باتىس قازاقستان وبلىسىندا جاڭا قۇس فابريكاسى ىسكە قوسىلدى

باتىس قازاقستان وبلىسى جىلىنا 10 مىڭ توننا قۇس ەتىن تۇتىنسا, وسى كەزگە دەيىن ونى تۇگەل دەرلىك سىرتتان تاسيتىن. «جايىق اگرو LTD» جشس اشىپ وتىرعان جاڭا كاسىپورىن ەندى بۇل قاجەتتىلىكتى وتەمەك.

برويلەر قۇس فابريكاسى زەلەنوۆ اۋدانىنىڭ ششاپوۆ اۋىلىندا ورنالاسقان. ينكۋباتور, جەم تسەحى, قۇس بورداقىلايتىن 24 كورپۋس, سويۋ تسەحى, تاعى باسقا تولىپ جاتقان قوسىمشا قۇرىلىستاردان تۇراتىن الىپ كەشەننىڭ قۇنى 4200 ملن تەڭگە ەكەن. كاسىپورىندا وندىرىلگەن ءونىمنىڭ 90 پايىزى جەرگىلىكتى نارىققا شىعارىلسا, 10%-ى ەكسپورتقا جونەلتىلمەك. جۇمىرتقادان – بالاپان, بالاپاننان – تاۋىق وسىرەتىن, تولىق تەحنولوگيالىق تىزبەككە قۇرىلعان كاسىپورىن سىرتقى ماۋسىمدىق فاكتورلارعا تاۋەلسىز, جۇيەلى جۇمىس ىستەيدى. 150 ادام تۇراقتى جۇمىس ىستەيتىن فابريكادا قۇس ەتى تۇتىنۋشىعا تۇتاستاي دا, بولشەكتەلىپ تە ۇسىنىلادى ەكەن. سونداي-اق «جايىق اگرو LTD» ۇجىمى الداعى ۋاقىتتا قۇس ازىعىن دايىندايتىن ارنايى زاۋىت اشۋدى دا جوسپارلاپ وتىر.

- قازاقستان رەسپۋبليكاسىنداعى يندۋستريالاندىرۋ كۇنى ەلىمىزدىڭ بارلىق وڭىرىندە جاڭا اگروونەركاسىپتىك, يندۋستريالدى-يننوۆاتسيالىق جوبالار ىسكە قوسىلىپ جاتىر. ءدال وسى يندۋستريالاندىرۋ كارتاسى بويىنشا ءبىزدىڭ باتىس قازاقستان وڭىرىندە 8 اي ىشىندە جالپى قۇنى 8,2 ملرد تەڭگە بولاتىن 10 جاڭا جوبا جۇزەگە استى. 550 جاڭا جۇمىس ورنى اشىلدى. ەلباسىنىڭ تاپسىرماسىمەن ءبىز ەكسپورتقا باعىتتالعان ءوندىرىستى ارتتىرۋ ءۇشىن جۇمىستانۋدامىز. جاڭاعى ون جوبانىڭ التاۋى ەكسپورتقا تاۋار شىعارۋعا باعىتتالعان, - دەيدى ءوڭىر باسشىسى التاي كولگىنوۆ.

وبلىس اكىمىنىڭ ايتۋىنشا, وتكەن جىلى ءوڭىردىڭ سىرتقى تاۋار اينالىمى 4 ملرد. اقش دوللارىن قۇراعان. ونىڭ 500 ملن. اقش دوللارى ەۋرازيالىق ەكونوميكالىق وداقتىڭ ۇلەسىنە تيەدى. بيىلعى ناتيجەلەر ەكسپورت كولەمىنىڭ بىلتىرعىمەن سالىستىرعاندا 10 پايىزعا وسكەنىن كورسەتىپ وتىر.

قازبەك قۇتتىمۇرات ۇلى

«ەگەمەن قازاقستان»

سۋرەتتى تۇسىرگەن الەكساندر كۋپريەنكو