قايرات ءابدىراحمانوۆ لوندونداعى ساپارىندا بىرقاتار ىسكەرلىك كەزدەسۋلەر وتكىزدى

ءسىم باسشىسى پرەزيدەنت نۇرسۇلتان نازارباەۆتىڭ يادرولىق قارۋدان ازات الەمدى قۇرۋ, الەمدىك جانە ءداستۇرلى دىندەر ليدەرلەرىنىڭ سەزدەرىن شاقىرۋ سياقتى باستامالارىنا جان-جاقتى توقتالىپ ءوتتى. سونىمەن قاتار, ءسىم باسشىسى قازاقستاننىڭ بۇۇ قاۋىپسىزدىك كەڭەسىنىڭ مۇشەسى رەتىندە ورتالىق ازياداعى قاۋىپسىزدىك, افريكاداعى بەيبىتشىلىك پەن تۇراقتىلىق, حالىقارالىق تەرروريزمگە قارسى تۇرۋ, سيرياداعى داعدارىستى رەتتەۋ, اۋعانستانداعى جاعدايدى رەتتەۋ ماسەلەلەرىنە جانە بۇۇ رەفورمالارىنا ەرەكشە نازار اۋداراتىنى تۋرالى اتاپ ءوتتى. كەزدەسۋگە قاتىسۋشىلار «ەكسپو-2017» مۇراسىنا جانە احقو جوبالارىنا, جاسىل تەحنولوگيالاردىڭ حالىقارالىق ورتالىعىنا جانە ت.ب. قىزىعۋشىلىق تانىتتى.

لوندونعا ساپارى بارىسىندا ق.ابدىراحمانوۆ بريتاندىق پارلامەنتىنىڭ دەپۋتاتتارىمەن, بوب ستيۋارت توراعالىق ەتەتىن قازاقستانمەن ىنتىماقتاستىق جونىندەگى بۇكىلپارتيالىق توبىنىڭ مۇشەلەرىمەن كەزدەستى. مينيستر بريتاندىق پارلامەنت مۇشەلەرىن پرەزيدەنت ن.نازارباەۆتىڭ «بولاشاققا باعدار: رۋحاني جاڭعىرۋ» اتتى ماقالاسىنىڭ نەگىزگى ەرەجەلەرىمەن تانىستىردى, «100 ناقتى قادام» باعدارلاماسىن مەن جەكەشەلەندىرۋ باعدارلاماسىن ىسكە اسىرۋ تۋرالى, سونداي-اق «استانا» حالىقارالىق قارجى ورتالىعىن قۇرۋ جانە دامىتۋ بويىنشا جوبا تۋرالى ايتتى. قازاقستانمەن ىنتىماقتاستىق جونىندەگى بۇكىلپارتيالىق توبىنىڭ مۇشەلەرى قازاقستاندىق-بريتاندىق قارىم-قاتىناستارىنىڭ دامۋ سەرپىنىن جوعارى باعالاپ, بىرلەسكەن جوبالاردى ىسكە اسىرۋ ءۇشىن قولداۋ كورسەتۋگە دايىن ەكەنىن ءبىلدىردى.

قازاقستاندىق سىرتقى ساياسي ۆەدومستۆو باسشىسىنىڭ لوندونعا ساپارىنىڭ ماڭىزدى باسىمدىلىعى الداعى ۋاقىتتا ساۋدا-ەكونوميكالىق جانە ينۆەستيتسيالىق ىنتىماقتاستىقتى دامىتۋ بولدى. ەۋروپا قايتا قۇرۋ جانە دامۋ بانكىنىڭ پرەزيدەنتى سۋما چاكرابارتيمەن كەزدەسۋ بارىسىندا اعىمداعى جانە پەرسپەكتيۆالىق بىرلەسكەن جوبالار تالقىلاندى. ەققدب باسشىسىنىڭ ايتۋىنشا, قازاقستان بانكتىڭ ۇلگىلى سەرىكتەسى بولىپ تابىلادى. سوڭعى جىلدارى مەملەكەت جانە جەكە سەكتورمەن بىرلەسكەن جوبالاردىڭ سانى ايتارلىقتاي ءوستى جانە قازاقستاننىڭ ايماقتاعى جانە الەمدەگى ءرولى ارتتى. ەققدب مەملەكەتتىك-جەكەمەنشىك سەرىكتەستىك جوبالارىن جانە ء«بىر بەلبەۋ – ءبىر جول» باستاماسىن ىسكە اسىرۋدا سونداي-اق سىرتقى نارىقتاردا ەل ماركەتينگىن دامىتۋدا قازاقستانمەن ىنتىماقتاستىقتى نىعايتۋعا نيەتتى.

سىرتقى ىستەر ءمينيسترىنىڭ بەدەلدى كاسىپكەرلەر - بريتان-قازاق قوعامى مۇشەلەرىمەن كەزدەسۋىنىڭ كۇن تارتىبىندە ىسكەرلىك ىنتىماقتاستىق ماسەلەلەرىنە ەرەكشە نازار اۋدارىلدى. قازاقستان رەسپۋبليكاسىنىڭ مۇناي جوبالارىنان باسقا سالالارىنا ينۆەستيتسيا سالۋعا قىزىعۋشىلىق تانىتقان «Independent Power Corporation» جانە «United Green»كومپانيالارىنىڭ باسشىلارىمەن جەكە كەزدەسۋلەر بارىسىندا قازاقستان ەكونوميكاسىنا ينۆەستيتسيالاۋ جانە جاڭا ءوندىرىس ورىندارىن اشۋ ماسەلەلەرى تالقىلاندى.

ساپار سوڭىندا ق.ءابدىراحمانوۆ ۇلىبريتانيادا «بولاشاق» باعدارلاماسى بويىنشا ءبىلىم الاتىن قازاقستاندىق ستۋدەنتتەر قاۋىمداستىعىمەن كەزدەستى. سىرتقى ىستەر ءمينيسترى شەتەلدە ءبىلىم العان جاس قازاقستاندىقتار كەشەندى جاڭعىرتۋ بويىنشا ستراتەگيالىق ماقساتتاردى جۇزەگە اسىرۋدا جانە الەمنىڭ ەڭ دامىعان 30 ەل قاتارىنا كىرۋگە ەلەۋلى ۇلەس قوساتىندىعىن اتاپ ءوتىپ, ستۋدەنتتەرگە وقۋدا تابىستار تىلەدى.