تۇڭعىش پرەزيدەنت كۇنى مەرەكەسىن شىعىسقازاقستاندىقتار كەڭ اۋقىمدا اتاپ ءوتتى. بىرنەشە جاڭا نىسان اشىلىپ, بىرقاتار تاعىلىمدى شارالار ۇيىمداستىرىلدى. 30 قاراشادا وبلىس ورتالىعى – وسكەمەننىڭ ىرگەسىندەگى ارماتۋرا زاۋىتى شاعىن اۋدانىندا بيزنەستىڭ الەۋمەتتىك جاۋاپكەرشىلىگى اياسىندا 140 ورىندىق «داريا» اتتى بالاباقشا اشىلدى.
AES كومپانيالار توبىنىڭ قازاقستاندىق بولىمشەسى وسىمەن وبلىسقا ەكىنشى بالاباقشانىڭ كىلتىن تابىستاپ وتىر. اتالمىش كاسىپورىن 2012 جىلى سەمەي قالاسىندا 160 ورىندىق بالاباقشا سالىپ بەرگەن بولاتىن. تاربيە وشاعىنىڭ اشىلۋىنا قاتىسقان ايماق باسشىسى دانيال احمەتوۆ شىعىس قازاقستان بالعىنداردى مەكتەپكە دەيىنگى تاربيەمەن 100 پايىز قامتىعان وبلىستىڭ ءبىرى ەكەندىگىن, بالاباقشالار قۇرىلىسىن بيۋدجەتتەن تىس كوزدەردەن قارجىلاندىرۋ وڭىردە داستۇرگە اينالعانىن اتاپ ءوتىپ, شاعىن اۋدان تۇرعىندارىن قۋانىشتى ساتتەرىمەن قۇتتىقتادى.
500 ۇيگە جارىق بەرىلدىبۇل كۇنى وسكەمەندەگى №20 شاعىن اۋداننىڭ تۇرعىندارى كوپتەن كۇتكەن ەلەكتر قۋاتىنا قول جەتكىزىپ, مارە-سارە بولدى. بيىل جازدا اتالعان شاعىن اۋدان تۇرعىندارى وبلىس اكىمىمەن كەزدەسكەندە 500-دەن استام جەر ءۇيدىڭ جارىقتى گەنەراتور ارقىلى الىپ وتىرعانىن ايتىپ, مۇڭ-مۇقتاجدارىن جەتكىزگەن-ءدى. سول كەزدەسۋدە ءوڭىر باسشىسى بۇل ماسەلەنى جىل سوڭىنا دەيىن شەشىپ بەرۋگە ۋادە بەرگەن بولاتىن. ناتيجەسىندە, ەلەكتر جەلىسىن تارتۋ ءۇشىن بيۋدجەتتەن 120 ملن تەڭگە بولىنگەن. جارىق كەلىپ, كوزدەرى اشىلعان اۋدان تۇرعىندارىمەن تىلدەسكەن د.احمەتوۆ كارىز جۇيەسىنىڭ قۇرىلىسى كەلەسى جىلى اياقتالاتىنىن, جول ماسەلەسى دە شەشىمىن تاباتىنىن, سۋ قۇبىرىن تارتۋ ءۇشىن 2018 جىلى 980 ملن تەڭگە بولىنەتىنىن جەتكىزىپ, ءبىر قۋانتىپ تاستادى.
وسكەمەندەگى ا.پۋشكين اتىنداعى وبلىستىق كىتاپحانادا فيلولوگيا عىلىمدارىنىڭ كانديداتى, سارسەن امانجولوۆ اتىنداعى شقمۋ-ءدىڭ دوتسەنتى ليۋتسيا ابدۋللينانىڭ ورىس تىلىندە جارىق كورگەن «نازارباەۆشا سويلەۋ» اتتى كىتابىنىڭ تۇساۋكەسەر ءراسىمى ءوتتى. «قازىرگى كۇنى شەشەندىك شەبەرلىك كاسىبي قىزمەتتىڭ بارلىق سالاسىنا قاجەت. كوپشىلىك الدىندا شەبەر سويلەۋدىڭ جوعارى دەڭگەيى – كارەرلىك ءوسۋ ساتىسىنىڭ كەپىلى. بۇل رەتتە ءبىزدىڭ پرەزيدەنتىمىزدىڭ ءسوز سويلەۋ مانەرى, شەشەندىگى كوپشىلىككە ۇلگى», دەيدى كىتاپ اۆتورى.
سەمەيدە 1200 ورىندىق مەكتەپ سالىندىتۇڭعىش پرەزيدەنت كۇنى سەمەي شاھارىندا دا ەستە قالارلىق تاعىلىمدى شارالارمەن اتاپ ءوتىلدى. بۇل كۇنى «ۇشاقتار» كەنتى شاعىن اۋدانىندا جاڭا ۇلگىدەگى 1200 ورىندىق مەكتەپ سالتاناتتى تۇردە اشىلدى. جاراتىلىستانۋ-ماتەماتيكا باعىتىنداعى ءبىلىم ورداسى جاڭا موديفيكاتسيا سىنىپتارىمەن جابدىقتالعان. مەكتەپتە ءبىلىم الىپ قانا قويماي, بالالاردىڭ جان-جاقتى دامۋى ءۇشىن بارلىق جاعداي جاسالعان. سپورتتىق جانە گيمناستيكالىق قۇرىلعىلارى بار ەكى سپورت زالى جۇمىس ىستەيدى.
ماتا, اعاش جانە مەتالل وڭدەۋگە ارنالعان سوڭعى تەحنولوگياداعى قۇرالدارمەن جابدىقتالعان شەبەرحانالار وقۋشىلاردىڭ قولونەرمەن شۇعىلدانۋىنا مۇمكىندىك بەرەدى. كەڭ سارايداي جارقىراعان تاربيە وشاعىنىڭ اشىلۋىنا وسكەمەننەن ارنايى كەلگەن وبلىس اكىمى بيىلدىڭ وزىندە سەمەيدە ەكى بىردەي ءبىلىم شاڭىراعى بوي كوتەرگەنىنە, مەملەكەتتىڭ ءبىلىم سالاسىنا ايرىقشا كوڭىل ءبولىپ جاتقانىنا توقتالىپ, مەكتەپ ۇجىمى مەن وقۋشىلاردى مەرەكەمەن قۇتتىقتادى.
سونىمەن قاتار ايماق باسشىسى مەرەكە كۇنى شاكارىم اتىنداعى مەملەكەتتىك ۋنيۆەرسيتەتتىڭ ستۋدەنتتەرى مەن ماگيسترانتارىنا تاۋەلسىزدىكتىڭ العاشقى جىلدارىنداعى ەلىمىزدىڭ ساياسي, الەۋمەتتىك جاعدايى, سول كەزدەگى قيىندىقتار, ەگەمەندىكتىڭ ەلەڭ-الاڭ شاعىنداعى ەلباسىنىڭ ەڭبەگى, قابىلداعان شەشىمدەرى جايىندا ءدارىس وقىدى. «سول كەزدەرى شىنىن ايتقاندا نارىقتىق ەكونوميكانىڭ نە ەكەنىن بىلمەدىك. قازىرگىدەي قالاعان ۋاقىتىڭدا قاراپ, ءبىلىمىڭدى تولىقتىراتىن ينتەرنەت دەگەن دۇنيە بولعان جوق. سول ءۇشىن دە استاناعا ءار سارسەنبى سايىن ۇشىپ كەلەتىنبىز, پرەزيدەنت بىزگە ەلدى قيىن ەكونوميكالىق داعدارىستان شىعارۋدىڭ جولدارىن, قانداي قادامدار جاساۋ قاجەتتىگىن ايتىپ, تۇسىندىرەتىن», دەدى د.احمەتوۆ.
ايتۋلى مەرەكە ءوڭىردىڭ اۋداندارىندا دا كەڭىنەن اتاپ ءوتىلىپ, بىرقاتار ماڭىزدى الەۋمەتتىك نىساندار ەل يگىلىگىنە بەرىلدى. گلۋبوكوە اۋدانىنىڭ التاي اۋىلىندا مەملەكەت-جەكەمەنشىك سەرىكتەستىگى اياسىندا 100 ورىندىق «ساۋلەتاي» اتتى بالاباقشا ەسىگىن ايقارا اشسا, زىريان اۋدانىنىڭ سەرەبريانكا قالاسىندا 120 ورىندىق «بەرىك» اتتى جەكەمەنشىك بالاباقشا ىسكە قوسىلدى. جارما اۋدانىنىڭ قالباتاۋ اۋىلىندا اۋماقتىق الەۋمەتتىك قىزمەت كورسەتۋ ورتالىعى جاڭا عيماراتقا كوشىرىلىپ, سۋىقبۇلاق كەنتىنە «نۇرلى جول» باعدارلاماسى شەڭبەرىندە سۋ قۇبىرى تارتىلدى. تارباعاتاي اۋدانىنىڭ تانا مىرزا جانە سۇلۋتال اۋىلدارىنا تازا اۋىز سۋ بەرىلىپ, مەملەكەت-جەكەمەنشىك ارىپتەستىك اياسىندا جوندەلگەن 19 شاقىرىم جول پايدالانۋعا بەرىلدى.
ازامات قاسىم, «ەگەمەن قازاقستان»
شىعىس قازاقستان وبلىسى