جىتىقارا اۋدانىنداعى ىرساي اۋىلى وبلىس ورتالىعىنان شالعايدا جاتىر. بۇل اۋىز سۋدىڭ ازابىن تارتىپ وتىرعان اۋىلدىڭ ءبىرى بولاتىن. تاۋەلسىزدىك مەرەكەسى قارساڭىندا اۋىلداستار ۇلكەن قۋانىشقا بولەندى, 117 وتباسىنا اۋىز سۋ كىرگىزىلدى, ولاردىڭ قاتارىنا الداعى كوكتەمدە تاعى دا قىرىقشاقتى وتباسى قوسىلاتىن بولادى.
«كوستانايسەلحوزۆودوپروۆودستروي» جاۋاپكەرشىلىگى شەكتەۋلى سەرىكتەستىگى 13,7 كيلومەتر سۋ قۇبىرىن تارتتى. بۇل جوباعا 270 ميلليون تەڭگە قارجى جۇمسالدى. وبلىس اكىمى ارحيمەد مۇحامبەتوۆ اۋىلداستاردى وسى قۋانىشىمەن قۇتتىقتادى.
«ەلباسى نۇرسۇلتان نازارباەۆتىڭ باستاماسىمەن قابىلدانعان «نۇرلى جول» مەملەكەتتىك باعدارلاماسى اياسىندا ەلدى مەكەندەردى, ونىڭ ىشىندە سىزدەردىڭ اۋىلدى اۋىز سۋمەن قامتاماسىز ەتىپ وتىرمىز. اۋىز سۋ ادامداردىڭ ەڭ قاجەتى بولىپ تابىلادى. ەلباسىنىڭ ساياساتى ارقاسىندا تۇرعىنداردىڭ الەۋمەتتىك جاعدايى جىل سايىن جاقسارىپ كەلەدى. وسى سەكىلدى سوڭعى ەكى جىلدا قۇنى 2 ميلليارد تەڭگە بولاتىن 5 جوبانى جۇزەگە اسىردىق. ىرساي اۋىلىنا اۋىز سۋ قۇبىرىن تارتۋ ساپالى اتقارىلدى, ونى جاساعان كاسىپورىندار مەن ماماندارعا العىس ايتامىن» دەدى ارحيمەد بەگەجان ۇلى.
اۋىل تۇرعىندارى وسىنداي مۇمكىندىكتەر جاساعانى ءۇشىن ەلباسى نۇرسۇلتان نازارباەۆقا دەگەن العىسىن, قۋانىشتارىن وبلىس اكىمىنە جەتكىزدى.
ءنازيرا جارىمبەت
«ەگەمەن قازاقستان»
قوستاناي وبلىسى,
جىتىقارا اۋدانى