قاسيەتتى تۇركىستاندا ورنالاسقان قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ ۇيىمداستىرۋىمەن ۇستىمىزدەگى جىلدىڭ قازان ايىنىڭ 18-20 كۇندەرى ارالىعىندا «جويىلۋ قاۋپى بار تۇركى تىلدەرى» اتتى VII حالىقارالىق تۇركولوگيا كونگرەسى وتكەنى بەلگىلى. الەمنىڭ جانە وتانىمىزدىڭ تۇكپىر-تۇكپىرىنەن ارنايى شاقىرىلعان تۇركىتانۋشى عالىمدار تاعى دا باس قوسىپ, تۇركولوگياعا قاتىستى ماڭىزدى ماسەلەلەردى تالقىلاپ, سونىڭ ىشىندە جويىلۋ قاۋپى بار تۇركى تىلدەرىنىڭ بۇگىنى مەن بولاشاعىنا قاتىستى جانە ولاردى ساقتاپ قالۋدىڭ جولدارىن قاراستىرعان مامىلەلى ءماسليحاتتا وزدەرىنىڭ قۇندى وي-پىكىرلەرىمەن ءبولىستى.
كونگرەسس بارىسىندا كەلەلى تاقىرىپتارعا نەگىزدەلگەن اۋقىمدى باياندامالار تىڭدالىپ, تالقىلانۋمەن بىرگە قازىرگى زامانعى تۇركولوگيانىڭ جەتىستىكتەرىن پاش ەتەتىن كىتاپ كورمەسى ۇيىمداستىرىلىپ, جاڭا عىلىمي ەڭبەكتەردىڭ تۇساۋى دا كەسىلدى. سونداي كىتاپتاردىڭ ءبىرى ءھام بىرەگەيى بەلگىلى تۇركولوگ عالىمدارىمىز, فيلولوگيا عىلىمدارىنىڭ دوكتورلارى, پروفەسسورلار جانسەيىت تۇيمەباەۆتىڭ, ماعريپا ەسكەەۆانىڭ, گۇلعايشا ساعيدولدانىڭ «تۇركىتانۋ سەرياسى» بويىنشا باسپادان شىققان 8 تومدىق عىلىمي زەرتتەۋ ەڭبەكتەرىن ەرەكشە اتاۋعا بولادى. اتالمىش كوپ تومدىقتىڭ ءبىرى «ماڭگىلىك ەل» يدەياسىن دامىتۋدىڭ لينگيۆيستيكالىق نەگىزى» دەپ اتالىنعان. وندا «ماڭگىلىك ەل» يدەياسىنىڭ رۋحاني ۇلى ماقسات-مۇراتتارىن ىسكە اسىرۋدىڭ نەگىزگى تەتىكتەرىنىڭ ءبىرى – گۋمانيتارلىق پاندەردىڭ كوكجيەگىن كەڭەيتىپ, سونىڭ ىشىندە جالپى تۇركىلىك رۋحاني قۇندىلىقتاردى ساقتاۋعا, جاڭعىرتۋعا, سونى عىلىمي اينالىمعا ءتۇسىرۋدىڭ, ولاردى كەشەندى تۇردە تالداۋدىڭ لينگۆيستيكالىق مۇمكىندىكتەرى قاراستىرىلعان. ماسەلەنكي, سولاردىڭ قاتارىندا كونە تۇركى جازبا ەسكەرتكىشتەرى تىلىندەگى Bengu El يدەياسى, وسى يدەيانى جاڭعىرتۋدىڭ لەكسيكوگرافيالىق نەگىزدەرى, تۇركى تىلدەرىن سالىستىرا زەرتتەۋدىڭ ورتاق رۋحانياتتى جاڭعىرتۋ قۇرالى ەكەندىگىنە قاتىستى جان-جاقتى, تەرەڭ تالداۋلار بار.
ج.تۇيمەباەۆ پەن گ.ساعيدولدانىڭ بىرلەسىپ جازعان «قازاق جانە تۇركى تىلدەرىنىڭ سالىستىرمالى-سيپاتتامالى گرامماتيكاسى», «التايستيكانىڭ تاريحي لينگۆيستيكالىق نەگىزى», «قازاق جانە تاتار تىلدەرىنىڭ سالىستىرمالى-سيپاتتامالى گرامماتيكاسى», ج.تۇيمەباەۆ پەن م.ەسكەەۆانىڭ جازعان «تۇركىتانۋدىڭ تاريحي-لينگۆيستيكالىق نەگىزدەرى», «كونە تۇركى جازبا ەسكەرتكىشتەرى ءتىلىنىڭ مورفولوگيالىق جۇيەسى» جانە دە ءۇش اۆتوردىڭ ورتاق قولتاڭباسى قالعان «تۇركى تىلدەرىنىڭ سالىستىرمالى-تاريحي گرامماتيكاسى» اتتى عىلىمي ەڭبەكتەرىنىڭ قازىرگى تۇركولوگيادا الاتىن ورنى ايرىقشا دەر ەدىك. ويتكەنى تۇركولوگيانىڭ ەڭ قاجەتتى, وتكىر ءبىر سالاسى تۇركى تىلدەرى لينگۆيستيكاسىن بۇلايشا اشىپ تالداپ, جەكە-جەكە زەرتتەۋ نىسانىنا اينالدىرعان عالىمداردىڭ ەڭبەكتەرى كەمدە-كەم. تۇركى تىلدەرىن تاريحي-فونەتيكالىق, مورفولوگيالىق, گرامماتيكالىق تۇرعىدان سالىستىرا زەرتتەۋ كەشەندى, كەمەل ءىس دەر ەدىك. سول سەبەپتى وسى ەڭبەكتەردىڭ عىلىمي تەوريالىق, پراكتيكالىق ماڭىزى وتە زور بولماق.
وتاندىق تۇركولوگيا سالاسىندا ءتىل ماماندارى ءۇشىن تاپتىرمايتىن قۇندى دا باعالى عىلىمي ەڭبەكتەردىڭ جارىققا شىعۋى – ۇلكەن تابىس ءارى مەرەي! ەلباسىنىڭ باستاماسىمەن ەلىمىزدە كەڭ ءورىس الىپ جاتقان رۋحاني جاڭعىرۋ باعدارلاماسى نەگىزىندە اتقارىلار ۇشان-تەڭىز ءىستىڭ تولايىم جەتىستىكتەرى مول بولىپ, ءتۇبى ءبىر تۇركىنىڭ رۋحاني دۇنيەسى وسىلايشا تۇگەندەلە بەرسىن! – دەگەن ىزگى تىلەگىمدى جەتكىزگىم كەلدى.
راۋشانگۇل اۆاكوۆا, فيلولوگيا عىلىمدارىنىڭ دوكتورى, ءال-فارابي اتىنداعى قازۇۋ پروفەسسورى