مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى اليك شپەكباەۆ قاراعاندى وبلىسىندا جۇمىس ساپارىمەن بولدى. ءۇش كۇنگە سوزىلعان ساپار شەڭبەرىندە ول ايماقتاعى الەۋمەتتىك نىسانداردا, مەملەكەتتىك مەكەمەلەردە بولىپ, جۇمىس بارىسىمەن تانىستى.
اليك جاتقامباي ۇلىنىڭ جۇمىس ساپارى وساكاروۆ اۋدانىنان باستالدى. اۋدان ورتالىعىنداعى ەمحاناعا, حالىققا قىزمەت كورسەتۋ ورتالىعى, كوشى-قون پوليتسياسى قىزمەتى, ەمتيحاندىق-تىركەۋ ءبولىمى جانە مەملەكەتتىك كىرىستەر باسقارماسىنا باردى. ەمحانادا توراعانىڭ ورىنباسارى مەكەمە كورسەتەتىن قىزمەت كولەمىنە نازار اۋداردى. اتالعان نىسان جەرگىلىكتى تۇرعىندارعا 12 ءتۇرلى قىزمەت ۇسىنىپ وتىر. بۇل قىزمەتتەردى جۇزەگە اسىرۋدا جاڭاشىل تەحنولوگيالاردى قولدانۋعا باسا دەن قويىلعان. ەلەكتروندى ۇكىمەت, ياعني «e-gov» ارقىلى جۇمىس جۇرگىزىلۋدە. بۇل جۇيە ەمحانادا ءۇش جىلدان بەرى قولعا الىنۋدا. مۇندا كورسەتىلەتىن قىزمەتتەر ءتىزىمى تۋرالى اقپارات الىپ, سوعان سايكەس ىڭعايلى ۋاقىتتا دارىگەر كومەگىنە جۇگىنۋگە بولادى.
باسقارما جۇمىسىنا قانىققان توراعانىڭ ورىنباسارى قىزمەت بارىسىن وڭتايلاندىرۋ بويىنشا بىرقاتار ماسەلە تاقىرىبىندا ءسوز قوزعادى. عيمارات اۋدانىنىڭ ءتيىمدى پايدالانىلماي وتىرعاندىعىن سىنادى. ناقتى ايتقاندا باسقارما باسشىسى دارەتحانا, جۋىناتىن بولمەسى, قوسىمشا شىعۋ ەسىگى بار دەمالىس بولمەسىن جابدىقتاعان. مۇنداي ەسكەرتۋلەردى اليك جاتقامباي ۇلى ساپار بارىسىندا بارعان تەمىرتاۋ, شاحتينسك قالالارىنىڭ مەملەكەتتىك كىرىستەر باسقارمالارىنىڭ باسشىلارىنا دا ايتتى.
جۇمىس ساپارى تەمىرتاۋ قالاسىندا جالعاستى. مەملەكەتتىك قىزمەتتەر ساپاسىن ساراپتاۋ ماقساتىندا شاھارداعى مەكەمەلەرگە بارعان اليك جاتقامباي ۇلى قالا اكتيۆىمەن كەزدەستى. تۇڭعىش پرەزيدەنتتىڭ تاريحي-مادەني ورتالىعىندا وتكەن بۇل جيىندا سىبايلاس جەمقورلىققا قارسى كۇرەس باعىتىنداعى شارالار تالقىلاندى.
– قالا اكتيۆىمەن كەزدەسپەس بۇرىن بىرقاتار مەملەكەتتىك مەكەمەنىڭ جۇمىسىنا كوز جەتكىزگەندى ءجون كوردىك. كەلەشەكتە جويىلۋى ءتيىس كەمشىلىكتەر بار. بىراق جالپى العاندا, جۇمىس جاقسى ۇيىمداستىرىلعان. بۇگىندە قازاقستان قوعامى كوررۋپتسيادان ادا زاماناۋي قۇقىقتىق مەملەكەت قۇرۋعا كۇش سالۋدا. تۇرعىنداردىڭ شىنايى اقپاراتقا قولجەتىمدىلىگىن قامتاماسىز ەتۋ ماقساتىندا ەلەكتروندى ۇكىمەت جۇيەسى ەنگىزىلدى. بۇگىندە قازاقستاندىقتار بۇل مۇمكىندىكتەردى كەڭىنەن پايدالانۋدا. قازىرگى تاڭدا ەلىمىزدەگى بارلىق مەملەكەتتىك قىزمەتتەردىڭ 47 پايىزى ەلەكتروندى فورماتتا جۇزەگە اسىرىلادى. بۇل – وتە جوعارى كورسەتكىش. الداعى جىلداردا ەلەكتروندى قىزمەت كورسەتىلۋ مەجەسىن 90 پايىزعا جەتكىزۋ جوسپارلانۋدا. قالعان 10 پايىزى سەرۆيستىك ۇيىمدار, مەملەكەتتىك كورپوراتسيالار ارقىلى اتقارىلادى, – دەدى اليك جاتقامباي ۇلى.
جيىندا سىبايلاس جەمقورلىق دەرەكتەرى بويىنشا قاماۋعا الىنعان شەنەۋنىكتەر تۋرالى اقپارات بەرىلدى. كوررۋپتسيامەن كۇرەس امالدارى تۋرالى اڭگىمە وربىتكەن توراعانىڭ ورىنباسارى الدىن الۋ شارالارىنىڭ تيىمدىلىگى تۋرالى ايتتى. كەلەسى كۇندەرى اليك شپەكباەۆ قاراعاندى قالاسىنداعى تۇرعىن ءۇي قاتىناستارى بولىمىنە, الەۋمەتتىك تولەمدەر جونىندەگى ۆەدومستۆوارالىق ەسەپ ايىرىسۋ ورتالىعىنا, حالىققا قىزمەت كورسەتۋ ورتالىقتارىنا, دوستىق ۇيىنە, №3 قالالىق ەمحاناعا, قازىبەك بي اۋداندىق مەملەكەتتىك كىرىستەر باسقارماسىنا جانە باسقا دا مەكەمەلەرگە باردى. قاراعاندى قالاسىنان كەيىن ساران, شاحتينسك قالالارى مەن اباي اۋدانىندا بولدى. سول كۇنى كەشكە اليك شپەكباەۆ وبلىس اكىمى ەرلان قوشانوۆپەن بىرگە قاراعاندى قالاسىنداعى مامانداندىرىلعان حالىققا قىزمەت كورسەتۋ ورتالىعىنىڭ جۇمىسىمەن تانىستى. سونداي-اق وبلىستىق سىبايلاس جەمقورلىقپەن كۇرەس كوميسسياسىنىڭ وتىرىسىنا قاتىستى.
ميراس اسان, «ەگەمەن قازاقستان»
قاراعاندى وبلىسى