«استانا» كومانداسىنىڭ باس باپكەرى ستانيمير ستويلوۆ ەۋروپا ليگاسىنىڭ توپتىق كەزەڭى اياسىندا يسپانيانىڭ «ۆيلياررەالىنا» قارسى ويىن جايلى وي ءبولىستى.
– بۇل تارتىسقا تولى, قيىن ويىن ەكەنى بەلگىلى. قازىر توپتا ءۇش كوماندانىڭ پلەي-وففقا شىعاتىن مۇمكىندىگى بار. مەن ىلعي دا يسپانيالىقتاردى فاۆوريت رەتىندە ساناپ كەلدىم. «ۆيلياررەال» يسپانيانىڭ ۇزدىك بەس كومانداسىنىڭ ءبىرى. بىرنەشە جىل بۇرىن يسپانيالىقتار ءبىزدىڭ وسال تۇستارىمىزدى اشىپ كورسەتكەن بولاتىن. ودان بەرى ءبىز ءبىراز تاجىريبە جينادىق. ەرتەڭ جانكۇيەرلەرىمىزدىڭ الدىندا بارىمىزدى سالاتىن بولامىز. قاجەت ناتيجەگە قول جەتكىزۋ ءۇشىن ايانىپ قالمايمىز.
– «اقجايىققا» قارسى ويىننان كەيىن سىياقى ماسەلەسى تۋرالى ءسوز قوزعاپ ەدىڭىز. سول ماسەلە قازىر شەشىمىن تاپتى ما؟ وسىعان بايلانىستى ويىنشىلاردىڭ كوڭىل-كۇيى تۋرالى وي بىلدىرسەڭىز.
– جاعداي ءالى وزگەرگەن جوق. ەشكىمنىڭ قارىزى تولەنبەدى. «سامۇرىق-قازىنادان» ازىرگە كەلىپ ەشكىم ەشنارسە تۇسىندىرمەدى. شاكىرتتەرىمنىڭ ويىندا نە بارىن بىلمەيمىن. بىراق بۇل ماسەلەگە قاراماستان ويىنشىلارىم ەرتەڭ جوعارى دەڭگەيدە ويناپ شىعادى دەپ ۇمىتتەنەمىن. قازاقستاندا ءبىر جىلدان استام ۋاقىت سىياقى الماعان جالعىز كوماندامىز دەپ ويلايمىن.
– Marca باسىلىمىنىڭ ءتىلشىسى «ۆيلياررەال» «استانادان» ۇتىلۋى مۇمكىن دەگەن اقپارات تارادى. ول ءتىلشى قانداي اسپەكتىلەرگە سۇيەنىپ ايتتى دەپ ويلايسىز؟
– شىنىمدى ايتسام, بىزدە ايتارلىقتاي ارتىقشىلىق جوق. «ۆيلياررەال» قاي جاعىنان بولسىن بىزدەن دەڭگەيى جوعارى. «استانا» ويىنشىلارى ەۋروپالىق فۋتبولدىڭ دەڭگەيىنە ساي ونەر كورسەتە الادى. بالكىم سول شىعار! سونداي-اق, ەڭ باستى ارتىقشىلىعىمىز – جانكۇيەرلەرىمىزدىڭ الدىندا ونەر كورسەتەمىز.
– قازاقستاندا ايتارلىقتاي ناتيجە كورسەتپەسە دە جالاقىسىن دا, سىياقىسىن دا ۋاقىتىندا الىپ وتىرعان كوماندالار بار. ەلىمىزدى ەۋروپاعا تانىتىپ جۇرگەن كوماندانىڭ مۇنداي جاعدايعا تاپ بولعانى وكىنىشتى. كلۋب باسشىلىعى بيىل عانا سىياقى تولەمەي وتىر ما؟
– شىنىمدى ايتسام, سىياقى ماسەلەسى ماعان دا ۇناماي وتىر. مۇنداي ماڭىزدى ويىن الدىندا ءبىز قارجى تۋرالى ءسوز قوزعاپ وتىرمىز. كەز كەلگەن باپكەر مۇنداي جاعدايدى قالاماس ەدى. بۇل ماسەلە تەزىرەك شەشىمىن تابۋى ءتيىس. ءبىز الداعى ويىنعا كوبىرەك كوڭىل ءبولۋىمىز كەرەك. ەرتەڭگى ويىننىڭ ناتيجەسىنە بۇل ماسەلە كەدەرگى كەلتىرمەيدى دەپ ۇمىتتەنەمىن.
– «استانانىڭ» ويناماعانىنا 20 كۇندەي ۋاقىت بولدى. ال يسپانيالىقتار كەرىسىنشە ءار ءۇش-ءتورت كۇن سايىن الاڭعا شىعىپ ءجۇر. بۇل قيىندىق تۋدىرماي ما؟
– 20 كۇن شىنىمەن ۇزاق ۋاقىت. وسى ۋاقىت ارالىعىندا كوماندا ءوز ريتمىنەن جاڭىلىپ قالۋى مۇمكىن. بۇل ءۇشىن مەن دە الاڭداپ وتىرمىن. ەگەر ءجيى الاڭعا شىعىپ تۇرسا, دەڭگەيىن دە ۇستاپ وتىرار ەدى. «ۆيلياررەالدىڭ» بۇل تۇرعىدا جاعدايى جاقسىراق. فۋتبولشىلارى ۇلتتىق قۇرامانىڭ دا ويىندارىنا قاتىستى. بىراق ەرتەڭ كوماندام ءوز مىنەزىن كورسەتىپ, ءتيىستى دەڭگەيدە وينايدى دەپ ۇمىتتەنەمىن. ءبىز مۇنداي جاعدايعا ءبىرىنشى رەت تاپ بولىپ وتىرعان جوقپىز.
ايتا كەتەيىك, «استانا» مەن «ۆيلياررەال» اراسىنداعى كەزدەسۋ ەرتەڭ, ياعني 23 قازان كۇنى «استانا-ارەنا» ستاديونىندا 22:00-دە باستالادى.
ايان ءابدۋالي, «ەگەمەن قازاقستان»