پارلامەنت سەناتى حالىقارالىق قاتىناستار, قورعانىس جانە قاۋىپسىزدىك جونىندەگى كوميتەتىنىڭ توراعاسى داريعا نازارباەۆانىڭ جەتەكشىلىگىمەن قازاقستان قارۋلى كۇشتەرىنىڭ ۇلتتىق اسكەري-پاتريوتتىق ورتالىعىندا اسكەري-پاتريوتتىق جۇمىستى جەتىلدىرۋ جونىندەگى ۆەدومستۆوارالىق كەزدەسۋ ءوتتى, دەپ حابارلادى پالاتانىڭ ءباسپاسوز قىزمەتى.
جيىندا سويلەگەن سەناتور د.نازارباەۆا جاستار اراسىندا پاتريوتتىق تاربيە جۇرگىزۋ ارقىلى جوعارى رۋحاني - پاتريوتتىق قاسيەتتەردى, وتان الدىنداعى مىندەتتەرىن تەرەڭ سەزىنۋ مەن ازاماتتىق جاۋاپكەرشىلىك سەزىمىن قالىپتاستىرۋ – مەملەكەتتىك ورگانداردىڭ, جاستار ۇيىمدارىنىڭ, وتباسى مەن قوعامنىڭ ماقساتتى جانە جۇمىلا ارەكەت ەتۋىن تالاپ ەتەتىنىن اتاپ ءوتتى.
«وقۋشىلاردىڭ اقىل-وي, رۋحاني جانە كۇش-قۋات الەۋەتىن ىسكە اسىرا الاتىن مەكتەپتەردەگى اسكەري-پاتريوتتىق كلۋبتار وسى باعىتتاعى ماڭىزدى ميسسيانى اتقارادى. مەكتەپ ىشىندەگى وسىنداي قۇرىلىمدار سانى جىلدان-جىلعا ارتىپ كەلەدى. بۇل بولاشاق پاتريوتتار تاربيەلەۋگە وتە جاقسى مۇمكىندىك جانە ونى بارىنشا پايدالانۋعا بولادى», - دەدى سەنات كوميتەتىنىڭ توراعاسى. د.نازارباەۆا اسكەري جاس ۇلاندار قۇرىلىمدارىن قولداۋ مەن دامىتۋ بويىنشا بىرىڭعاي رەسپۋبليكالىق باعدارلاما قۇرۋدى ۇسىندى.
بۇگىنگى كۇنى ەلىمىز بويىنشا 101 كادەت سىنىپتارى جۇمىس ىستەيدى, وندا 2800-دەن استام بالا وقيدى. كادەت سىنىپتارىنىڭ وقۋشىلارى اسكەري ماماندىق نەگىزدەرىن, مەنتالدىق اريفمەتيكانى, بال بيلەرىن, جەكپە-جەك ادىستەرىن, شەت تىلدەرىن, ەتيكانى ۇيرەنەدى.
«مەملەكەت باسشىسىنىڭ تاپسىرمالارىن ورىنداۋ ماقساتىندا, سونداي-اق اعىمداعى جىلدىڭ اقپان ايىنداعى كەزدەسۋىمىزدىڭ ۇسىنىمدارىن نازارعا الا وتىرىپ, ءبىز مەملەكەتتىك ورگاندارمەن جانە قوعامدىق ۇيىمدارمەن جۇيەلى جۇمىس رەتىن قالىپتاستىردىق. كەزەكتى كەزدەسۋدىڭ ءوتىپ جاتقانى – وسى تابىستى ىنتىماقتاستىقتىڭ جارقىن مىسالى بولا الادى. بۇگىن جاستارعا اسكەري-پاتريوتتىق تاربيە بەرۋ جۇمىسىنا ارداگەرلەر ۇيىمدارىن جانە اسكەري قىزمەتكەرلەردىڭ وتباسىلارىمەن جۇمىس ىستەۋ جونىندەگى قىزمەتتەردى بەلسەندى تۇردە تارتامىز. ايماقتاعى جانە بۇكىل ەلدەگى اسكەري جاس ۇلاندار قوزعالىستارىن شوعىرلاندىرۋدا بارلىق وسى ورگاندار پىكىرلەسۋ الاڭدارى ءرولىن اتقارىپ وتىر», - دەپ اتاپ ءوتتى قورعانىس ءمينيسترى, گەنەرال-پولكوۆنيك ساكەن جاسۇزاقوۆ.
شاراعا پارلامەنت سەناتى مەن ءماجىلىسىنىڭ دەپۋتاتتارى, مەملەكەتتىك ورگاندار مەن قۇقىق قورعاۋ ورگاندارىنىڭ باسشىلارى, اسكەري-پاتريوتتىق كلۋبتار مەن كادەت سىنىپتارىنىڭ تاربيەلەنۋشىلەرى قاتىستى.
قورعانىس ءمينيسترى ساكەن جاسۇزاقوۆ حالىقارالىق قاتىناستار, قورعانىس جانە قاۋىپسىزدىك جونىندەگى كوميتەتىنىڭ توراعاسى داريعا نازارباەۆاعا «Eل قورعانى» ءبىرىنشى دارەجەلى ۆەدومستۆولىق مەدالىن تاپسىردى.
شارانىڭ قورىتىندىسى بويىنشا قاتىسۋشىلار ەلىمىزدەگى اسكەري-پاتريوتتىق جۇمىستى ودان ءارى جەتىلدىرۋ بويىنشا ىنتىماقتاستىق پەن ءوزارا ارەكەتتەستىك تۋرالى مەموراندۋمعا قول قويدى.