق باسشىسى ەرالى توعجانوۆ.
شارا اياسىندا جەڭىمپازدىڭ ەسىمى لوتورەيا جۇرگىزۋ ادىسىمەن كەزدەيسوق انىقتالدى. الدىن-الا ەلورداعا اتتانعالى تۇرعان بارلىق جولاۋشىلارعا تىركەلۋ كەزىندە 2 دانا ۇشاققا وتىرعىزۋ تالونى بەرىلگەن. وسىلايشا, تالوننىڭ 1 داناسىن ۇيىمداستىرۋشىلار الىپ, ارنايى جاشىككە سالعان.
جەڭىمپازدىڭ اتىن اۋەجايداعى ەڭ كىشكەنتاي جولاۋشى مەن ءوڭىر باسشىسى ەرالى توعجانوۆ انىقتادى. ونىڭ ەسىمى - سۇلتانگەرەي تىلەگەنوۆ. استانا قالاسىنا ۇستەل تەنيسىنەن جارىسقا كەتىپ بارا جاتقان ول قۋانىشىن جاسىرا المادى.
جەڭىمپازعا «بەك Air» اۋە كومپانياسىنىڭ قولداۋىمەن قازاقستاننىڭ ءاربىر قالاسىنا تەگىن ساپار شەگۋگە جولداما مەن اقتاۋ حالىقارالىق اۋەجايىندا 1 جىل تەگىن CIP-زالىنان تەگىن قىزمەت كورسەتۋ سەرتيفيكاتى تابىستالدى.
سونداي-اق, مەرەكە اياسىندا اۋەجايدا ايانباي ەڭبەك ەتىپ جۇرگەن ماماندار وبلىس اكىمىنىڭ العىس حاتىمەن ماراپاتتالدى.
جۋىردا اقتاۋ حالىقارالىق اۋەجايىنا سەنەگال پرەزيدەنتى ماكي سالل باستاعان دەلەگاتسيا كەلدى. نەگىزگى باعىتتارى – جاپونيا. قوناقتار قاتارىندا سەنەگال ەلىنىڭ ءبىرىنشى حانىمى, داكار قالاسىنىڭ مەرى مەن بىرقاتار مينيسترلەر بار. دەلەگاتتاردى وبلىس اكىمى ارنايى قارسى الىپ, ۇلتتىق سالت-داستۇرگە ساي شاپان كيگىزدى. ولار قازاق ەلىنىڭ قوناقجايلىلىعىنا ريزا بولىپ, ريزاشىلىقتارىن جەتكىزگەن بولاتىن.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى