وڭتۇستىك قازاقستان وبلىسىندا مەملەكەتتىك «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسى» قارقىندى جۇزەگە اسىپ كەلەدى.
اتالعان باعدارلاما اياسىندا وڭىردە وبلىس اكىمدىگىنىڭ ء«ار اۋىلعا ءوز شەبەرى» جوباسى قولعا الىنعان بولاتىن. سونىڭ ناتيجەسىندە ءاربىر اۋداندا قاجەتتى دەگەن سالالارعا ماماندار دايارلانۋدا.
ماسەلەن, قازىرگى تاڭدا سارىاعاش اۋدانىندا 400-دەن استام تۇرعىن 10 ءتۇرلى ماماندىقتى يگەرگەن. ولاردىڭ اراسىندا تەمىر جانە اعاش ۇستاسى, سانتەحنيك, ەلەكتريك, تىگىنشى سىندى سۇرانىسقا يە ماماندار بار. جاڭا كاسىپ يەلەرىنە كۋالىكتەر سالتاناتتى تۇردە تاپسىرىلدى.
سونداي-اق, اۋداندا تۇلەكتەرگە ارنالىپ جارمەڭكە ۇيىمداستىرىلدى. وعان 60-تان استام جۇمىس بەرۋشى قاتىسىپ, 250-گە جۋىق جۇمىس ورنى ۇسىنىلعان. ايتا كەتەتىنى, اتالعان باعدارلاما اياسىندا اۋداننان 1500-دەن استام ادام قىسقا مەرزىمدى وقۋ كۋرسىنا جولدانىپتى. ولار ء«ار اۋىلعا ءوز شەبەرى» جوباسى اياسىندا اۋدانعا قاجەتتى دەگەن 38 ماماندىقتى يگەرگەن.
بۇدان بولەك, وڭتۇستىك قازاقستان وبلىسىندا ارنايى باعدارلاما اياسىندا 12 مىڭنان استام ادام قىسقا مەرزىمدى وقىتۋ كۋرستارىنا جولدانىپ, بۇگىندە ونىڭ 9 مىڭعا جۋىعى ماماندىق يەسى اتانعان. وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ مالىمدەۋىنشە, بۇگىنگى تاڭدا ەڭبەك نارىعىنا اسا قاجەتتى دەگەن 85 ماماندىق بويىنشا ارنايى ءبىلىم العان كاسىپ يەلەرى جۇمىسپەن قامتىلىپ وتىر.