قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ «استانا» فۋتبول كلۋبى كومانداسىنا قۇتتىقتاۋ جەدەلحاتىن جولدادى, دەپ حابارلايدى اقوردانىڭ ءباسپاسوز قىزمەتى.
مەملەكەت باسشىسى ەۋروپا ليگاسىنىڭ پلەي-وفف كەزەڭىنە شىعۋىنا بايلانىستى «استانا» فۋتبول كلۋبىنىڭ كومانداسىن قۇتتىقتادى.
«سىزدەردىڭ تابىستارىڭىز كوماندانىڭ ويىنىن زور قىزىعۋشىلىقپەن ءارى ۇمىتپەن باقىلاپ جۇرگەن ميلليونداعان قازاقستاندىقتارعا قۋانىش سىيلادى. سىزدەردىڭ جەتىستىكتەرىڭىز قازاقستاندا فۋتبولدى جانە سپورت سالاسىن ودان ءارى دامىتۋعا تىڭ سەرپىن بەرەتىنى ءسوزسىز. ەلوردامىز استانانىڭ 20 جىلدىعى قارساڭىنداعى بۇل جەڭىستىڭ ەرەكشە سيمۆولدىق ءمانى بار», - دەلىنگەن جەدەلحاتتا.
سوڭىندا قازاقستان پرەزيدەنتى كوماندا مۇشەلەرىنىڭ بارىنە زور دەنساۋلىق پەن اماندىق تىلەپ, العا قويعان ماقساتتارىنىڭ ورىندالۋىنا نيەتتەستىك ءبىلدىردى.