دەنساۋلىق ساقتاۋ سالاسىن تسيفرلاندىرۋ تۋرالى بۇگىن ۇكىمەتتىڭ ءباسپاسوز ورتالىعىندا وتكەن ءباسپاسوز كونفەرەنتسياسىندا دەنساۋلىق ساقتاۋ ۆيتسە-ءمينيسترى الەكسەي تسوي ايتىپ بەردى.
دەنساۋلىق ساقتاۋدى تسيفرلاندىرۋ مەملەكەت باسشىسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋى اياسىندا جۇزەگە اسىرىلۋدا, وعان قوسا «تسيفرلىق قازاقستان» مەملەكەتتىك باعدارلاماسىنىڭ جوباسىمەن تولىق سايكەستەندىرۋ قامتاماسىز ەتىلدى.
تسيفرلىق دەنساۋلىق ساقتاۋدىڭ ماقساتتى ۇلگىسى ناۋقاستار تۋرالى مالىمەتتەر, سىرقاتنامالار بار بىرىڭعاي اقپاراتتىق كەڭىستىك قۇرۋدى كوزدەيدى. ناۋقاستار ەلەكتروندى دەنساۋلىق پاسپورتى, دەنساۋلىق ساقتاۋدىڭ ەلەكتروندى قىزمەتتەرىنە قولجەتىمدىلىك ارقىلى جەكە باسىنىڭ دەنساۋلىعى تۋرالى مالىمەتكە قول جەتكىزە الادى جانە مەديتسينالىق قىزمەتتەر الۋ ساپاسى تۋرالى كەرى بايلانىستى ۇسىنادى.
دارىگەر, ءوز كەزەگىندە, ءوز ناۋقاستارىنىڭ دەنساۋلىعى تۋرالى شوعىرلاندىرىلعان مالىمەتكە قولجەتىمدىلىكتىڭ ارقاسىندا قاشىقتىقتان كەڭەس بەرە الادى. مەديتسينالىق ۇيىمدار ءوز جۇمىسىنىڭ رەيتينگىن ەسكەرەدى, احۋالدىق پانەل مەن ينديكاتورلارعا قولجەتىمدىلىككە يە بولادى, بۇل قىزمەتتەردى ۇسىنۋ ساپاسىن ۋاقىتىلى ارتتىرۋعا مۇمكىندىك بەرەدى. سونداي-اق الەۋمەتتىك مەديتسينالىق ساقتاندىرۋ قورىنىڭ جانە قوعامدىق دەنساۋلىق قىزمەتىنىڭ جۇمىسى اۆتوماتتاندىرىلادى.
ۆيتسە-مينيستر سونداي-اق وڭىرلەردە جۇرگىزىلىپ جاتقان جۇمىستار تۋرالى ايتتى. قازىرگى ۋاقىتتا وڭىرلەردە دەنساۋلىق ساقتاۋدى تسيفرلاندىرۋدىڭ ءۇش ۇدەرىستىك ينديكاتورى ولشەنەدى: مەديتسينالىق اقپاراتتىق جۇيەلەردى ەنگىزۋ, كومپيۋتەرلىك تەحنيكامەن جابدىقتاۋ جانە دەنساۋلىق ساقتاۋ ۇيىمدارىنىڭ ينتەرنەت جەلىسىنە قولجەتىمدىلىگىن قامتاماسىز ەتۋ.
«1 قازانداعى جاعداي بويىنشا دارىگەرلەر مەن ورتا مەديتسينالىق قىزمەتكەرلەردىڭ كومپيۋتەرلىك تەحنيكامەن جابدىقتالۋى 78,4% قۇرادى. 2018 جىلعى 1 قاڭتارعا 85%, 2019 جىلدىڭ باسىنا قاراي 100% كورسەتكىشكە قول جەتكىزۋ جوسپارلانعان», — دەپ اتاپ ءوتتى ا. تسوي.
الەكسەي تسوي سونداي-اق دەنساۋلىق ساقتاۋعا Watson for Oncology جاساندى ينتەللەكتتى پيلوتتىق ەنگىزۋ تۋرالى جۋرناليستەردىڭ سۇراقتارىنا جاۋاپ بەردى. 14 قىركۇيەكتە قر دسم مەن IBM كومپانياسى اراسىندا ىنتىماقتاستىق تۋرالى مەموراندۋمعا قول قويىلدى, ونىڭ اياسىندا دەنساۋلىق ساقتاۋعا جاساندى ينتەللەكتتى — Watson for Oncology پيلوتتىق ەنگىزۋ جوسپارلانعان. قازىرگى ۋاقىتتا مەموراندۋم اياسىندا پيلوتتىق جوبانى وتكىزۋ بويىنشا جول كارتاسى ازىرلەنۋدە.
ايتىلعان اقپاراتقا سايكەس, جاساندى ينتەللەكت ناۋقاستىڭ سىرقاتناماسىن جەدەل زەرتتەي الادى جانە سوڭعى مەديتسينالىق جەتىستىكتەر مەن عىلىمي جاريالانىمداردى ەسكەرە وتىرىپ, دارىگەرلەرگە ەمدەۋدىڭ الدەقايدا ءتيىمدى ادىستەرىن ۇسىنا الادى. ەنگىزگەن ساتتەن باستاپ ونكولوگيالىق اۋرۋعا شالدىققان 100 مىڭعا جۋىق ناۋقاستىڭ سىرقاتنامالارىن تالداۋ جوسپارلانعان.
ۆيتسە-مينيستر سونداي-اق مەملەكەت باسشىسىنىڭ 2018 جىلعى ءى توقسانداعى تاپسىرمالارىنا سايكەس دەنساۋلىق ساقتاۋدى تسيفرلاندىرۋ بويىنشا ەۋرازيالىق ەكونوميكالىق وداقتىڭ ارنايى فورۋمى وتكىزىلەتىنىن جەتكىزدى.