ەل گازەتى – «ەگەمەننىڭ» رەسپۋبليكا بويىنشا تارالىمى 200 مىڭنىڭ ۇستىندە دەر بولساق سونىڭ 20 داناسى وسى اۋىلدا تارايدى. اۋىلدىڭ اتى – گەنەرال ءتاتتىباي دۇيسەباي ۇلى.
پوشتا تاسۋشىسى – قۇرمانبەك رايىمبەك. ونىڭ قۇجاتتاعى ەسىمى قۇرمانبەك بولعانىمەن, كۇللى اۋىل ءۇشىن ول جاي قۇرمان. ءار ادام ءوزىنىڭ جانى سۇيگەن ءىسىنىڭ, كاسىبىنىڭ دەيىكشى, پاتريوتى بولىپ كەلەتىنى بار, قۇرمان سونداي جان. جۇرتتىڭ دا بۇل جىگىتكە دەگەن ىقىلاس-قۇرمەتى بولەك. وسى اۋىلدا 15 جىلدان بەرى وقىرماندى گازەتپەن, زەينەتكەرلەر مەن مەملەكەتتىك جەڭىلدىككە يە جانداردى زەينەتاقى-جاردەماقىمەن دەر مەزگىلىندە قامتاماسىز ەتىپ كەلەدى. پوشتادان الار ايلىعى – 11 مىڭ تەڭگە. سومكە مەن ەتىك تەگىن.
– الاتاۋدىڭ ەتەگىندەگى تابيعاتى قاتال جالعىز اۋىلمىز. سومكەمدى تولتىرىپ الىپ جازدىڭ كۇنى پوشتانى اتپەن تاسيمىن, قىستىڭ كۇنى كوشەدە تاۋ-تاۋ بوپ ۇيلىگەن قاردان ات وتە مە, ءار كوشەگە ارناپ ەكى-ۇشتەن ءبولىپ جاياۋ جەتكىزەمىن, – دەيدى قۇرمان قىسىلا. – اقشا دا, گازەت تە مەرزىمىنەن ءبىر كۇن كەشىككەن ەمەس, يەلەرىنىڭ قولىنا ۇستاتا قويامىن.
اۋىلدا 150 ءتۇتىن بار. قۇرمان ەس بىلگەلى وسىلاي, اۋىل حالقىنىڭ سانى ازايمايدى دا, كوبەيمەيدى دە. اۋداندىق «جاڭا ءومىر» گازەتىنە جىل سايىن 70 ادام جازىلادى. اۋدان ءۇنى. كەمۋگە ءتيىس ەمەس. كوپ جىلدان بەرى سولاي. وبلىستىق «اق جول» – 24, «ەگەمەن قازاقستان» – 20 دانا.
– جۋالى اۋداندىق بايلانىس-پوشتا تورابىنىڭ باستىعى ءنۇرزيا التىباەۆا دەگەن ءبىر «التىن» كىسى بار, – دەيدى اۋدانداعى 58 پوشتاشىنىڭ بىرەگەيى قۇرمانبەك رايىمبەك. – ءوز گازەتتەرىمىزدىڭ جايى جامان بولماس, سەن مىناۋ رەسپۋبليكالىق «ەگەمەن قازاقستان» گازەتىن ۇمىتپا, وقىرمانىن تومەندەتپە,– دەپ وتىرادى.
سونىمەن بۇل اۋىلداعى «ەگەمەننىڭ» سانى 20-دان ەش كەمىگەن ەمەس. قۇرماننىڭ سوڭعى جىلدار بەدەرىندە اڭعارعانى مۇسىلماندىقتى دارىپتەيتىن باسىلىم ساندارىنىڭ مولايعانى ەكەن. ءوز باسى مۇنى جاقسىلىققا بالايدى. تاراتىپ جۇرگەن ونشاقتى «يسلام جانە وركەنيەت» گازەتى مەن «يمان» جۋرنالى سونىڭ ايعاعى. اۋىلعا الماتىدان كەلەتىن جالعىز دانا «پرەزيدەنت جانە حالىق» گازەتىن زەينەتكەر-ۇستاز ايىپ قاراجىگىتوۆ جازدىرىپ الادى. «ايىپ اعامىز گازەتكە جازىلۋدان كوشباسشى. «ەگەمەن قازاقستاننان» باستاپ گازەت-جۋرنالعا جىلىنا ءبىر رەت بار زەينەتاقىسىن قينالماي بولەدى», دەيدى قۇرمان.
مەكتەپ پەن كىتاپحانا قاشاندا اۋىلدىڭ رۋحاني-مادەني ورداسى ەدى عوي! امانگەلدى اتىنداعى ورتا مەكتەپتىڭ ديرەكتورى ايگۇل يماش باستاعان ورالحان باتىرقۇل, ەشەنقۇل قانسەيىت, ابزال ەرەجەپ سياقتى مۇعالىمدەر, مەكتەپتىڭ ۇستاز-ارداگەرلەرى قۋاندىق امانباەۆ, لەسباي نازارباەۆ, مەيىرحان بايىمبەتوۆ جانە باسقالار باسپاسوزگە جازىلۋ ناۋقانىندا الدىمەن «ەگەمەن قازاقستاننىڭ» اتىن اتايدى دەگەن پوشتاشى جىگىتتىڭ ءسوزى جۇرەك جىلىتتى. ايتپاقشى, بۇل ارادا تاۋ بوكتەرىندەگى جالعىز اۋىلعا قىسى-جازى ءبىر تىنباي توقتاۋسىز جۇرەتىن «نيۆامەن» پوشتا تاسيتىن ينكاسساتور الىپ ءجۇرۋشى سەيتقاس تاشەەكەۆ پەن جۇرگىزۋشى-ينسپەكتور بولات راحمانقۇلوۆتىڭ, بار ءىستى نازارىندا نىق ۇستايتىن شاقپاق اتا اۋىلدىق وكرۋگى پوشتا ءبولىمىنىڭ باستىعى باقىتجان ۇساتاەۆتىڭ ەڭبەگىن دە اتاپ وتپەسە بولماس. «مەنىڭ ەل الدىنداعى ابىرويلى ءجۇرۋىم ۋاقىتپەن ساناسپايتىن وسى مارقاسقا جىگىتتەردىڭ ارقاسى», دەيدى قۇرمان.
ەڭ قىزىعى, مەن وعان «ەگەمەننىڭ» سانىن ارتتىرشى دەپ قولقا سالماسام دا «ەگەمەن قازاقستان» گازەتىنىڭ سانى الداعى 2018 جىلى اۋىلدا 25 دانا بولادى, ۋادە ەتەمىن» دەپ ك ۇلىمسىرەگەن قۇرماننىڭ ءسوزى قۇلاعىمدا قالىپ قويىپتى. جۋرناليست-ءتىلشى ءۇشىن باسپاسوزگە جازىلۋ ناۋقانى كەزىندە بۇدان اسقان اسقاق ءسوز, بۇدان ارتىق قۇرمەت بار ما ەدى!؟ «ەگەمەننىڭ» ەلدەگى ءوز ادامى بولعانى قانداي جاقسى! قازاقستاندا 7000-نىڭ ۇستىندە اۋىل بار ەكەن. شىركىن, ءار اۋىلداعى ءار پوشتاشى وسى قۇرمانبەكتەي بولسايشى!..
تالعات ءسۇيىنباي, «ەگەمەن قازاقستان»
جامبىل وبلىسى, جۋالى اۋدانى, ت.دۇيسەباي ۇلى اۋىلى