پارلامەنت سەناتى توراعاسىنىڭ ورىنباسارى سەرگەي گروموۆ باستاعان قازاقستان پارلامەنتشىلەرىنىڭ دەلەگاتسياسى قىتاي حالىق رەسپۋبليكاسىندا ساپاردا بولدى.
قحر شىڭجاڭ-ۇيعىر اۆتونوميالىق اۋدانى حالىق ۇكىمەتىنىڭ توراعاسى زاكير شوحراتپەن جانە قحر گۋاندۋن پروۆينتسياسى حالىق وكىلدەرىنىڭ جينالىسى تۇراقتى كوميتەتىنىڭ توراعاسى لي يۋ مەيمەن كەزدەسۋ بارىسىندا ەكىجاقتى ساۋدا-ەكونوميكالىق, كولىك جانە مادەني ىنتىماقتاستىق ماسەلەلەرى تالقىلاندى. سەنات توراعاسىنىڭ ورىنباسارى قازاقستان مەن قىتايدىڭ ستراتەگيالىق ارىپتەستىك سيپاتىنداعى ءوزارا ءىس-قيمىلىنىڭ جوعارى دەڭگەيىن اتاپ ءوتتى. س.گروموۆ ءبىزدىڭ ەلدەرىمىز اراسىنداعى دوستىق بايلانىستاردى دامىتۋ جانە نىعايتۋداعى ەكى مەملەكەت باسشىلارى قوسقان ۇلەستىڭ زور ماڭىزىن اتاپ ءوتتى.
جۇزدەسۋشىلەر قىتايلىق ء«بىر بەلدەۋ, ءبىر جول» باستاماسى مەن ءبىزدىڭ ەلىمىزدىڭ «نۇرلى جول» باعدارلاماسىن, سونداي-اق 2015-2020 جىلدارعا ارنالعان شەكارا ماڭىنداعى ىنتىماقتاستىقتى دامىتۋدىڭ مەملەكەتارالىق باعدارلاماسىن ۇيلەستىرۋ جوسپارىن ىسكە اسىرۋ تۇرعىسىندا ىنتىماقتاستىقتى ودان ءارى دامىتۋدىڭ كەلەشەگىنە قاتىستى پىكىر الماستى. ودان باسقا, وكىلدى جانە اتقارۋشى بيلىكتىڭ بايلانىستارى, پارلامەنتارالىق ۇنقاتىسۋلار, دەلەگاتسيالار الماسۋ ارقىلى ەكىجاقتى ءوزارا ءىس-قيمىلدى ۇدەتۋ ماسەلەلەرى دە قوزعالدى.
ساپاردا جۇرگەن دەلەگاتسيا قۇرامىندا سەناتورلار راشيت اكىموۆ, رىسقالي ابدىكەروۆ, ۆلاديمير ۆولكوۆ, عۇمار دۇيسەمباەۆ, ءالىمجان قۇرتاەۆ, دۇيسەنعازى مۋسين بار.