24 قاراشا كۇنى ورال قالاسىنا جۇمىس ساپارىمەن كەلگەن قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا جۇمىسپەن قامتۋ ورتالىعىندا بولىپ, 2018 جىلدىڭ 1 قاڭتارىنان باستاپ ەلىمىزدە الەۋمەتتىك ەڭبەك سالاسىن جەتىلدىرۋگە باعىتتالعان كەشەندى شارالارعا دايىندىق بارىسىن تەكسەردى.
تامارا دۇيسەنوۆا ورال قالالىق ەڭبەكپەن قامتۋ ورتالىعىن ارالاپ, ەلەكتروندى كەزەكتىڭ تيىمدىلىگىن, كەلۋشىلەرگە قولايلى جاعداي جاسالۋىنا پارمەن بەردى. جاڭا جىلدان باستاپ از قامتىلعان وتباسىلارىنا مەملەكەتتىك اتاۋلى الەۋمەتتىك كومەك بەرۋ ءتارتىبى وزگەرەتىنىن, وعان دايىندىقتى بۇگىننەن باستاپ قولعا الۋ قاجەتتىگىن مينيستر جەرگىلىكتى قىزمەتكەرلەرگە ناقتى تاپسىردى.
بۇدان كەيىن تامارا قاسىمقىزى «ورال «زەنيت» زاۋىتىندا» بولىپ, وڭىردەگى ءىرى مەكەمە-كاسىپورىن باسشىلارىمەن كەزدەستى. ۇجىمىندا 500-دەن اسا ادام قىزمەت ەتەتىن ءىرى كاسىپورىنداردىڭ سانى باتىس قازاقستان وبلىسىندا 23 ەكەن. ەلىمىزدە قولعا الىنعان مودەرنيزاتسيا, كاسىپورىندارعا جاڭا تەحنولوگيانىڭ جاپپاي ەنگىزىلۋى اتالعان ءىرى كاسىپورىنداردا جۇمىس قولىن ازايتىپ, بىلىكتى مامانداردىڭ جۇمىسسىز قالۋىنا سوقتىرۋى مۇمكىن. مۇنىڭ الدىن الماسا بولمايدى. سوندىقتان, ەلباسى جولداۋىنان تۋىندايتىن تاپسىرمالاردى جۇزەگە اسىرۋ, سونىڭ ىشىندە الەۋمەتتىك ەڭبەك سالاسىن جاڭعىرتۋداعى كادرلار اعىنىن باسقارۋ ماقساتىندا ورال قالاسىندا دا وڭىرلىك شتاب قۇرىلعان. بولاشاقتا كەزدەسۋى مۇمكىن قيىندىقتاردىڭ الدىن الۋ ءۇشىن «جول قارتاسى» جاسالىپ, وڭىردەگى جۇيە قالىپتاستىرۋشى كاسىپورىندارىنا ۇسىنىلدى. قازىردىڭ وزىندە 9 كاسىپورىن وسى «جول كارتاسىنا» قول قويعان.
- الدىمىزدا تۇرعان ۇلكەن ماسەلە – ەلىمىزدە ءۇشىنشى جاڭعىرۋ ستراتەگياسىن جۇزەگە اسىرۋ نەگىزىندە جاڭا تەحنولوگيالاردى ەنگىزۋ بولىپ وتىر. ال ول دەگەنىمىز, كاسىبي مامانداردى تالاپ ەتەتىن بولادى. ەلىمىزدەگى جاڭعىرتۋ ستراتەگياسى, ءبىر جاعىنان, جاڭا زاماناۋي مۇمكىندىكتەرگە قول جەتكىزىپ, جۇمىس ساپاسىن جاقسارتسا, ەكىنشى جاعىنان, جۇمىس كۇشىن كوپ تالاپ ەتپەيدى. ءىرى كاسىپورىندار جاڭا تەحنولوگيالاردى ەنگىزگەندە بىرقاتار جۇمىسشىلار ەڭبەكتەن بوساتىلۋى مۇمكىن. تيىسىنشە جاڭا زاماناۋي قۇرىلعىلاردى مەڭگەرگەندەر جۇمىسقا الىنادى. سوندىقتان جاقىندا مىڭداعان كاسىپورىنداردا جۇرگىزىلگەن ساۋالناما ناتيجەسىندە ولاردىڭ 48 پايىزىنىڭ جاڭعىرتىلاتىندىعى انىقتالدى. جاڭعىرتىلاتىن كاسىپورىندار جۇمىس جاسايتىن ادامدار جۇمىستان بوساتۋعا نەمەسە قايتا دايارلىقتان وتكىزۋگە ءماجبۇر بولاتىندىقتارىن ايتىپ, مەملەكەتتەن قولداۋ سۇراعان بولاتىن. وسى ماقساتتا ەلىمىزدىڭ بارلىق وڭىرلەرىندە اشىلعان شتابتارمەن اقىلداسا كەلە, جول كارتاسىن جاساقتادىق. سول ارقىلى جاڭعىرتىلۋعا بايلانىستى قىسقارتۋعا ۇشىراعان جۇمىسشىلاردى قايتا دايارلىقتىن وتكىزۋ كوزدەلىپ وتىر. كاسىپورىن بەلگىلى ءبىر ادامدى قايتا وقۋعا جولداسا, ونىڭ وقۋ شىعىنىنىڭ 70 پايىزىن مەملەكەت وتەيدى. قالعان 30 پايىزىن اتالعان كاسىپورىننىڭ وزدەرى تولەيدى, - دەدى تامارا دۇيسەنوۆا.
وسى كەزدەسۋدە جەرگىلىكتى كاسىپورىن باسشىلارى وزدەرىنە كەزدەسىپ جاتقان قيىندىقتار تۋرالى ايتىپ ءوتتى. «زەنيت» زاۋىتى» اق-نىڭ باس ديرەكتورى ۆياچەسلاۆ ۆاليەۆ بيىلعى قازان ايىنان زاۋىتقا تۇسەتىن تاپسىرىس كولەمى ازايىپ كەتكەنىن مالىمدەدى. «ەگەر جەلتوقسان ايىندا جاعداي وزگەرمەسە, 260-تاي ادامدى جۇمىستان قىسقارتۋعا ءماجبۇر بولامىز» دەگەن زاۋىت باسشىسى «جول كارتاسى» شارتتارىنا سايكەس جۇمىسشىلاردى قايتا دايارلىقتان وتكىزىپ, قىزمەت باعىتىن وزگەرتۋ ناتيجەسىندە جۇمىس ورىندارىن ساقتاپ قالۋ ءۇشىن جاسالىپ جاتقان شارۋالار تۋرالى ايتىپ بەردى.
كەزدەسۋدە «باتىس قازاقستان ماشينا جاساۋ كومپانياسى» اق باس ديرەكتورىنىڭ ورىنباسارى ناتاليا فادينا, «باتىس سۋ ارناسى» جشس-نىڭ ديرەكتورى ەسەنجان شۋناەۆ, «باتىس قازاقستان ەلەكتر جەلىلەرىن تاراتۋ كومپانياسى» اق-نىڭ باس ديرەكتورى قۋات مۋسين وزدەرى باسقاراتىن ونەركاسىپ وشاقتارىنداعى قازىرگى احۋال تۋرالى بايانداپ, كوكەيكەستى ساۋالدارىنا ءمينيستردىڭ اۋزىنان ەگجەي-تەگجەيلى جاۋاپ الدى. ماسەلەن, «باتىس قازاقستان ماشينا جاساۋ كومپانياسى» اق 2016-2017 جىلدارى 300 ادامدى تۇراقتى جۇمىسقا قابىلداپ, 140 ادامدى قايتا دايارلاۋدان وتكىزگەن.
وسى جيىندا بىلىكتى مامانداردىڭ ءبىر وڭىردەن باسقا وڭىرگە قونىس اۋىستىرعان كەزىندە كورسەتىلەتىن الەۋمەتتىك قولداۋ, مەملەكەتتىك كومەك ماسەلەسى دە تالقىلاندى. مينيستر تامارا قاسىمقىزىنىڭ ايتۋىنشا, سولتۇستىك قازاقستان, شىعىس قازاقستان, قوستاناي, پاۆلودار وڭىرلەرىنە بارىپ قىزمەت ەتەمىن دەيتىن ماماندارعا كوشىپ-قونۋ ءۇشىن وتەماقى, پاتەر جالداۋ شىعىندارى بەرىلەدى. «بۇل تىزىمدە باتىس قازاقستان وبلىسى جوق, دەگەنمەن, ورالدىق كاسىپورىندار وزدەرىنە قاجەت ماماندى الدىرىپ, قايتا وقىتۋ, قايتا دايارلاۋ ىسىمەن اينالىسسا, وقىتۋ شىعىندارىنا مەملەكەت كومەكتەسۋگە ءازىر» دەدى مينيستر.
تاعى ءبىر ۇلكەن جيىن باتىس قازاقستان وبلىستىق ءماسليحاتى عيماراتىندا ءوتتى. مۇندا 12 اۋداننىڭ جانە بارلىق اۋىلدىق وكرۋگتەرىنىڭ اكىمى جينالىپ, ەڭبەك جانە حالىقتى الەۋمەتتىك قورعاۋ ءمينيسترىنىڭ ءوز اۋزىنان 2018 جىلدىڭ قاڭتارىنان باستالاتىن وزگەرىستەر تۋرالى ەستىپ, كەيبىر سۇراقتارىنا جاۋاپ الدى.
- جاڭا جىلدان باستاپ اتاۋلى الەۋمەتتىك كومەك تولەۋ ءتارتىبى جاڭا فورماتقا كوشەدى. ااك-ءنىڭ ءبىر ۇلگىسى بۇرىنعىشا قارجىلاي تولەۋ بولسا, ەندى وعان قوسا وتباسىندا جۇمىس جاسىنداعى ازاماتتارعا جۇمىس تاۋىپ بەرۋ, قايتا دايارلاۋ, وقىتۋ قىزمەتتەرى دە قوسىلادى. ياعني كومەككە مۇقتاج ادامدارمەن الەۋمەتتىك كەلىسىم-شارت جاسالىپ, ولاردى قۇر قارجىلاي قولداۋ عانا ەمەس, جۇمىسپەن قامتۋ, جاڭا ماماندىق الۋىنا, كاسىبىن اشۋىنا كومەكتەسۋ كوزدەلەدى, - دەدى تامارا دۇيسەنوۆا.
مينيستر ت.دۇيسەنوۆا بۇدان كەيىن ورال قالاسىنداعى بىرقاتار الەۋمەتتىك نىسانداردى ارالادى.
قازبەك قۇتتىمۇرات ۇلى,
«ەگەمەن قازاقستان»
سۋرەتتى تۇسىرگەن ايباتىر نۇراش