بۇگىنگى زامانداعى ستۋدەنتتەر مەكەنجايى قانداي بولۋى كەرەك؟ ونىڭ ۇلگىسى مەن ەتالونىن ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ رەكتوراتى قوعامدىق ومىرگە كىرىكتىردى. سوعان ساي مۇندا 500 ادامعا ارنالعان توعىز قاباتتى جاستار مەن ستۋدەنتتەر ءۇيى بوي كوتەردى.
ونىڭ ادەتتەگى جاتاقحانالاردان وزگەشەلىگى قانداي؟ ەستىگەننىڭ جالعانى بولار, كورگەنىڭدى ايت دەمەي مە دانا حالقىمىز. وسى حالىقتىق قاعيداعا ساي كورگەنىمىزدى ايتار بولساق, «اقىلدى ءۇي» اتانىپ ۇلگەرگەن عيماراتتىڭ ارتىقشىلىعىنا ەشتەڭە تەڭ كەلمەيدى دەسە دە بولادى. وعان تىركەۋ ەلەكتروندىق نۇسقا بويىنشا اشىق, ءمولدىر جانە جاريالى تۇردە جۇرگىزىلەدى. مۇندا الەۋمەتتىك ادىلەتتىلىك تالاپتارى تولىقتاي ساقتالعان. سوندىقتان دا جاستار مەن ستۋدەنتتەر ءۇيىنىڭ تۇڭعىش تۇرعىندارى –تۇرمىسى تومەن, تابىسى از ءارى تولىق ەمەس وتباسىلاردىڭ بالالارى, وقۋ وزاتتارى, سونداي –اق وزگە وڭىرلەردەن كەلىپ, وقىپ جۇرگەن ستۋدەنتتەر بولىپ وتىر. عيمارات پەن بولمەلەرگە كىرۋ ءتارتىبى تولىقتاي اۆتوماتتاندىرىلعان. دالىزدەرگە بەينەكامەرالار قويىلعان. سىرتتان كىرگەندەر بولمەدەگى تۇرعىندارىڭ باس-جوعىن انىقتاپ, قاجەتتى جاعدايدا ەلەكتروندىق تابلو ارقىلى تومەندە تۇرىپ-اق بايلانىسقا شىعا الادى. سمارتحوۋم ۇلگىسىندەگى جاستار ءۇيى ەڭ سوڭعى يننوۆاتسيالىق تەحنولوگيا جەتىستىكتەرىمەن, ينتەرنەت جۇيەسىمەن, سونىڭ ىشىندە سمارت وقۋ زالىمەن تولىقتاي قامتىلعان. ستۋدەنتتەر سەكتسيالىق ۇلگىگە سايكەس ءبىر بولمەدە ەكى جانە ءۇش ادامنان تۇرادى.
جوعارى وقۋ ورنى جانىنداعى تسيفرلىق-تەحنولوگيالار ورتالىعىنىڭ ديرەكتورى تالعات جۇنىسقاليەۆ بىزگە تاياۋداعى ۋاقىتتا مۇندا وزدىگىنەن جينالىپ جابىلاتىن, قاجەت كەزىندە ءبىر دەمدە ستول مەن ورىندىق بولا قالاتىن كەرەمەت كەرۋەتتەر دە پايدا بولاتىنىن ايتىپ بەردى. ال ءۇي شاڭىراعىنىڭ توبەسىنە كۇن باتارەيالارى قوندىرىلماق. ستۋدەنتتەر ۇيىندەگى ىڭعايلى اس ءۇي, دەمالىس بولمەلەرى مەن ءماجىلىس, جاتتىعۋ زالدارى جانە مەديتسينالىق قوسىن ونىڭ جان-جاقتىلىعى مەن امبەباپتىعىن ايعاقتاي تۇسەدى.
وبلىس ورتالىعىندا ەل وڭىرلەرى اراسىندا ەشقانداي بالاماسى جوق عيماراتتىڭ تۇرعىزىلۋى اتالعان ۋنيۆەرسيتەت ستۋدەنتتەرىنىڭ جاتاقحانامەن قامتىلۋ دەڭگەيىن بۇعان دەيىنگى 56 پايىزدان 80 پايىزعا دەيىن كوتەرۋگە مۇمكىندىك تۋعىزىپتى. بۇدان بولەك تاعى دا 500 ورىندىق جاتاقحانا كۇردەلى جوندەۋدەن وتكىزىلۋدە. بۇل عيمارات كەلەسى جىلى پايدالانۋعا بەرىلمەك. سول كەزدە ستۋدەنتتەرىمىزدى جاتاقحانامەن تولىقتاي قامتي الامىز,- دەدى گازەت تىلشىسىنە ۋنيۆەرسيتەت رەكتورى باۋىرجان ەردەمبەكوۆ.
ستۋدەنت-جاستارعا ارنالعان «اقىلدى ءۇي» ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ ءوز قاراجاتىنا تۇرعىزىلعان. ونىڭ قۇنى 1 ميلليارد تەڭگەنى قۇرايدى.
تەمىر قۇسايىن
"ەگەمەن قازاقستان"