"سلاۆيا" - "استانا" ويىنىنان كەيىن ياروسلاۆ شيلگاۆى تىلشىلەر ساۋالدارىنا جاۋاپ بەردى.
- «استانا» كومانداسى قاراپايىم گول سوقتى. ەكىنشى تايمدا بىرنەشە گول سالاتىن مۇمكىندىگىمىز بولىپ ەدى, الايدا فۋتبولشىلارىمىزدىڭ جولى بولمادى. مەن قازاقستاندىق كلۋبتى شىن جۇرەكتەن قۇتتىقتايمىن.
- قورعاۋشىلارىڭىزدىڭ ويىنىنا قانداي باعا بەرەسىز, ولار بىردە ءبىر شابۋىلعا دۇرىس ءۇن قوسا المادى عوي. قاپتالدان كوتەرگەن دوپتارىنىڭ بىرەۋى دە ءدال بارمادى. سونىمەن قاتار يان لاشتۋۆكانىڭ ءوزى قاتەلىكتەر جاسادى.
- قورعاۋشىلارىمىز وتە ورەسكەل ويناۋعا تىرىستى. ارينە, قاپتالداعى قورعاۋشىلارىمىزعا كوپ ءمىن تاعىلادى. دەگەنمەن, ولاردىڭ باستى ماقساتى قورعانىس. مىسالى, نەتسيد ءوز مۇمكىندىگىن گولعا اينالدىرسا قازىر وسىلايشى قورعاۋشىلاردى سىناپ وتىرماس ەدىك. ءبىزدىڭ جەڭىلىسكە قورعاۋشىلار كىنالى ەمەس. بۇكىل كوماندا كىنالى. سونىمەن قاتار, ميلان شكودانىڭ جاراقات الىپ قالعانىنىڭ دا كەسىرى ءتيدى.
- دەلي مەن حۋشباۋەر نەگە وينامادى؟
- ول ەكەۋىندە جاراقات بولدى. سوندىقتان دا, ولارعا تولىقتاي سەنە المادىم. بارلىعى ولارعا دا تىرەلىپ تۇرعان جوق. دەلي كوپ ۋاقىت بويى بىزبەن جاتتىقپادى. ال جالپى ايتقاندا, «استانا» مەن «سلاۆيا» كوماندالارى ءبىر-بىرىنە ۇقساس. ويىن مانەرى دە اينىمايدى دەسەم بولادى. تەك بۇگىن قازاقتاردىڭ جولى بولدى.
- وسى ويىننان كەيىن قىزمەتىڭىزدەن كەتەتىن شىعارسىز؟
- ءبىر ويىندى جەڭىلە سالىپ, قىزمەتتەن كەتە سالمايمىن. ەگەر كلۋبتىڭ باسشىلىعى سولاي بولسىن دەپ شەشسە, مەن قارسى ەشتەڭە دە دەي المايمىن. الايدا, ءوز باسىم بۇل كلۋبپەن ءالى دە جۇمىس ىستەگىم كەلەدى.
ەرمۇحامەد ماۋلەن