جامبىل ۆاگون دەپوسىندا قىرىق جىلدان استام ۋاقىت ەڭبەك ەتكەن قىزمەتكەر تەميريان شاڭعاراەۆ ءجۇز جاسقا تولدى. ۇلى وتان سوعىسى مەن تەمىر جول ارداگەرىن وڭىردەگى تەمىر جول بولىمشەسىنىڭ باسشىلىعى ۇجىم اتىنان قۇتتىقتاپ, ىستىق لەبىزدەرىن ءبىلدىردى.
«جامبىل جول بولىمشەسىندە ۇلى جەڭىستى جاقىنداتۋعا اتسالىسقان ارداگەرلەردىڭ سانى 14 ادامدى قۇرايدى. سۇراپىل سوعىستا وت كەشكەن كوزى ءتىرى جاۋىنگەرلەردىڭ ءبىرى – قارت تەمىرجولشى تەميريان شاڭعاراەۆ عاسىرلىق مەرەيتويىن اتاماق. كۇن ساناپ قاتارى سيرەگەن وسىنداي قازىنالارىمىزدى قۇرمەتتەۋ – ۇرپاققا پارىز», دەيدى قارت ساربازدى قۇتتىقتاي بارعان «قۇرمەتتى تەمىرجولشى», جامبىل جول بولىمشەسى ارداگەرلەر كەڭەسىنىڭ توراعاسى ساعىمبەك اقشالوۆ.
ءجۇز جاسقا تولعان اقساقال اياعىن نىق باسىپ, قوناقتارىن قوشەمەتپەن قارسى الدى. 1917 جىلى باشقۇرتستاندا تۋىپ, 19 جاسىندا اسكەر قاتارىنا الىنعان سارباز جەڭىس تۋىن كوتەرۋگە ۇلەس قوسقانىن ماقتان ەتەدى. سوعىستان سوڭ ەلگە امان-ەسەن ورالىپ, جامبىل ۆاگون پايدالانۋ دەپوسىندا زەينەتكە شىققانعا دەيىن تاباندى ەڭبەك ەتەدى.
«اكەمىز توعىز پەرزەنت ءسۇيىپ, بارلىعىمىزدى اياقتاندىرۋ ءۇشىن ايانباي تەر توكتى. ءوزى وتە ەڭبەكقور, ءتىپتى دەنساۋلىعى سىر بەرسە دە ءدارى-دارمەككە جۇگىنبەيدى. وسى جاسىنا دەيىن اق حالاتتىلاردىڭ كومەگىنە ءزارۋ بولعان ەمەس. الايدا قازىرگى كەزدە ءجۇرىپ-تۇرۋى قيىنداعان سوڭ مەنىڭ ۇلىم جاعدايىن جاساپ وتىر», دەدى قىزى دانيا.
اسحات رايقۇل, «ەگەمەن قازاقستان»