ء«ۇيى جوقتىڭ كۇيى جوق» دەيدى حالىق دانالىعى. وڭتۇستىك قازاقستان وبلىسىندا پاتەر كەزەگىندە تۇرعاندار كوپ. كۇرمەۋلى ماسەلەنىڭ ءتۇيىنى بىرەر جىلدا شەشىلمەيتىندىگى بەلگىلى. سوندىقتان ءار اۋدان, قالا ءوز مۇمكىندىكتەرىنە قاراي تۇرعىن ۇيلەر سالىپ, تارىققان جانداردىڭ ساۋابىن الىپ جاتىر.
تاۋەلسىزدىك كۇنى قارساڭىندا تولە بي اۋدانىنداعى 480 وتباسى باسپانالى بولدى. بەس قاباتتى 8 تۇرعىن ءۇي «نۇرلى جەر» باعدارلاماسى بويىنشا سالىنعان.
سالتاناتتى شاراعا وبلىس باسشىسى جانسەيىت تۇيمەباەۆ, وبلىستىق ءماسليحات حاتشىسى قايرات بالابيەۆ, «نۇر وتان» پارتياسى وقو فيليالى توراعاسىنىڭ ءبىرىنشى ورىنباسارى نۇرماحان جولداسوۆ باستاعان رەسمي ادامدار قاتىستى.
تۇرعىنداردى ارنايى مەرەكەمەن قۇتتىقتاعان وڭتۇستىك قازاقستان وبلىسىنىڭ اكىمى جانسەيىت تۇيمەباەۆ پاتەرلەردىڭ ەلباسىنىڭ مەملەكەتكە تاپسىرعان باعدارلاماسى بويىنشا سالىنىپ جاتقانىن ايتتى.
– ءبىزدىڭ باستى مىندەتىمىز – حالىقتىڭ الەۋمەتتىك جاعدايىن جاقسارتىپ, ساپالى قىزمەت كورسەتۋ. وبلىس, اۋدان ورتالىقتارىندا, ەلدى مەكەندەردە تۇرعىن ۇيلەر سالىنىپ جاتىر. سونىڭ ءبىر دالەلى – بۇگىن سىزدەردىڭ اۋداندارىڭىزداعى 8 كوپ قاباتتى تۇرعىن ءۇيدىڭ قۇرىلىسى اياقتالىپ, 480 وتباسى باسپانامەن قامتاماسىز ەتىلىپ, قۋانىشقا بولەنىپ وتىر. بۇل باعىتتاعى جۇمىستار بارلىق ەلدى مەكەندەردە ەلباسىمىزدىڭ «نۇرلى جەر» باعدارلاماسى اياسىندا جانە جەرگىلىكتى, وبلىستىق بيۋدجەت ەسەپتەرىنەن جالعاسىن تابا بەرمەك, – دەدى ءوڭىر باسشىسى.
ول پاتەر كىلتتەرىن جەتىم جانە اتا-اناسىنىڭ قامقورلىعىنسىز قالعان بالالارعا, اسكەري جانە بيۋدجەتتىك مەكەمە قىزمەتكەرلەرى مەن الەۋمەتتىك از قامتىلعان وتباسىلارىنا سالتاناتتى تۇردە تابىس ەتتى.
ايتا كەتەيىك, تولە بي اۋدانى تۇرعىن ۇيلەردىڭ قۇرىلىسىنا 2016-2017 جىلدارى وبلىستىق بيۋدجەتتەن 2 ملرد 735 ملن 406 مىڭ 084 تەڭگە ءبولىنىپ, بۇگىندە ول تولىعىمەن يگەرىلگەن. سونىڭ ناتيجەسىندە 29 264 شارشى مەتر تۇرعىن ءۇي ەل يگىلىگىنە بەرىلدى.
باقتيار تايجان, «ەگەمەن قازاقستان»
وڭتۇستىك قازاقستان وبلىسى