بەلگىلى جازۋشى, مەملەكەتتىك جانە حالىقارالىق فرانتس كافكا اتىنداعى سىيلىقتاردىڭ لاۋرەاتى تولەن ابدىكتىڭ 75 جاسقا تولۋىنا وراي قوستانايدا قۇرمەت كورسەتۋ كەشى وتتى. وعان زيالى قاۋىم وكىلدەرى, وبلىس باسشىلارى, جازۋشىنىڭ جاس وقىرماندارى قاتىستى.
كەشتە الدىمەن وبلىس اكىمىنىڭ ورىنباسارى مارات جۇندىباەۆ وبلىس اكىمى ارحيمەد مۇحامبەتوۆتىڭ قۇتتىقتاۋ حاتىن وقىپ بەرىپ, جازۋشىعا شاپان جاۋىپ, سىي-سياپات جاسادى. مۇنان كەيىن كەشتى جۇرگىزۋ تىزگىنىن وبلىستىق قوستاناي تەلەارناسىنىڭ ديرەكتورى ەركىن مۇحامەدجانوۆ الدى. كەش ادەتتەگى توي يەسىن ماقتاۋ-ماداقتاۋ داستۇرىنەن وزگەرەك, جازۋشىمەن سۇحبات تۇرىندە ءوتتى. جۇرگىزۋشى جازۋشى شىعارمالارىنداعى كەيىپكەرلەر تاريحى مەن تاعدىرى, شىعارمالارىنىڭ تۋ تاريحى, ايتايىن دەگەن ماقساتى تۋرالى سۇراقتار قويىپ, تولەن ابدىكتىڭ ءوزىن اڭگىمەگە تارتىپ وتىردى. كەشكە قاتىسۋشىلار جازۋشىنىڭ ويلى دا ماعىنالى قازاقى اڭگىمەسىنە سۋسىندادى.
كەشتە تولەن اعامەن بىرگە كەلگەن بەلگىلى جازۋشى, مەملەكەتتىك سىيلىقتىڭ لاۋرەاتى قاجىعالي مۇحامبەتقاليەۆ, قوستاناي وبلىستىق ارداگەرلەر كەڭەسىنىڭ توراعاسى كەنجەبەك ۇكين, جازۋشىنىڭ اۋىلداس اعايىن-اعاسى كاكىمجان كاربوزوۆ جازۋشىنى مەرەيجاسىمەن قۇتتىقتاپ, ونىڭ شىعارماشىلىعىنا تابىس تىلەدى. جانكەلدين اۋدانىنىڭ اكىمى شوتا وسپانوۆ جەرلەس جازۋشىعا «جانكەلدين اۋدانىنىڭ قۇرمەتتى ازاماتى» لەنتاسىن تاپسىردى.
«تۋعان جەر, تۋعان جەردىڭ توپىراعى» دەگەن ۇعىمدار وتە كيەلى. تولەن 50 جاسقا تولعان مەرەيتويىن ءوزىنىڭ تۋعان اۋىلى كولقامىستا وتكىزدى. سوندا ءۇش شالدىڭ ورتاسىنداعى جالعىز ۇل بولىپ وسكەن تولەننىڭ ءومىر جاسىن ۇزاق ەت دەپ, تۋعان جەردىڭ توپىراعىنا اۋناتىپ الىپ ەدىك. سول تىلەگىمىز قابىل بولىپ, تولەنجان 75 جاسقا دا تولىپ وتىر. الدا دا ءومىر جاسىن ۇزاق ەتسىن. ءبىز بالا كەزىمىزدە بىرگە وستىك. اعايىنبىز. ءۇش وتاسىنىڭ ورتاسىنداعى جالعىز ۇلدىڭ قالاي وسكەنى كوز الدىمىزدا, ونىڭ شىعارمالارىنىڭ بارلىعىن شاعىپ وقىماعان بالا-شاعا, ۇلكەن جوق اۋىلدا. بۇكىل قازاقستانعا عانا ەمەس, ودان دا سىرت جەرلەرگە بەلگىلى قالامگەر بولعان تولەن ءبىزدىڭ ماقتانىشىمىز, بۇكىل اۋىل ونىڭ تىلەگىن تىلەيدى» دەپ تەبىرەنە سويلەدى اعايىن اعاسى كاكىمجان كاربوزوۆ اقساقال.
جەرلەستەرىمەن قاۋىشۋ كەشىن جازۋشىنىڭ ءوزى قورىتىندىلادى. جەرلەستەرىنە راحمەت ايتتى. كەش ادەتتەگىدەي ءان مەن كۇيمەن ورەنەكتەلىپ وتىردى.
ءنازيرا جارىمبەت
«ەگەمەن قازاقستان»
قوستاناي