سەنات توراعاسىنىڭ ورىنباسارى سەرگەي گروموۆ بەيجىڭدە حالىق وكىلدەرى بۇكىلقىتاي جينالىسى تۇراقتى كوميتەتى توراعاسىنىڭ ورىنباسارى چجان پينمەن كەزدەستى, دەپ حابارلادى پالاتانىڭ ءباسپاسوز قىزمەتى.
جۇزدەسۋ بارىسىندا تاراپتار ەكى مەملەكەتتىڭ ەكونوميكالىق, ساياسي جانە مادەني-گۋمانيتارلىق ىنتىماقتاستىعىن دامىتۋدىڭ جاي-كۇيى مەن كەلەشەگىنە نازار اۋداردى.
قازاقستان پارلامەنتتىك دەلەگاتسياسىنىڭ باسشىسى قىتاي كومپارتياسى ءحىح سەزىنىڭ تابىستى وتۋىمەن قۇتتىقتاي كەلىپ, ەكونوميكا مەن حالىقارالىق ارەناداعى قحر-دىڭ زور جەتىستىكتەرىنە توقتالدى. سەنات توراعاسىنىڭ ورىنباسارى قازاقستان رەسپۋبليكاسىنىڭ پرەزيدەنتى ن.نازارباەۆ پەن قحر توراعاسى سي ءتسزينپيننىڭ سەنىمدى ۇنقاتىسۋى ارقاسىندا قالىپتاسقان قازاقستان مەن قىتايدىڭ ءوزارا قاتىناستارىنىڭ وتە جوعارى دەڭگەيىن اتاپ ءوتتى. ء«بىز قىتايدى ستراتەگيالىق ارىپتەستىك تۇرعىسىندا بايلانىس ورناتقان تاياۋ كورشى ءارى سەنىمدى دوس رەتىندە قاراستىرامىز. ديپلوماتيالىق قاتىناستار ورناعاننان بەرگى 25 جىلدا ءبىزدىڭ ەلدەرىمىز اراسىندا سىندارلى تاتۋ كورشىلىك پەن ءوزارا تۇسىنىستىكتىڭ ونەگەلىك ۇلگىسى قالىپتاستى», - دەدى س.گروموۆ.
تاراپتار ەكىجاقتى جانە كوپجاقتى سيپاتتاعى پارلامەنتارالىق ءوزارا ءىس-قيمىلدى ۇدەتۋ ماسەلەلەرىن تالقىلاي كەلىپ, مەملەكەتارالىق بايلانىستاردى دامىتۋ جانە نىعايتۋداعى پارلامەنتارالىق ولشەمنىڭ ماڭىزدىلىعىنا توقتالدى.
تاراپتار سونداي-اق ءبىزدىڭ ەلىمىزدىڭ «نۇرلى جول» مەملەكەتتىك باعدارلاماسى مەن قىتايلىق ء«بىر بەلدەۋ, ءبىر جول» باستاماسىنىڭ ۇيلەستىرۋ جوسپارىن ىسكە اسىرۋ تۇرعىسىندا ىنتىماقتاستىقتىڭ كەلەشەگىنە قاتىستى پىكىر الماستى. س.گروموۆتىڭ ايتۋىنشا, قىتايدىڭ جەدەل دامۋى مەن ونىڭ جاھاندىق باستامالارى جالپى الەمدىك دامۋ مەن وركەندەۋگە ودان ءارى ىقپال ەتەتىن بولادى. سەناتور قازىرگى زامانداعى عىلىمي-ونەركاسىپتىك تەحنولوگيا سالاسىنداعى كوشباسشىلاردىڭ ءبىرى بولىپ تابىلاتىن قحر-مەن يننوۆاتسيالىق ىنتىماقتاستىقتى دامىتۋعا قازاقستاننىڭ مۇددەلى ەكەنىن اتاپ ءوتتى جانە ءبىزدىڭ ەلىمىزدەگى ءۇشىنشى جاڭعىرۋ باعدارلاماسىن ىسكە اسىرۋ اياسىندا قىتايلىق كومپانيالاردى ەلىمىزگە شاقىردى.
اڭگىمە بارىسىندا تاراپتاردىڭ تۋريزم, ءبىلىم بەرۋ جانە مادەنيەت سالالارى بويىنشا ءوزارا بايلانىستاردى دامىتۋ قارقىنىن ودان ءارى كۇشەيتۋگە ۇمتىلىسى ناقتىلاندى.
س.گروموۆ حالىقارالىق ترانسۇلتتىق كومپانيالارىنىڭ باسشىلارى قاتىسقان دوڭگەلەك ۇستەلدىڭ 10-شى وتىرىسىنا قاتىستى.