بۇگىن جامبىل وبلىسىنىڭ ايشا ءبيبى اۋىلىندا گاز ينفراقۇرىلىمىنىڭ جاڭا نىسانى پايدالانۋعا بەرىلدى, ول «قازاقستان - قىتاي» گاز ماگيسترالىنىڭ ونىمدىلىگىن ارتتىرۋعا سەپتىگىن تيگىزەدى, دەپ حابارلايدى وبلىس اكىمدىگىنىڭ ءباسپاسوز قىزمەتى.
№3 كومپرەسسور ستانساسىن «قازمۇنايگاز» اق ۇلتتىق كومپانياسى ىسكە قوسقان. ول - «س» ماگيسترالدى گاز قۇبىرىنىڭ جوسپارداعى سەگىز كومپرەسسور ستانساسىنىڭ ءبىرى. ينۆەستيتسيالىق جوبانىڭ قۇرىلىسى مەن پايدالانىلۋىن «قازترانسگاز» اق پەن «Trans-Asia Gas Pipeline Co. Ltd-نىڭ» بىرلەسكەن ەنشىلەس كاسىپورنى - «ازيا گاز قۇبىرى» جشس جۇزەگە اسىرىپ وتىر. جوبا جىلىنا «س» گاز قۇبىرىنىڭ قۋاتىن جىلىنا 25 ملرد تەكشە مەترگە دەيىن جەتكىزۋ, سونداي-اق پروتسەستى اپتاسىنا 7 كۇن, تاۋلىگىنە 24 ساعات ۇزدىكسىز جۇرگىزۋ مۇمكىندىگىن بەرەدى. «قازاقستان - قىتاي» گاز قۇبىرىنىڭ كومپرەسسور ستانساسىن ىسكە قوسۋعا ارنالعان سالتاناتتى شاراعا جامبىل وبلىسىنىڭ اكىمى كارىم كوكىرەكباەۆ قاتىستى. ءوڭىر باسشىسى وسى اتالعان جوبا ايماق ەكونوميكاسىندا ايرىقشا دا ەرەكشە مانگە يە ەكەندىگىن اتاپ كورسەتتى.
«بۇگىن, تاۋەلسىزدىك كۇنى مەرەكەسى قارساڭىندا «ازيا گاز قۇبىرى» كومپانياسى جامبىل وبلىسىندا كەزەكتى گاز كومپرەسسور ستانساسىن ىسكە قوسىپ وتىر. جىلىنا ول ارقىلى وتەتىن 25 ميلليارد تەكشە مەتر گازدىڭ 5 ميلليارد تەكشەسى ەكسپورتقا شىعارىلادى. «بەينەۋ - بوزوي - شىمكەنت» ماگيسترالدى گاز قۇبىرىن ىسكە قوسۋ ارقىلى «كوگىلدىر وتىن» تاسىمالداۋعا تاۋەلدىلىكتەن دە ارىلامىز ءارى گازدىڭ قالعان بولىگىن ەكسپورتتاۋ مۇمكىندىگىنە دە يە بولامىز. كەلەر جىلى «وتار اگبس-نىڭ» جوبا-سمەتالىق قۇجاتتارى دايىن بولىپ, سول جەلى ارقىلى مويىنقۇم اۋدانىنىڭ توعىز ەلدى مەكەنىن گازبەن قامتۋ جوسپارلانۋدا. قورداي اۋدانىنىڭ تاۋلى اۋماقتاعى 12 اۋىلى «س» جەلىسى بويىنشا گازبەن قامتىلادى», - دەدى ءوڭىر باسشىسى.
ستانسا ساعاتىنا 567 مىڭ تەكشە مەتر گاز وتكىزە الادى. «گاز ينفراقۇرىلىمىنىڭ جاڭا نىسانى قازاقستاننىڭ ترانزيتتىك مۇمكىندىكتەرىن كەڭەيتەدى. «قازاقستان - قىتاي» ماگيسترالىندا تاعى ءبىر قۋاتتى كومپرەسسور ستانساسىنىڭ ىسكە قوسىلۋى وتاندىق گاز تاسىمالداۋ جۇيەسىن جەتىلدىرۋ بويىنشا جاسالعان نىق قادامداردىڭ ءبىرى بولدى», - دەدى كارىم كوكىرەكباەۆ.