اگەنتتىكتىڭ حابارلاۋىنشا, سي تسزينپين رەسميلىك ءۇشىن رەسمي بولۋدى, وڭىرلىك مەكەمەلەردەگى بيۋروكراتيانى, شالقىپ ءومىر ءسۇرۋدى, ىسىراپشىلدىقتى ايىپتاپ, وسىنداي ومىرگە ۇمتىلاتىن شەنەۋنىكتەردى ايامايتىنىن جەتكىزگەن.
ماسەلەن, كەيبىر شەنەۋنىكتەر زەرتتەۋ جانە تەكسەرۋ جۇمىستارىن ءاتۇستى جۇرگىزەدى. پارتيا مەن مەملەكەتتىك مەكەمەلەردىڭ كەيبىر وكىلدەرى جانە ولاردىڭ جۇمىسشىلارى قوعامعا پايدالى جۇمىس ىستەپ جۇرگەندەي كورىنەدى, الايدا ولاردىڭ ارەكەتىنىڭ يگىلىگىن حالىق كورمەيدى. مەملەكەتتىك قىزمەتكەرلەردىڭ اراسىندا ەكىجۇزدىلەردىڭ بولۋى دا قىتاي توراعاسىنا ۇناماعان كورىنەدى. سونداي-اق سي تسزينپين پارتيا مەن مەملەكەتتىك مەكەمەلەردىڭ كەيبىر وكىلدەرى ءبىر-بىرىنە ۇقساس جيىنداردى ءجيى وتكىزىپ, وندا شىعارىلعان شەشىمدى ورىنداۋعا اسىقپاعانىن دا سىناعان.
سونداي-اق «اسپاناستى ەلىنىڭ» باسشىسى وڭىرلەردەگى مەملەكەتتىك قىزمەتكەرلەر مەن لاۋازىمدى تۇلعالاردىڭ كەمشىلىگىنە توقتالىپتى. سي ءتسزينپيننىڭ ايتۋىنشا, وڭىردەگى مەملەكەتتىك قىزمەتكەرلەر ءبىر-ءبىرىنىڭ قۇجاتتارىن اينا-قاتەسىز كوشىرىپ الادى. تۇرعىنداردىڭ قاجەتتىلىگىن نازارعا ىلمەي, لاۋازىمدى تۇلعاعا ۇناۋ ماقساتىندا جۇمىس ىستەيتىندەر دە تابىلادى. كەيبىرى جارناماعا كوڭىل ءبولىپ, جۇمىستىڭ تيىمدىلىگىن ەسكەرمەيتىن كورىنەدى. بىلگەنىن جوعارىدان جاسىرىپ, جاعداي قيىنداعانشا قول قۋسىرىپ وتىراتىن وڭىرلەردەگى لاۋازىمدى تۇلعالار دا قىتاي باسشىسىنىڭ سىن ساداعىنا ىلىنگەن. بۇدان بولەك, سي تسزينپين ءوز قىزمەتىن دۇرىس اتقارماي, تاپسىرىلعان مىندەتتى قول استىنداعىلارعا بەرەتىندەر مەن جوعارىنىڭ بۇيرىعىن كۇتىپ وتىراتىندارعا شارا قاراستىرىلاتىنىن جەتكىزگەن.
The Guardian: ءيزرايلدىڭ ارەكەتىن قولدامايدى
The Guardian گازەتى ەۋروپا مەملەكەتتەرى ب.نەتانياحۋدىڭ ۇسىنىسىن قولداماعانىن حابارلادى. باسىلىمنىڭ سوزىنە سۇيەنسەك, وداققا مۇشە ەلدەردىڭ وكىلدەرى بۇل قادام تاياۋ شىعىستاعى جاعدايدى شيەلەنىستىرىپ, تۇراقسىزدىققا اكەلىپ سوعاتىنىن العا تارتىپ وتىر. سونداي-اق اعىلشىن گازەتى اقش پرەزيدەنتى دونالد ترامپتىڭ يەرۋساليمدى ءيزرايلدىڭ استاناسى دەپ مالىمدەۋى پالەستينا مەن يزرايل اراسىنداعى شيەلەنىستى ودان ءارى قيىنداتىپ جىبەرگەنىن جازادى.
ماسەلەن, ءيزرايلدىڭ ەڭ جاقىن ارىپتەسى سانالاتىن چەحيا تاراپى ەۋروپالىق وداق كەڭەسىنىڭ وتىرىسىنان كەيىن د.ترامپتىڭ مالىمدەمەسى ايماقتاعى بەيبىتشىلىك ارەكەتتەرىنە كەرى اسەرىن تيگىزەتىنىن جەتكىزگەن. فرانتسيا سىرتقى ىستەر ءمينيسترى جان-يۆ لە دريان قۇدىس ماسەلەسى پالەستينا مەن يزرايل تاراپىنىڭ ورتاق كەلىسىمى ناتيجەسىندە عانا شەشىلەتىنىن ايتقان-دى. كەڭەس وتىرىسىنان كەيىن ب.نەتانياحۋمەن كەزدەسكەن فرانتسيا پرەزيدەنتى ەممانۋەل ماكرون دا يەرۋساليمدى يزرايل استاناسى دەپ تانۋ بەيبىتشىلىككە نۇقسان كەلتىرەتىنىن جانە ءوز ەلىنىڭ وعان قارسى ەكەنىن ءسوز ەتتى.
ەۋروپا وداعىنىڭ سىرتقى ساياسات جونىندەگى وكىلى فەدەريكا موگەريني ۇيىمنىڭ شاھار جونىندەگى حالىقارالىق كونسەنسۋستى قولدايتىنىن, پالەستينالىقتار مەن ەۆرەيلەر قالا مارتەبەسى جونىندە ورتاق كەلىسىمگە كەلمەي, ءوز ۇستانىمىن وزگەرتپەيتىنىن مالىمدەگەن.
يەرۋساليمنىڭ قۇقىقتىق مارتەبەسى ماسەلەسىنە بايلانىستى تاياۋدا بۇۇ قاۋىپسىزدىك كەڭەسىندە كەزەكتەن تىس جينالىس ءوتتى. وتىرىسقا قازاقستان دەلەگاتسياسى دا قاتىستى. كەزدەسۋ بارىسىندا بۇۇ باس حاتشىسىنىڭ تاياۋ شىعىستاعى ارنايى وكىلى نيكولاي ملادەنوۆ بايانداما جاسادى.
قازاقستاننىڭ بۇۇ-نىڭ جانىنداعى تۇراقتى وكىلى قايرات وماروۆ ەلىمىزدىڭ تاياۋ شىعىس داعدارىسىنا قاتىستى ۇستانىمى انىق جانە وزگەرىسسىز ەكەندىگىن جەتكىزدى. ق.وماروۆتىڭ ايتۋىنشا, قازاقستان تاراپتار اراسىنداعى كەلىسسوزدەردىڭ ەكىجاقتى پىشىمدە العىشارتسىز وتكىزىلۋىن قولدايدى. سونداي-اق ق.وماروۆ 1967 جىلعى كەلىسىمگە ساي پالەستينا استاناسى شىعىس يەرۋساليم ەكەنىن جانە پالەستينا مەملەكەتىن قۇرۋ قۇقىعىن تولىقتاي قولدادى.
BBC: ۆەنەسۋەلاداعى جاعداي تۇراقسىز
BBC-ءدىڭ مالىمەتىنە سۇيەنسەك, ن.مادۋرو وتكەن جەكسەنبىدەگى الدىن الا داۋىس بەرۋگە قاتىسقان پارتيالار عانا 2018 جىلعى سايلاۋعا قاتىسۋعا قۇقىلى ەكەنىن ءسوز ەتكەن. ارنانىڭ حابارلاۋىنشا, Justice First, Popular Will جانە Democratic Action پارتياسى سايلاۋ جۇيەسى ادىلەتسىز ەكەنىن العا تارتىپ, جەكسەنبىدەگى داۋىس بەرۋگە بويكوت جاريالاعان ەكەن. الايدا ن.مادۋرو بۇل پىكىرمەن كەلىسپەيتىنىن جەتكىزىپ, وپپوزيتسيالىق پارتيالار «ساياسي كارتادان جوعالىپ كەتتى» دەپ مالىمدەگەن.
جوعارىدا اتالعان پارتيالار الدىن الا داۋىس بەرۋگە بويكوت جاريالايتىنىن قازان ايىندا حابارلاعان. ولاردىڭ پىكىرىنشە, ۆەنەسۋەلاداعى سايلاۋ جۇيەسى ن.مادۋرونى قولداۋعا عانا ارنالعان. جەكسەنبىدەگى داۋىس بەرۋگە ەلەكتوراتتىڭ 47 پايىزى قاتىسىپ, سونىڭ كوپ بولىگى قازىرگى پرەزيدەنتتى جاقتاپ داۋىس بەردى.
BBC-ءدىڭ لاتىن امەريكاسىنداعى ءجۋرناليسى كەتي ۆاتتستىڭ پىكىرىنشە, ن.مادۋرونىڭ ءسوزى ارانداتۋشىلىقپەن تەڭ. ءتىلشى ەلدەگى ەكونوميكالىق داعدارىستىڭ كەسىرىنەن پرەزيدەنت حالىق الدىنداعى ابىرويىنان ايىرىلا باستاعانىن ايتادى. سوندىقتان ن.مادۋرو ساياسات ساحناسىنداعى قارسىلاستارىنىڭ كوزىن قۇرتۋدى ماقسات ەتىپ وتىر. ناتيجەسىندە, بىرقاتار وپپوزيتسيا وكىلدەرىن تۇرمەگە توعىتقان. ك.ۆاتتس قازىرگى تاڭدا حالىقتىڭ پىكىرى ەكىگە جارىلعانىن ايتادى. ءبىرى – قازىرگى پرەزيدەنت ن.مادۋرونى قولداسا, كەلەسىسى, ونىڭ تاقتان تايعانىن قالايدى. ءجۋرناليستىڭ سوزىنە سۇيەنسەك, ەلدەگى جاعداي ءالى دە تۇراقسىز.
شولۋدى ازىرلەگەن اباي اسانكەلدى ۇلى, «ەگەمەن قازاقستان»