تاراز قالاسىنداعى «تاراز-ارەنا» سپورت سارايىندا ەركىن كۇرەستەن ەرەسەكتەر اراسىندا مەملەكەت جانە قوعام قايراتكەرى دىنمۇحامەد قوناەۆتى ەسكە الۋعا ارنالعان حالىقارالىق تۋرنير ءوتتى. جارىسقا قازاقستان رەسپۋبليكاسىنىڭ وبلىستارىنان جانە جاپونيا, پولشا, ۋكراينا, رەسەي, برازيليا, موڭعوليا, گرۋزيا, بەلارۋس, ازەربايجان, تاجىكستان, قىرعىزستان جانە وزبەكستان مەملەكەتتەرىنىڭ قۇراما كوماندالارىنان 168 سپورتشى قاتىسىپ, باق سىناستى. قاتىسۋشىلار 57 كەلىدەن باستاپ 125 كەلى سالماق دارەجەلەرىندە سىنعا ءتۇستى.
جارىستىڭ وتۋىنە قازاقستان رەسپۋبليكاسى گرەك-ريم, ەركىن جانە ايەلدەر كۇرەس فەدەراتسياسى, جامبىل وبلىسى اكىمدىگىنىڭ دەنە شىنىقتىرۋ جانە سپورت باسقارماسى, جامبىل وبلىسىنىڭ گرەك-ريم, ەركىن جانە ايەلدەر كۇرەس فەدەراتسياسى باسشىلىق ەتتى. سونداي-اق, «التايس گرۋپ» جاۋاپكەرشىلىگى شەكتەۋلى سەرىكتەستىگى جارىستىڭ وتۋىنە دەمەۋشىلىك كورسەتتى. قازاقستان رەسپۋبليكاسىنىڭ ۇلتتىق قۇراما كومانداسى ويداعىداي ناتيجە كورسەتىپ, ەلىمىزدىڭ ابىرويىن ارتتىردى. ناتيجەسىندە 86 كەلى سالماقتا الماتىلىق ادىلەت داۋلانباەۆ پەن 97 كەلى سالماقتا پاۆلودارلىق مامەد يبراگيموۆ 1 ورىندى جەڭىپ الدى. ال 61 كەلى سالماقتا اقتوبەلىك نۇريسلام ساناەۆ پەن 74 كەلى سالماقتا الماتىلىق بولات ساقاەۆ 2 ورىندى يەلەنسە, 57 كەلى سالماقتا وڭتۇستىكقازاقستاندىق قۋاتبەك مۇحامبەت, 65 كەلى سالماقتا جامبىلدىق مەيىرجان اشيروۆ جانە 61 كەلى سالماقتا قوستانايلىق تيمۋر ايتقۇلوۆ 3 ورىن بيىگىنەن كورىندى.
حاميت ەسامان,
«ەگەمەن قازاقستان»
جامبىل وبلىسى