جاڭا قازاقستاندىق پاتريوتيزم مەن ۇرپاقتار ساباقتاستىعى پرينتسيپتەرىنىڭ نەگىزىندە جەكە قۇرامنىڭ مورالدىق-پسيحولوگيالىق رۋحىن قالىپتاستىرۋ قارۋلى كۇشتەردىڭ باستى تاپسىرمالارىنىڭ ءبىرى.
جاس ۇرپاقتىڭ الدىندا وزدەرىنىڭ اسكەري بورىشتارىن ورىنداۋ, وزدەرىن ناقتى ىستە كورسەتۋ, مەملەكەتتىڭ قورعانىس قابىلەتىن نىعايتۋ جولىندا ءوز كۇشتەرى مەن كاسىبي بىلىمدەرىن قايدا جۇمساي ءبىلۋ كەرەكتىگىن ايقىنداۋ جولى تۇر.
سول سەبەپتى ەلباسى ءوزىنىڭ جولداۋىندا ء«وز بويىمىزدا جانە بالالارىمىزدىڭ بويىندا جاڭا قازاقستاندىق ءپاتريوتيزمدى تاربيەلەۋىمىز كەرەك. بۇل ەڭ الدىمەن ەلگە جانە ونىڭ يگىلىكتەرىنە دەگەن ماقتانىش سەزىمىن ۇيالاتادى» دەپ ومىرلىك ماڭىزى بار ناقتى تاپسىرما قويدى.
ءپاتريوتيزمنىڭ نەگىزگى ۇستانىمى مەملەكەتتىك جاستار ساياساتى تۋرالى زاڭ مەن تۇجىرىمدامانى ىسكە اسىرۋ شەڭبەرىندەگى جالپىۇلتتىق تاپسىرمالار مارتەبەسىنە يە قوعامنىڭ رۋحاني دامۋىنىڭ ستراتەگيالىق ماڭىزدى ۇستانىمى بولىپ تابىلادى.
وسىعان بايلانىستى مەملەكەت قازاقستاندىق جاستاردىڭ لايىقتى ءومىرىن قامتاماسىز ەتۋدە ۇلكەن جۇمىستار اتقارۋدا.
اعا ۇرپاقتىڭ ەرلىك ەستافەتاسىن لايىقتى جالعاستىراتىن, قازاقستاننىڭ گۇلدەنۋى مەن ونىڭ الەمدە تانىلۋى جولىندا ءاردايىم بيىكتەن تابىلاتىن جاستارعا ۇلكەن ءۇمىت پەن جاۋاپكەرشىلىك جۇكتەلەدى.
وسىدان تۋرا ەكى جىل بۇرىن, 2015 جىلعى 1 جەلتوقساندا, تۇڭعىش پرەزيدەنت كۇنى مەملەكەت باسشىسىنىڭ قاتىسۋىمەن وتانىمىزدىڭ استاناسىندا قازاقستان رەسپۋبليكاسى قارۋلى كۇشتەرىنىڭ ۇلتتىق اسكەري-پاتريوتتىق ورتالىعى اشىلعان بولاتىن.
ورتالىقتا ازاماتتاردىڭ, ونىڭ ىشىندە جاستاردىڭ تاربيەسىندە ماڭىزدى ءرول اتقاراتىن ەلىمىزدەگى العاشقى اسكەري-تاريحي مۋزەي جۇمىس ىستەيدى. اسكەري-تاريحي مۋزەي كوشپەندى ۇلتتىڭ مادەنيەتى مەن تۇرمىسىنا كوڭىل اۋدارتۋ, مەملەكەتتىڭ اسكەري تاريحىن, جاۋىنگەرلىك داستۇرلەر مەن ريتۋالداردى زەردەلەۋ مەن ناسيحاتتاۋ ارقىلى جاستارعا پاتريوتتىق تاربيە بەرىپ كەلەدى. سونىمەن قاتار مۋزەي قوناقتارى قازىرگى زامانعى قازاقستان اسكەرىنىڭ قالىپتاسۋى مەن دامۋىنىڭ تاريحي كەزەڭدەرىنەن دە مول ماعلۇمات الادى.
ورتالىقتىڭ قۇرامىنا اسكەري وركەستر, ەسترادالىق-سيمفونيالىق وركەستر, فولكلورلىق-ەتنوگرافيالىق, بي جانە ۆوكالدى توپتاردان قۇرالعان انسامبل, سونداي-اق اسكەرگە دەيىنگى جاستارعا پاتريوتتىق تاربيە بەرۋدە ۇلكەن جۇمىس اتقارىپ وتىرعان اسكەري-پاتريوتتىق جۇمىستار ءبولىمى كىرەدى.
بۇگىندە قارۋلى كۇشتەردىڭ ۇلتتىق اسكەري-پاتريوتتىق ورتالىعى وسكەلەڭ ۇرپاقتى اسكەري-پاتريوتتىق رۋحتا تاربيەلەپ جۇرگەن جاستاردىڭ قوعامدىق مەكەمەلەرىنىڭ قىزمەتىن ۇيلەستىرۋشى مەكەمەگە اينالىپ وتىر.
جاستار ۇيىمدارى مەن اسكەري-پاتريوتتىق كلۋبتاردىڭ قىزمەتىن ۇيلەستىرۋ ماقساتىندا ورتالىقتىڭ بازاسىندا «جاس سارباز» رەسپۋبليكالىق بالالار مەن جاستاردىڭ اسكەري-پاتريوتتىق قوعامدىق بىرلەستىگى قۇرىلعان. بۇل قوعامدىق بىرلەستىكتىڭ فيليالدارى بارلىق وڭىرلەردە تىركەلگەن.
وسىنىڭ ارقاسىندا بيىلعى جىلى اسكەري-پاتريوتتىق كلۋبتاردىڭ سانى 2461-گە وسسە, ونداعى بالالار سانى 68 803 ادام بولىپ وتىر. بيىل «جاس سارباز» قوزعالىسى باسقا مەملەكەتتىك ورگاندار مەن قوعامدىق ۇيىمدارمەن بىرلەسىپ, رەسپۋبليكالىق دەڭگەيدە جاستاردى اسكەري-پاتريوتتىق تاربيەلەۋدە 130 ءتۇرلى ءىس-شارا وتكىزدى. اتالعان شارالار نەگىزىنەن قازاقستاان رەسپۋبليكاسى قارۋلى كۇشتەرىنىڭ 25 جىلدىعى شەڭبەرىندە وتكىزىلگەنىن اتاپ وتكەن ءجون.
وسى شارالاردىڭ ىشىندە كولەمى جاعىنان ۇلكەن «ايبىن» حالىقارالىق اسكەري-پاتريوتتىق جاستار جيىنى بولعانى داۋسىز. اۋداندىق, قالالىق, وبلىستىق دەڭگەيدە وتكەن ىرىكتەۋ تۋرلارىنا بارلىعى 25 000 بالادان تۇراتىن مىڭنان استام كلۋب قاتىستى. حالىقارالىق جيىنعا وبلىستىق ىرىكتەۋدەن وزا شاپقان كلۋبتار قاتىسىپ, ءوز وڭىرلەرىنىڭ نامىسى ءۇشىن باق سىناستى.
اپتا بويى جاستاردى قازاقستاندىق پاتريوتيزم رۋحىندا تاربيەلەۋ بويىنشا يدەولوگيالىق جۇمىستار جۇرگىزىلدى. مادەني-دەمالىس شارالارى, كونتسەرتتەر, الاۋ جانىنداعى كەشتەر ۇيىمداستىرىلدى. بوزبالالارىمىز بەن قىزدارىمىز سپورتتىڭ اسكەري-قولدانبالى تۇرلەرى بويىنشا جانە اسكەري-دالالىق تاكتيكالىق ويىنداردا, «مەنىڭ روبوتىم» بايقاۋى مەن «تانك ۇرىسى» كومپيۋتەرلىك ويىندارىندا سىنعا ءتۇستى.
جاس پاتريوت وبرازىن قالىپتاستىرۋ مەن جاستاردىڭ شىعارماشىلىعىن دامىتۋدا جىل سايىن رسەپۋبليكالىق دەڭگەيدە وتكىزىلەتىن «جاس ۇلان» جاۋىنگەر اندەرىنىڭ فەستيۆالى دە ايرىقشا ءرول اتقارادى. ءوز تاريحىن 1997 جىلدان الاتىن فەستيۆال قوعامدا تانىمال بولىپ ۇلگەردى. بيىل وتكىزىلگەن فەستيۆال قازاقستاندىق كومپوزيتورلاردىڭ وتان تۋرالى ارميا تۋرالى شىعارمالارىنىڭ كوپتەپ ورىندالۋىمەن قۇندى جانە جىل وتكەن سايىن جاستاردىڭ قىزىعۋشىلىعىنىڭ ارتىپ كەلە جاتقانىن كورسەتتى. ءان فەستيۆالىنىڭ قورىتىندى كەزەڭىنە ەلىمىزدىڭ بارلىق وڭىرىنەن 212 وقۋشى قاتىستى.
كادەتتىك سىنىپتاردى اشۋ «جاس سارباز» قوزعالىسى قىزمەتىنىڭ باسىم باعىتتارىنىڭ ءبىرى بولىپ وتىر. قازىرگى تاڭدا ەلىمىز بويىنشا 101 كادەتتىك سىنىپ اشىلعان. وندا ءۇش مىڭعا جۋىق بالا ءبىلىم الۋدا.
كادەتتىك سىنىپتاردىڭ تاربيەلەنۋشىلەرى ومىرگە نەعۇرلىم بەيىمدەلگەن, ولار نەگىزگى پاندەرمەن بىرگە اسكەري ماماندىقتىڭ قىر-سىرىن, قول جەكپە-جەگى ۇرىسىنىڭ ادىستەرىن, شەت تىلدەرىن جانە ەتيكانى وقيدى. بۇل سىنىپتاردىڭ تاربيەلەنۋشىلەرىنىڭ ءبارى وقۋ وزاتتارى.
جەرگىلىكتى اتقارۋشى ورگاندارمەن بىرلەسىپ, ءداستۇرلى تۇردە اسكەري-پاتريوتتىق اكتسيالار, بايقاۋلار, ۆيكتورينالار, اسكەري-دالالىق ويىندار, اسكەريلەندىرىلگەن ەستافەتالار, «اشىق ەسىك كۇندەرى», «شاقىرىلۋشى كۇنى», «جاس ارمياشى كۇنى», «قازاقستان اسكەرىندەگى ءبىر كۇن», «اق نايزا», «ۇلان», «الاۋ», «باتىر», «جاس ۇلان» جانە تاعى باسقا شارالار ءوتىپ تۇرادى.
جىل سايىن وقۋ ورىندارىندا «ەرلىك ساباعى» وتكىزىلىپ كەلەدى. 2017 جىلى وسى ءىس-شارالارعا التى مىڭنان استام اسكەري قىزمەتشى تارتىلدى.
ۇلتتىق اسكەري-پاتريوتتىق ورتالىق ءۇشىن پارلامەنت دەپۋتاتتارىمەن, مەملەكەتتىك ورگانداردىڭ باسشىلارىمەن, قازاقستان قارۋلى كۇشتەرىنىڭ ارداگەرلەرىمەن جاستاردىڭ كەزدەسۋىن ۇيىمداستىرۋ يگى داستۇرگە اينالىپ كەلەدى. 2017 جىلعى 23 قاراشادا قازاقستان رەسپۋبليكاسى قارۋلى كۇشتەرىنىڭ ۇلتتىق اسكەري-پاتريوتتىق ورتالىعىندا پارلامەنت سەناتى حالىقارالىق قاتىناستار, قورعانىس جانە قاۋىپسىزدىك كوميتەتىنىڭ ءتورايىمى داريعا نازارباەۆانىڭ تورايىمدىعىمەن اسكەري-پاتريوتتىق جۇمىستاردى ودان ءارى جەتىلدىرۋ ماسەلەلەرى جونىندەگى ۆەدومستۆوارالىق كەزدەسۋ بولىپ ءوتتى.
اتالعان شاراعا پارلامەنت سەناتى مەن ءماجىلىسىنىڭ دەپۋتاتتارى, مەملەكەتتىك ورگاندار مەن الەۋەتتى قۇرىلىمداردىڭ باسشىلارى, اسكەري-پاتريوتتىق كلۋبتار مەن كادەتتىك سىنىپتاردىڭ تاربيەلەنۋشىلەرى قاتىستى.
كەزدەسۋدىڭ قورىتىندىسى بويىنشا شاراعا قاتىسۋشىلار قازاقستان رەسپۋبليكاسىندا اسكەري-پاتريوتتىق جۇمىستاردى ودان ءارى جەتىلدىرۋ ماسەلەلەرى بويىنشا ىنتىماقتاستىق پەن ءوزارا ءىس-قيمىل تۋرالى مەموراندۋمعا قول قويدى.
كەزدەسۋدە ءسوز العان داريعا نازارباەۆا جاستاردىڭ بويىندا جوعارى رۋحاني-پاتريوتتىق ساپا بورىش سەزىمى مەن ازاماتتىق جاۋاپكەرشىلىكتى قالىپتاستىرۋ بۇل بارلىق مەملەكەتتىك ورگانداردىڭ, جاستار ۇيىمدارىنىڭ, وتباسى مەن قوعامنىڭ اتقاراتىن جۇمىسى دەپ اتاپ وتكەن بولاتىن. كەزدەسۋدە داريعا نازارباەۆا «جاس سارباز» رەسپۋبليكالىق بالالار مەن جاستاردىڭ اسكەري-پاتريوتتىق قوعامدىق قوزعالىسىنىڭ ءتورايىمى بولىپ سايلاندى.
قارۋلى كۇشتەردەگى اسكەري-پاتريوتتىق جۇمىستار اسكەري قىزمەتشىلەر مەن وسكەلەڭ ۇرپاقتى پاتريوتيزم مەن وتانعا دەگەن ماحاببات سەزىمىندە تاربيەلەۋگە باعىتتالسا, ۇلتتىق اسكەري-پاتريوتتىق ورتالىعى ەلىمىزدەگى جاستارعا اسكەري-پاتريوتتىق تاربيە بەرۋدەگى باستى ورتالىق بولىپ وتىر.
مۇحامەدجان تالاسوۆ,
گەنەرال-مايور
قازاقستان رەسپۋبليكاسى
قارۋلى كۇشتەرى باس شتابى
باستىعىنىڭ ورىنباسارى