كەلەسى جىلى قاراعاندى وبلىسىنىڭ جۇرتشىلىعى اتاقتى ويشىل بۇقار جىراۋ قالقامان ۇلىنىڭ 350 جىلدىعىن اتاپ وتەدى. شارالارعا دايىندىق قازىردەن باستالىپ, بۇقار جىراۋ اۋدانىنىڭ اكىمدىگىندە ۇيىمداستىرۋ كوميتەتىنىڭ ءبىرىنشى وتىرىسى ءوتتى, دەپ جازادى Ruh.kz سايتىندا.
مەرەكەلىك شارالاردى 2018 جىلدىڭ تامىزىندا وتكىزۋ ۇسىنىلىپ, ول وتەتىن ورىندى اۋدان جۇرتشىلىعى ءالى تالقىلاۋ ۇستىندە. ناقتى شەشىمدى جەرگىلىكتى اقساقالداردىڭ پىكىرىنە سۇيەنە وتىرىپ جاساۋ كوزدەلىپ وتىر. مەرەيتويعا وراي «بۇقار جىراۋ» ەنتسيكلوپەدياسىن قايتا باسىپ شىعارۋ, رەسپۋبليكالىق ايتىس, عىلىمي-تاجىريبەلىك كونفەرەنتسيالار ۇيىمداستىرۋ, تەلەباعدارلامالار تسيكلىن جاساۋ جوسپارلانعان.
«وتىرىس بارىسىندا بۇگىنگى تاڭدا بۇقار جىراۋ تۋرالى بىردە-ءبىر پەسا مەن فيلم جوق ەكەنى اتاپ ايتىلدى. ۇيىمداستىرۋ كوميتەتىنىڭ وكىلدەرى تەك مەرەيتويلىق شارالار تۋرالى عانا ەمەس, سونىمەن قاتار اۋداننىڭ ەلدى مەكەندەرىن اباتتاندىرۋ قاجەتتىلىگىن دە تالقىلادى», دەلىنگەن حابارلامادا. ايتا كەتەيىك, بۇقار جىراۋ قالقامان ۇلىنىڭ 350 جىلدىق مەرەيتويىن وتكىزۋگە ارنالعان قوعامدىق قور قۇرىلاتىن بولدى.