«نۇر وتان» پارتياسى ساياسي كەڭەسىنىڭ كەڭەيتىلگەن وتىرىسىندا ەلباسى – پارتيا توراعاسى نۇرسۇلتان نازارباەۆ پارتيا قىزمەتىن جاڭعىرتۋ جانە ونىڭ ساياسي جۇمىسىنا جاڭا ۇلگىلەر مەن ادىستەردى قولدانۋ جونىندە ناقتى تاپسىرمالار بەرگەن بولاتىن. بۇل ورايدا ەلباسى جاڭعىرۋدىڭ 2017 جىلى جاريالانعان ءۇش باعدارلاماسىن ىسكە اسىرۋ بارىسىندا «نۇر وتان» پارتياسىنىڭ ءرولىن ايقىن ءارى انىق ءتۇسىنۋ, باعدارلامالاردى جۇزەگە اسىرۋعا لايىقتى اتسالىسۋ ءۇشىن پارتيا ءوز جۇمىسىن وزگەرتۋدىڭ ناقتى جولدارىن تابۋى ءتيىس ەكەنىن اتاپ ءوتتى. ەلباسى, پارتيا توراعاسىنىڭ تاپسىرماسى قالاي ورىندالۋدا؟
وڭتۇستىك قازاقستان وبلىسىندا بىرقاتار كەزدەسۋلەر وتكىزگەن «نۇر وتان» پارتياسىنىڭ حاتشىسى عابيدوللا ءابدىراحىموۆ ساپارىنىڭ نەگىزگى ماقساتى دا ەلباسى تاپسىرمالارىنىڭ ساپالى ءارى مەرزىمىندە ورىندالۋىنا جەرگىلىكتى ساياسي ۇيىم مۇشەلەرىنىڭ نازارىن اۋدارۋ بولاتىن. سونداي-اق حاتشى پارتيانىڭ وبلىستىق فيليالىنىڭ ءماجىلىس زالىندا پارتيا اكتيۆىمەن جيىن وتكىزىپ, نۇروتاندىقتاردىڭ باستى ماقساتتارىنىڭ ءبىرى حالىققا جاقىن بولۋ, ەلدىڭ مۇڭ-مۇقتاجىن تىڭداپ, ونىڭ شەشىلۋىنە ىقپال جاساۋ ەكەنىن ەسكە سالدى. جيىن بارىسىندا وڭىردە مەملەكەتتىك باعدارلامالاردىڭ ورىندالۋى بويىنشا وبلىستىق ءبىلىم باسقارماسىنىڭ باسشىسى يساتاي ساعىندىقوۆ, دەنساۋلىق ساقتاۋ باسقارماسىنىڭ باسشىسى مۇقان ەگىزباەۆ, جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى مۇحيت وتارشيەۆ جانە قۇرىلىس باسقارماسىنىڭ باسشىسى قۇتتىبەك جاماشەۆ حابارلاما جاسادى.
جىل باسىنان بەرگى 11 ايدا وڭتۇستىك قازاقستان وبلىسىنىڭ ماكروەكونوميكالىق كورسەتكىشتەرىندە وڭ سەرپىن بايقالۋدا. ونەركاسىپ ءونىمىنىڭ كولەمى 773,5 ميلليارد تەڭگەنى نەمەسە وتكەن جىلدىڭ ءتيىستى كەزەڭىمەن سالىستىرعاندا 102 پايىزدى قۇراعان. وڭدەۋ ونەركاسىبىندە, اۋىل شارۋاشىلىعىنىڭ جالپى ءونىم كولەمىندە ايتارلىقتاي ءوسىم بار. جۇمىس ىستەپ تۇرعان شاعىن جانە ورتا كاسىپكەرلىك سۋبەكتىلەرىنىڭ سانى 179 704 بىرلىككە جەتىپ, وتكەن جىلدىڭ ءتيىستى كەزەڭىمەن سالىستىرعاندا 106,3 پايىز بولعان. جىل باسىنان بەرى 72 943 جاڭا جۇمىس ورنى اشىلدى. «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسى» اياسىندا 1 جەلتوقسانعا دەيىن 86 950 ادام قامتىلىپ, جىلدىق جوسپار 135,2 پايىزعا ورىندالعان.
باسقارما باسشىلارىنىڭ باياندامالارىنان كەيىن ءبىلىم, دەنساۋلىق, جۇمىسپەن قامتۋ, قۇرىلىس سالالارىنداعى وزەكتى ماسەلەلەر تالقىعا سالىندى. بايانداماشىلارعا پارتيا بەلسەندىلەرى تاراپىنان ساۋالدار قويىلىپ, ۇسىنىستار ايتىلدى. جيىندا پارتيا حاتشىسى وڭىردەگى ءۇش اۋىسىمدى جانە عيماراتى اپاتتى جاعدايدا تۇرعان مەكتەپتەردىڭ سانىن ازايتۋ, ۇلتتىق بىرىڭعاي تەستىلەۋدەگى ناتيجەنى جوعارىلاتۋ بويىنشا اتقارىلىپ جاتقان جۇمىستار بارىسىن سۇرادى. حالىقتى جۇمىسپەن قامتۋ باعدارلاماسىن جۇزەگە اسىرۋدا سىبايلاس جەمقورلىقتىڭ الدىن الۋ بويىنشا ۇسىنىستارىن ايتتى. ءماجىلىس سوڭىندا پارتيا حاتشىسى تاۋەلسىزدىك كۇنى مەرەكەسىنە وراي بىرقاتار ازاماتتارعا «نۇر وتان» پارتياسىنىڭ «بەلسەندى قىزمەتى ءۇشىن» ومىراۋ بەلگىسىن جانە پارتيانىڭ قۇرمەت گراموتاسىن تابىس ەتتى.
سونداي-اق ع.ءابدىراحىموۆ م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىندە وبلىستاعى جاستار ۇيىمدارىنىڭ كوشباسشىلارىمەن, «جاس وتان» ۇيىمىنىڭ توراعالارىمەن كەزدەستى. كەزدەسۋ بارىسىندا «نۇر وتان» پارتياسى قاتارىندا 185 مىڭ جاس ازامات بار ەكەنى, بۇل بارلىق پارتيا مۇشەلەرىنىڭ 18 پايىزىن قۇرايتىنى ايتىلدى. تەك بيىلدىڭ وزىندە 84 مىڭنان استام جاس قازاقستاندىق «نۇر وتان» مۇشەسى اتانىپتى. وتكەن جىلى ەلباسىنىڭ تىكەلەي تاپسىرماسى بويىنشا پارتيا ۇلتتىق بىرىڭعاي تەستىلەۋگە قاتىسپاعان جانە سىناقتان سۇرىنگەن 52 مىڭنان استام تۇلەككە قولداۋ كورسەتىپ, ولاردىڭ جۇمىسقا ورنالاسۋىنا نەمەسە كاسىبي ءبىلىم الۋىنا جاعداي جاساعان. بيىل ءدال وسىنداي 55 مىڭ مەكتەپ ءبىتىرۋشى پارتيانىڭ قامقورلىعىنا الىندى. وبلىستىق جانە ايماقتىق فيليال باسشىلارى الداعى ۋاقىتتا بۇل جۇمىستى جاڭا فورماتتا جالعاستىرۋى ءتيىس. سونداي-اق كەزدەسۋدە ستۋدەنتتەردىڭ ءبىلىم الۋ بارىسىندا كەزدەسەتىن ماسەلەلەر, جاستار ۇيىمىنىڭ جۇمىسى, پارتيانىڭ جاڭا باعىتتارى, جاستاردى جۇمىسقا ورنالاستىرۋ, شەتەلدە ءبىلىم الۋ, «بولاشاق» باعدارلاماسىمەن ءبىلىم العان تۇلەكتەردىڭ جاعدايىنا قاتىستى ماسەلەلەر ورتاعا سالىندى.
عالىمجان ەلشىباي, «ەگەمەن قازاقستان»