وتكەن ءساۋىر ايىندا اقتوبە وبلىستىق اكىمدىگى, فارماتسەۆتيكالىق قىزمەتتى قولداۋ مەن دامىتۋ قاۋىمداستىعى سونىمەن بىرگە مەديتسينالىق جانە فارماتسەۆتيكالىق قىزمەتتى باقىلاۋ دەپارتامەنتى اراسىندا ءدارى-دارمەكتىڭ 106 ءتۇرىنىڭ باعاسىن وسىرمەۋ جونىندەگى ءۇش جاقتى مەموراندۋمگە قول قويعان بولاتىن.
الايدا ءدال قازىرگى كۇنى وڭىردەگى مەموراندۋم اياسىنا كىرەتىن ءدارىحانالاردا اتالعان كەلىسىم تالاتارى ساقتالماي كەلگەنى بەلگىلى بولىپ وتىر. بۇعان دەيىنگى جۇرگىزىلگەن تەكسەرۋلەر كەزىندە باعا مەموراندۋمدە كورسەتىلگەن مقشلەردەن, ياعني وسىندا قويىلعان تومەنگى شەكتىك باعادان 5-200 تەڭگەگە دەيىن جوعارى ەكەنى انىقتالعان. مۇنداي كورىنىس مۇدەلى ۇيىمدار تاراپىنان مەموراندۋمدە كورسەتىلگەن تالاپتار مەن باعا كورسەتكىشتەرىن قاداعالاۋ دەڭگەيى تومەن ءارى جەتكىلىكسىز بولىپ كەلگەنىن كورسەتسە كەرەك. سونداي-اق بۇل ىستە جۇرتشىلىق پەن ءماسليحات دەپۋتاتتارى دا بەلسەندىلىك تانىتا قويماعان سىڭايلى. اتالعان ءجايتتىڭ وزەكتى ەكەنى انىق. سوندىقتان دا كەلىسىمنىڭ اياقسىز قالۋىنا بايلانىستى ماسەلە وبلىس اكىمدىگىندە دارىلىك زاتتار باعاسىن وسىرمەۋگە قاتىستى ارنايى جيىننىڭ وتكىزىلۋىنە تۇرتكى بولعانىن ايتا كەتكىمىز كەلەدى.
وبلىس اكىمدىگىنىڭ ءباسپاسوز قىزمەتى تاراتقان اقپاراتقا سۇيەنسەك, ءوڭىر تۇرعىندارى ءدارىحانادا ەڭ قاجەتتى دەلىنەتىن دارىلىك زاتتاردىڭ جەتپەيتىنى جونىندە شاعىمدار جاساعان. ءتىپتى وزگەسىن ايتپاعاندا وكسالين مايى سەكىلدى كەڭ تاراعان دارىلىك زاتتى دا ءدارىحانالاردان تاۋىپ, ساتىپ الۋ قيىندىق كەلتىرىپتى. ايتسە دە كەيىننەن انىقتالعانداي اتالعان دارىلىك زاتتىڭ تاپشىلىعى تۇماۋدىڭ پايدا بولىپ, ەتەك الۋىمەن بايلانىستى بولىپتى. تۇپتەي كەلەندە بۇل كورىنىستىڭ ءوزى ءدارى-دارمەك بيزنەسىنىڭ باسى-قاسىندا جۇرگەندەر مەن ءدارىحانا يەلەرىنىڭ بولۋى مۇمكىن وقيعانىڭ الدىن الۋعا ەرتەرەك قام-قارەكەت جاساماعانىن اڭعارتىپ تۇرعانداي.
ءسوز سوڭىندا وڭىردە وكىلەتتى ۇيىمدار مەن جۇرتشىلىق تاراپىنان ءدارى-دارمەك باعاسىن باقىلاۋ مەن قاداعالاۋ جۇمىستارى قايتا جاڭعىرادى, ءارى قايتا جاندانادى دەپ سەنىم ارتقىمىز كەلەدى. ويتكەنى ونىڭ نەگىزسىز وسپەۋى اركىمگە دە ءتيىمدى ەكەنى ايتپاسا دا بەلگىلى عوي. ءبىز بۇگىن تەك ءتيىستى كەلىسىم جاسالعان ءارى سوعان سايكەس سانى شەكتەۋلى ءدارىحانالاردا ساتىلاتىن ءدارى تۇرلەرىنە قاتىستى عانا اڭگىمە قوزعادىق. ال بۇدان تىس دارىحانالارداعى باعا جوعارىدا اتالعاندارى مەن دارىلىك زاتتىردىڭ 106 تۇرىنەن وزگەلەرىنىڭ باعاسى تىپتەن اسپانداپ كەتپەسىنە كىم كەپىل؟ بۇل ءسىرا وزگە ءبىر ارنايى تاقىرىپتىڭ ەنشىسىنە كىرسە كەرەك.
تەمىر قۇسايىن
"ەگەمەن قازاقستان"