«تاۋەلسىزدىككە دەيىن ءجوندى جۇمىس ىستەمەپ ەدىم, دەربەستىككە قالاي قول جەتكىزدىك, سولاي قۇلشىنىپ كەتتىم», دەپ وتىرىك كولگىرسي المايمىن.
ازدى-كوپتى بار سانالى عۇمىرىمىزدى ءتىل ءبىلىمى عىلىمىنىڭ دامۋىنا ارناپ كەلە جاتقاندىقتان, قازاق ءتىلى تەك قاتىناس قۇرالى بولماي, اسەم ءتىل, سازدى ءتىل, نازدى ءتىل رەتىندە وركەندەپ, عىلىم, ساياسات, ەكونوميكا ءتىلى بولىپ, كوسەگەسى كوگەرىپ, ءورىسى كەڭەيسە ەكەن دەگەن تىلەكپەن ءومىر ءسۇرىپ كەلەمىز. تۇرمىستىق ءتىل رەتىندەگى تونىن سىپىرىپ, تۇتاس اقىلمان ادامداردىڭ سويلەيتىن كەمەل تىلگە اينالسا ەكەن دەگەن ارمان كەۋدەمىزدى كەرنەپ تۇراتىن. ادام بولعان سوڭ «مەنىڭ ءتىلىم تورتكۇل دۇنيەگە تەگىس تاراعان ەۋروپا تىلدەرىنەن كەم بولماسا, شىركىن», دەپ ويلايسىڭ عوي. تاۋەلدى كەزدە دە, تاۋەلسىز كەزدە دە ويلاعانىم وسى مەنىڭ.
ءالى ەسىمدە, تاۋەلسىزدىكتى العاش العان جىلدارى, ۇلتتىق وي-تانىم ويانىپ, سوعان قاناتتانىپ جۇرگەن كەزىمىزدە, رەسپۋبليكا سارايىندا ۇلكەن ءبىر كونتسەرت وتەتىن بولدى. اقىرىن اياڭداي باسىپ سول كونتسەرتكە كەلە جاتىپ ەدىم, جولاي ءبىر تانىسىم كەزدەستى. «قايدا بارا جاتىرسىز, اپاي؟», دەيدى. «كونتسەرتكە», دەيمىن. «ول كونتسەرتكە ۋاقىتىڭىزدى شىعىنداپ نەسىنە باراسىز؟ ىشىندە ءىلىپ الاتىن ءجىبى ءتۇزۋ ءبىر ارتيست جوق», دەمەسى بار ما؟ «اينالايىن, مەن كونتسەرت كورۋ ءۇشىن بارا جاتقام جوق. ەلىمىزدەگى ەڭ ۇلكەن ساراي – رەسپۋبليكا سارايى, 3200 قازاقتىڭ ءبىر جەردە وتىرعانىن كورىپ, سودان ءنار الىپ, راحاتتانۋ ءۇشىن بارا جاتىرمىن», دەدىم. شىنىم – وسى. تاۋەلسىزدىككە دەيىن 3000 قازاق تۇگىلى, انىق 300 قازاقتىڭ ءبىر جەردە وتىرعانىن دا كورە الماي كەلدىك قوي. بۇدان ارتىق قانداي باقىت بولۋى مۇمكىن!
تاۋەلسىزدىك يدەياسى قازاقتىڭ ساناسىنا سوناۋ حاندىق داۋىرلەردەن بەرى سىڭگەن. بۇل كۇندە شيرەك عاسىر بارىسىندا «ازاماتتارىمىز اتقا قونىپ, تولعامالى نايزا قولعا الىپ, دۇشپاندارمەن ايقاسىپ, سوعىسىپ ەمەس», زامانانىڭ ساياساتىنا قاراي بەيبىت جولمەن تاۋەلسىزدىككە يە بولىپ, عۇمىر كەشىپ جاتقانىمىزعا وسى ەركىندىكتىڭ ۇلگىسىن كورسەتىپ كەتكەن سول بابالارىمىزعا قارىزدارمىز. ونىڭ قۇرىلۋى مەن قۇلدىراۋىنىڭ ناتيجەسى قانداي بولعانى بۇگىنگى تاۋەلسىزدىگىمىزدى بەكىتە ءتۇسۋ كەرەكتىگىن كورسەتىپ كەتتى.
رابيعا سىزدىقوۆا, اكادەميك