قازىرگى كەزدە قاريالاردىڭ ايتار اقجارىلقاپ ءسوزى از با؟ جاستارعا ۇلگى ۇسىنىپ, ىزگىلىك پەن يگىلىككە ءجون سىلتەۋدە قاريالار الدىندا تۇرعان ماڭىزدى مىندەتتەر – اردىڭ ءىسى, ابىرويدىڭ قارەكەتى. جاستار بويىنداعى جامان قاسيەتتەردى دەر كەزىندە بايقاپ, سانالى سوزىمەن, ساليقالى تاجىريبەسىمەن ءجون كورسەتۋدە اقساقالدىق قاسيەت اتتان تۇسپەۋى كەرەك. ابىز ابايدا: «اقساقالدار ايتپادى دەپ جۇرمەسىن» دەگەن ءسوز بار. ەل الدىنداعى ۇلى مىندەتتى ابايشا ءتۇسىنىپ, اقىل-وي تارازىسىن تەڭ ۇستاۋدا قاريالارىمىز قاتارىن سيرەتپەسە ەكەن دەپ تىلەيمىز.
ءيا, بۇل ەلباسى ن.نازارباەۆتىڭ « ۇلى دالا ۇلاعاتتارى» اتتى ەڭبەگىنىڭ التىنشى بولىمىنەن الىنعان ءۇزىندى. وڭتۇستىك قازاقستان وبلىسىنىڭ اكىمى جانسەيىت تۇيمەباەۆ وڭىرىمىزدەگى اقساقالدار مەن زيالى قاۋىم وكىلدەرىنىڭ باسىن قوسىپ وتكىزگەن دوڭگەلەك ۇستەل بارىسىندا دا جاستارعا ءجون كورسەتۋدە اقساقالدىق قاسيەتتىڭ اتتان تۇسپەگەنىن قالايتىنىن جەتكىزدى. سونداي-اق اعا بۋىنعا ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىن جۇزەگە اسىرۋ ماقساتىندا 66 جوبا بويىنشا 121 ءىس-شارانى جۇزەگە اسىرۋ قولعا الىنعانىن ايتىپ, اتقارىلعان جۇمىستار جونىندە اقپارات بەردى.
«سىزدەردى ەلباسىمىزدىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىن بىرلەسە جۇزەگە اسىرۋعا شاقىرامىن. الداعى كەزدە ءبىز دە تالاپتى كۇشەيتە تۇسەمىز. وبلىستاعى 720 مىڭنان استام جىلجىمايتىن م ۇلىكتىڭ كەلبەتىن كورىكتەندىرەمىز. البەتتە, بۇل رەتتە سىزدەردىڭ كومەكتەرىڭىزگە سۇيەنەتىن بولامىز. جاستارىمىزدىڭ ءتالىم-تاربيەسىنە, بىلىمىنە اسا كوڭىل ءبولۋىمىز قاجەت. وسى تۇرعىدا سىزدەردىڭ قوسار ۇلەستەرىڭىز وراسان زور. «قارتى بار ەل – قازىنالى ەل» دەگەندەي, سىزدەر ءبىزدىڭ قازىنامىز بولۋمەن قاتار, باعىت-باعدار بەرەتىن دانالىقتىڭ سارقىلماس بۇلاعىسىزدار», دەدى جانسەيىت قانسەيىت ۇلى.
وبلىستا ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىن جۇزەگە اسىرۋ ماقساتىندا 844 ەلدى مەكەندە 3185 ءىس-شارا وتكىزىلگەن. ماقالادا ەرەكشە اتالعان جوبالاردى جۇزەگە اسىرۋعا 2022 جىلعا دەيىن 16,2 ملرد تەڭگە ءبولۋ جوسپارلانىپ وتىر. بۇگىنگى كۇندە كاسىپكەرلەر, دەمەۋشىلەر تاراپىنان جالپى 30 ملرد 350 ملن تەڭگەنى قۇرايتىن 529 وڭىرلىك جوبا قولعا الىنىپ وتىر.
بۇدان بولەك, «رۋحاني قازىنا» كىشى باعدارلاماسى بويىنشا «اجارلى ءۇي – ىرىستى» جوباسى اياسىندا 120-دان استام بەلسەندى, ەرىكتى جاستار ەلدى مەكەندەردى اباتتاندىرۋ ماقساتىندا كومەككە ءزارۋ 543 وتباسىنىڭ اۋلالارىن تازالاپ, قورشاۋلارىن, قاقپالارىن سىرلاپ, اۋىل اجارىنىڭ ارتۋىنا ءوز ۇلەستەرىن قوسقان. «رۋحاني جاڭعىرۋ: بەرەكە باسى – بىرلىك» تاقىرىبىندا وتكەن كەزدەسۋدە وبلىستىق ارداگەرلەر كەڭەسىنىڭ توراعاسى جەڭىسبەك ماۋلەنقۇلوۆ بايانداما جاساپ, ەلدى بىرلىك پەن ىنتىماققا شاقىرۋدا ارداگەرلەردىڭ ەڭبەگى وراسان ەكەنىن اتاپ ءوتتى. سونداي-اق ارداگەرلەردى باعدارلامالىق ماقالانىڭ ەل اراسىندا ءوز دەڭگەيىندە ناسيحاتتالۋىنا كۇش سالۋعا شاقىردى.
عالىمجان ەلشىباي,
«ەگەمەن قازاقستان»