پارلامەنت سەناتى ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ كەڭەيتىلگەن وتىرىسىندا «ەۋرازيالىق ەكونوميكالىق وداقتىڭ كەدەن كودەكسى تۋرالى شارتتى راتيفيكاتسيالاۋ تۋرالى» زاڭ جوباسى قارالدى.
شارتتىڭ نەگىزگى ماقساتى ەۋرازيالىق ەكونوميكالىق وداقتا بىرىڭعاي كەدەندىك رەتتەۋدى قامتاماسىز ەتۋ بولىپ تابىلادى.
ەۋرازيالىق ەكونومميكالىق وداقتىڭ كەدەن كودەكسى كەدەندىك رەتتەۋ سالاسىندا:
دەكلاراتسيا نەگىزىندە تولتىرىلعان قۇجاتتاردى كەدەن ورگانىنا ۇسىنباي, ەلەكتروندىق تۇردە كەدەن دەكلاراتسياسىن بەرۋ مۇمكىندىگى;
تاۋارلاردى شىعارۋدى كەدەن دەكلاراتسياسى تىركەلگەن ساتتەن باستاپ ءتورت ساعاتتىڭ ىشىندە جۇزەگە اسىرۋ;
كەدەن ورگاندارىنىڭ لاۋازىمدى ادامدارىنىڭ قاتىسۋىنسىز, كەدەن دەكلاراتسياسىن تىركەۋگە جانە تاۋارلاردى اۆتوماتتى تۇردە شىعارۋعا بايلانىستى كەدەندىك وپەراتسيالاردى جاساۋ مۇمكىندىگى;
ۋاكىلەتتى ەكونوميكالىق وپەراتور مارتەبەسىنىڭ بەرىلۋى, ارنايى جەڭىلدىكتەردىڭ تىزىمدەرى, ونىڭ ىشىندە ەۋرازيالىق ەكونوميكالىق وداقتىڭ بۇكىل اۋماعىنداعى كەدەندىك باقىلاۋعا قاتىستى ارنايى جەڭىلدىكتەردىڭ تىزىمدەرى كەڭەيتىلۋى مۇمكىن زاڭدى تۇلعالاردىڭ ساناتتارىن كوبەيتۋ سياقتى جاڭا باسىم باعىتتاردى ەنگىزەدى.
زاڭ جوباسى پالاتا قاراۋىنا جىبەرىلدى.