قىرعىزستان قازاقستانعا بايلانىستى ەۋرازيالىق ەكونوميكالىق كوميسسيا مەن دۇنيەجۇزىلىك ساۋدا ۇيىمىنا بەرگەن ارىزىن قايتىپ الادى. بۇل تۋرالى قىرعىز رەسپۋبليكاسىنىڭ ۆيتسە-پرەمەرى تولقىنبەك ابدىعۇلوۆ مالىمدەدى.
ول قازاق-قىرعىز شەكاراسىندا قازاقستاننىڭ كۇشەيتىلگەن رەجىمدى ەنگىزۋىنە بايلانىستى قىرعىزستان تاراپى وسىنداي قادامعا بارعانىن ايتتى.
ابدىعۇلوۆ ءوز سوزىندە ەكى تاراپ شەكاراداعى جاعدايدى رەتتەۋ تۋرالى ورتاق كەلىسىمگە كەلگەنىن, سونداي-اق «جول كارتاسى» جوباسىنا قول قويعانىن جەتكىزدى.
«قازاقستان مەن قىرعىزستان اراسىنداعى «جول كارتاسى» 50 تارماقتان تۇرادى. وندا شەكارا, كولىك, فيتوسانيتارلىق جانە ۆەتەرينارلىق باقىلاۋ, كەدەن جانە سالىق باسقارمالارى سالاسىنداعى ىنتىماقتاستىق تۋرالى ماسەلەلەر قاراستىرىلعان. ۆەتەريناريا جانە كارانتين سالاسىنداعى تارماقتاردىڭ باسىم بولىگىندە قىرعىز تاراپى قازاقستان ارقىلى وتەتىن تاۋارلاردى ۆەتەريناريالىق-سانيتاريالىق باقىلاۋدا تۇراقتى ءارى ءتيىمدى ۇستاۋدى قامتاماسىز ەتۋى قاجەتتىگى كورسەتىلگەن. بۇدان بولەك, «جول كارتاسىندا» قازاقستانداعى ۆەتەريناريالىق-سانيتاريالىق باقىلاۋعا جاتاتىن ونىمدەردى جەتكىزۋگە قۇقىعى بار كاسىپورىندار تىزبەسىن كەڭەيتۋ سياقتى ماسەلەلەر قاراستىرىلعان», – دەدى قىرعىز رەسپۋبليكاسىنىڭ ۆيتسە-پرەمەرى.
وسىعان دەيىن حابارلانعانداي قازاقستان تاراپى شەكاراداعى كۇشەيتىلگەن رەجىمدەگى باقىلاۋدى 3 جەلتوقساننان باستاپ توقتاتتى. بۇل 2 جەلتوقسان كۇنى استانادا قازاقستان ۆيتسە-پرەمەرى اسقار مامين مەن قىرىزستان ۆيتسە-پرەمەرى تولقۋنبەك ابدىگۋلوۆ اراسىندا قول قويىلعان «جول كارتاسىندا» ەكىجاقتى ەكونوميكالىق ىنتىماقتاستىق ماسەلەسىندە قاراستىرىلعان. قۇجاتقا مەملەكەت باسشىسى نۇرسۇلتان نازارباەۆتىڭ تاپسىرماسى بويىنشا قول قويىلدى.
ايتا كەتەيىك, 10 قاراشا كۇنى قىرعىزستان دۇنيەجۇزى ساۋدا ۇيىمىندا قازاقستان تاراپىن «شەكارانى نەگىزسىز جاۋىپ تاستادى» دەپ ايىپتاپ, شاعىم تۇسىرگەن بولاتىن.