بۇگىنگى كۇنى باسپانا ماسەلەسىن تۇبەگەيلى شەشۋدىڭ وڭتايلى جولدارىنىڭ ءبىرى – جالدامالى كوممۋنالدىق تۇرعىن ۇيلەر بولىپ وتىر. وسىنى ەسكەرگەن اقتوبە وبلىسىنىڭ اكىمدىگى بۇل ماسەلەگە باسىمدىق بەرگەندى ءجون كورەدى.
سونىڭ ناتيجەسىندە بۇگىندە اقتوبە قالاسىندا جانە وبلىستىڭ بارلىق اۋداندارىندا جالدامالى كوممۋنالدىق تۇرعىن ۇيلەر قۇرىلىسى قىزۋ قارقىن الىپ كەلەدى. ونىڭ ءورىسى اسىرەسە العا قالاسىندا وتە كەڭ دەۋگە بولادى.
بيىل مۇندا وسىنداي باعىتتاعى 136 پاتەرلى ءۇش تۇرعىن ءۇيدى پايدالانۋعا بەرۋ كوزدەلگەن بولسا, قازىرگى كۇنى ونىڭ العاشقى لەگىنە تۇرعىندار قونىستانا باستادى. سىڭعىرلاعان سۋ جاڭا پاتەر كىلتتەرىنە يە بولعانداردىڭ باسىم بولىگىن كوپ بالالى جانە از قامتىلعان وتباسىلار, سونداي-اق بيۋدجەتتىك سالا قىزمەتكەرلەرى قۇرايدى. سولاردىڭ ءبىرى كوپ بالالى انا اققايشا قۇلماعامبەتوۆا ءوزىنىڭ كوتەرىڭكى كوڭىل كۇيىن «Egemen.kz» تىلشىسىنە بىلايشا جەتكىزدى.
- وزگە بىرەۋدىڭ جەكەمەنشىگىندەگى ءۇيدى جالداپ تۇرۋ – اقشانى بوستان-بوس ايدالاعا شاشۋمەن بىردەي. ال جالدامالى كوممۋنالدىق تۇرعىن-ءۇي جاعدايىندا الداعى ۋاقىتتا ءوزىڭنىڭ يەلىگىڭە كوشەتىن باسپانا ءۇشىن قاراجات تولەيسىڭ. ەكەۋىنىڭ ءبىراز ايىرماشىلىعى بار. ءبىزدىڭ كوپ بالالى وتباسى ءۇشىن كوممۋنالدىق پاتەر وتە ىڭعايلى. ونىڭ كىلتى قولىمىزعا ءتيىپ, قۋانىش قۇشاعىندا ءجۇرمىز. وسى ۇلكەن ءىستىڭ ىڭعايىن كەلتىرە بىلگەن ازاماتتارعا ايتار العىسىمىز شەكسىز. مۇنىڭ ءبارى بىرىنىشىدەن ەگەمەن ەل بولعانىمىزدىڭ ارقاسى دەپ تۇسىنەمىن.
تاۋەلسىزدىك مەرەكەسى كۇندەرى جانە جاڭا جىل قارساڭىندا العادا قونىس تويىن تويلاۋشىلار قاتارى ودان ءارى كوبەيمەك.
تەمىر قۇسايىن, "ەگەمەن قازاقستان"