تاۋەلسىزدىڭ جىلدارىندا شىعىس قازاقستاننىڭ دەنساۋلىق ساقتاۋ سالاسىندا جەتكەن جەتىستىكتەرى از ەمەس. سونىڭ ىشىندە انا مەن بالا ءولىمى ازايىپ, اۋرۋحانالار زاماناۋي تەحنيكالارمەن جابدىقتالۋدا.
اتاپ ايتساق, وسكەمەن قالالىق №1 اۋرۋحانا بازاسىندا ەلدەگى العاشقى روبوتتاندىرىلعان حيرۋرگيا ورتالىعىنىڭ اشىلۋى جوسپارلانعان. سيمۋلياتسيالىق جابدىقتار ورناتىلعان ورتالىقتا ترانسپلانتالوگيالىق جانە انگيوحيرۋرگيالىق وتا جاساۋعا مۇمكىندىك تۋادى. بۇل جايىندا ايماقتىق كوممۋنيكاتسيالار قىزمەتىندە وتكەن ءباسپاسوز ءماسليحاتى بارىسىندا وبلىستىق دەنساۋلىق ساقتاۋ باسقارماسىنىڭ باسشىسى مارات شورانوۆ ايتتى.
«تەك وسى جىلدىڭ وزىندە وبلىستىق بيۋدجەت ەسەبىنەن مەديتسينا سالاسىنا 9,5 ملرد تەڭگە بولىنسە, ونىڭ 7,3 ملرد تەڭگەسى جابدىقتار الۋعا جۇمسالادى. قاراجاتقا بەسقاراعاي, ۇلان, گلۋبوكوە, بورودۋليحا اۋداندارىنىڭ ورتالىق اۋرۋحانالارىنا جانە وسكەمەندەگى ينسۋلت ورتالىعىنا جاڭا زاماناۋي جابدىقتار الىنادى», – دەدى مارات شورانوۆ.
سونىمەن قاتار ايماقتا شقو اكىمى دانيال احمەتوۆتىڭ تاپسىرماسىمەن دەنساۋلىق ساقتاۋ سالاسىن دامىتۋ ماقساتىندا قۇنى 1,2 ملرد. تەڭگەنى قۇرايتىن ءۇش كەزەڭنەن تۇراتىن ستراتەگيالىق جوسپار قۇرىلعان. اتالمىش جوسپار اياسىندا ونكولوگيا, كارديولوگيا, انا مەن بالا دەنساۋلىعىن ساقتاۋ سىندى باعىتتارعا ەكپىن جاسالىپ, ماماندار دايىندالىپ جاتىر.
«الداعى 3 جىلدىقتىڭ ىشىندە شەتەلدىك كلينيكالاردا 150 مامان وقىتىلىپ, ولار جەرگىلىكتى دارىگەرلەرمەن ءىس-تاجىريبەمەن ءبولىسىپ, بىلىكتىلىكتەرىن ارتتىرادى. قازىردىڭ وزىندە شىعىسقازاقستاندىق 50 مامان ۇلىبريتانيادان وقىپ كەلدى», – دەدى باسقارما باسشىسى.
بۇگىنگى تاڭدا وبلىستا انا مەن بالا ءولىمى 3 ەسە ازايسا, ورتاشا ءومىر ءسۇرۋ كورسەتكىشى ۇلعايىپ كەلەدى.
ازامات قاسىم,
«ەگەمەن قازاقستان»
وسكەمەن