الەمدىك تاريحقا ازەربايجان حالقىنىڭ جالپىۇلتتىق كوشباسشىسى گەيدار اليەۆ پەن قازاقستاننىڭ جالپىۇلتتىق كوشباسشىسى نۇرسۇلتان نازارباەۆ ۇزاق جىلداردى قامتىعان حالىق اراسىنداعى ءومىر مەكتەبىنەن ءوتىپ بارىپ ەندى.
ولار ازەربايجان مەن قازاقستاننىڭ ساياسي ساحناسىنا باۋىرلاس تۇركى حالقىنىڭ ەڭ ماڭىزدى جانە اسا قيىن كەزەڭىندە كوتەرىلدى. مەملەكەت باسشىلارى ءوز ەلدەرىن گەوساياسي اۋىرتپالىقتارعا قاراماستان بىلگىرلىكپەن باسقارۋ ارقىلى كەزدەسكەن قيىندىقتاردان الىپ شىقتى. العا قويعان ماقسات-مۇددەلەرىن ۇلتتىق دامۋ تۇجىرىمدامالارى نەگىزىندە تابىستى جۇزەگە اسىردى.
ەگەر توقسانىنشى جىلداردىڭ باسىنداعى ساياسي ۇدەرىستەرگە نازار سالاتىن بولساق, ءبىزدىڭ كوز الدىمىزعا ازەربايجاننىڭ ۇلتتىق جانە مەملەكەتتىك تاۋەلسىزدىگى جولىنداعى كۇرەسى كەلەدى. جالپىۇلتتىق كوشباسشى گەيدار اليەۆتىڭ ساياسي ەرىك-جىگەرىنىڭ جانە ەل باسقارۋداعى مول تاجىريبەسىنىڭ ناتيجەسىندە ازەربايجان ءوز ەگەمەندىگىن قالىپتاستىردى, ۋاقىت وتە ەكونوميكالىق دامۋ جولىنا ءتۇستى. ءدال وسىنداي اسا قيىن ساياسي ميسسيانى قازاقستان پرەزيدەنتى نۇرسۇلتان نازارباەۆ تا مۇلتىكسىز ورىنداپ شىقتى. ەلىن وركەنيەتتى مەملەكەتتەردىڭ قاتارىنا قوسۋ ءۇشىن قاجەتتى بارلىق ماسەلەلەردىڭ جولىن ىزدەستىردى.
ءوز وتانىن, ءوز ەلىن ساياسي جانە ەكونوميكالىق اۋىر كەزەڭدە باسقارۋدى قولعا العان ول حالىق الدىنداعى جاۋاپكەرشىلىكتى سەزىنە وتىرىپ, تىعىرىقتان شىعۋدىڭ ەڭ ءتيىمدى جولىن قاراستىردى. كوپ كەشىكپەي ونى تاپتى دا. ساناۋلى جىلدار ىشىندە قازاقستان باسشىسى قازاقستاندى قارقىندى دامىتۋ ارقىلى كوپشىلىك سەنىمىنەن شىقتى, ەل سۇيىسپەنشىلىگىنە بولەندى. ءوز ەلىنىڭ مۇددەسىن الەمدىك دەڭگەيدە قورعاۋ ارقىلى بەدەلدى كوشباسشى ەكەنىن ءىس جۇزىندە دالەلدەدى. قازاقستاندى, قازاق حالقىن حالىقارالىق قوعامداستىق ن.ءا.نازارباەۆ ارقىلى تانىدى.
نۇرسۇلتان نازارباەۆتىڭ الەمدىك دەڭگەيدەگى ءىرى ساياساتكەر, ەرەكشە تۇلعا ەكەندىگى ونىڭ كوپ ەتنوستى قازاقستاندا ەتنوسارالىق جانە كونفەسسياارالىق ىنتىماق پەن سىيلاستىقتى, بەرەكە مەن بىرلىكتى نىق ورنىقتىرا بىلگەندىگىمەن دە ەرەكشەلەنەدى. بۇگىندە الەمدىك قوعامداستىققا بىرەگەي ينستيتۋت رەتىندە تانىلعان قازاقستان حالقى اسسامبلەياسىنىڭ الاتىن ورنى بولەك. ويتكەنى وسى بىرەگەي قۇرىلىم قازاقستاندا ساياسي ەكونوميكالىق دامۋعا ارقاۋ بولىپ وتىرعانىن ءبىز جاقسى بىلەمىز, قىزىعا قارايتىنىمىزدى جاسىرمايمىز.
قازاق ەلىندە ەكونوميكالىق رەفورمالار تابىستى جۇزەگە اسىرىلدى. مەملەكەتتىڭ شەتەلدەرمەن ءتۇرلى سالالار بويىنشا قاتىناستار جاساۋىنا نەگىزدەلگەن قاجەتتى زاڭنامالار قابىلداندى.ءوز وتانداستارىن تاريحي وتانىنا ورالۋعا شاقىرعان, ولارعا جاعدايلار جاساعان دۇنيە جۇزىندە ساناۋلى عانا ەلدەر بار. سولاردىڭ ءبىرى – تۇركىتىلدەس ءارى باۋىرلاس قازاق حالقى جانە ونىڭ تۇڭعىش پرەزيدەنتى ن.ءا.نازارباەۆ ەكەنىن بىزدەر, ازەربايجاندار ماقتان ەتەمىز. ەل باسشىسىنىڭ باستاماسىمەن ىسكە اسىرىلعان «نۇرلى كوش» مەملەكەتتىك باعدارلاماسى سوعان ناقتى دالەل بولادى.
ەرەكشە دارا تۇلعا, ءىرى دە بەدەلدى ساياساتكەر ن.ءا.نازارباەۆتى بۇگىندە الەم جۇرتشىلىعى جاقسى بىلەدى جانە جان-جاقتى تانيدى. ونىڭ باسشىلىعىمەن قازاقستان بولاشاقتا بيىك بەلەستەردى باعىندىراتىنىنا, الەمدە ەڭ دامىعان مەملەكەتتەردىڭ قاتارىنان ورىن الاتىنىنا سەنىمىمىز مول. ازەربايجان مەن قازاقستاننىڭ باعىندىراتىن بەلەستەرى, قول جەتكىزەتىن جەتىستىكتەرى مول بولعاي دەپ تىلەيمىز.
ءالي گاسانوۆ, ازەربايجان رەسپۋبليكاسى پرەزيدەنتىنىڭ قوعامدىق-ساياسي ماسەلەلەر جونىندەگى كومەكشىسى