ەلباسىنىڭ «رۋحاني جاڭعىرۋ» باعدارلاماسىن جۇزەگە اسىرۋ ماقساتىندا وبلىستا قولعا الىنعان «تۋعان مەكتەپ» اكتسياسى اياسىندا تارباعاتاي اۋدانىنىڭ جەتىارال اۋىلىنداعى ورتا مەكتەپتە «روبوت تەحنيكاسى» كابينەتى اشىلدى.
كابينەتتى اشۋعا ۇيىتقى بولعان, قاجەتتى قۇرال-جابدىقتارمەن جابدىقتاۋعا 1 ميلليون تەڭگە قاراجاتتارىن اۋدارعان – وسى مەكتەپتى 1978 جىلى بىتىرگەن تۇلەكتەر. وسىدان 40 جىلعا جۋىق ۋاقىت بۇرىن ءبىلىم ورداسىنان قانات قاققان تۇلەكتەردى بۇگىندە الماتىدا تۇراتىن قاناتبەك قاجىبەكوۆ پەن تالدىقورعاندا ەڭبەك ەتىپ جۇرگەن بولات اباعان سىندى ازاماتتار باستاپ كەلىپتى.
«قايدا جۇرسەك تە, قاي جەردە قىزمەت ىستەسەك تە تۋعان جەرىمىزدى, وسكەن ەلىمىزدى, اۋىلىمىزدى, ءبىلىم ءنارىن سەپكەن مەكتەبىمىزدى ەشۋاقىتتا ەستەن شىعارعان ەمەسپىز. كەز كەلگەن ادامنىڭ جۇرەگىنىڭ تۇكپىرىندە ساقتالاتىن, بويىنا قۋات بەرىپ, كوڭىلىنە شۋاق شاشىپ تۇراتىن سەزىمدەر بولادى. سونىڭ ەڭ ۇلكەنى, ەڭ ىزگىسى – تۋعان جەرگە دەگەن سەزىم بولسا كەرەك. ءححى عاسىر – اقپارات عاسىرى, باسەكەلەستىك عاسىرى. سول باسەكەلەستىكتەن شالعايداعى اۋىل بالالارى دا قالماسا ەكەن دەگەن تىلەكپەن وسىنداي يگى ءىستى قولعا العان جايىمىز بار», - دەدى «روبوت تەحنيكاسى» كابينەتىنىڭ اشىلۋ راسىمىندە ءسوز العان وسى مەكتەپتىڭ تۇلەگى, بۇگىندە جەتىسۋ توپىراعىندا قىزمەت اتقارىپ جۇرگەن بەلگىلى جۋرناليست, «ولكە تىنىسى» مەدياحولدينگى ديرەكتورىنىڭ ورىنباسارى بولات اباعان.
جەتىارال مەكتەبىنىڭ 1978 جىلعى تۇلەكتەرىنىڭ ءبىرى, كاسىپكەر قاناتبەك قاجىبەكوۆ وزدەرى اكەلگەن روبوتتار باستاۋىش جانە جوعارى سىنىپتارعا ارنالعانىن, ونىڭ كەيبىر جابدىقتارىن سانك-پەتەربۋرگتەن ارنايى الدىرعانىن ايتادى. «اۋىلداعى سوڭىمىزدان ەرگەن باۋىرلارىمىز بەن قارىنداستارىمىز ءۇشىن اياناتىن نەسى بار دەپ ەڭ ساپالى روبوتتاردى تاڭداپ, ارنايى باعدارلاماسى مەن نۇسقاۋلىعىن قوسا الا كەلدىك. نۇسقاۋلىقتىڭ ىشىندە بارلىعى مۇقيات جازىلعان. وندا 17 جوبا بار. بالالار سونى قۇراستىرۋى ءتيىس. وسىنى مەڭگەرسە ەلىمىزدە وتەتىن جارىستارعا قاتىسا الادى», - دەيدى ول.
جەتىارالدا بىلتىر عانا اشىلعان 300 ورىندىق مەكتەپتىڭ فيزيكا ءپانىنىڭ مۇعالىمى سەرىك اۋعانباەۆ جاقىندا وسكەمەنگە 15 كۇندىك وقۋعا بارىپ, روبوتتارمەن جۇمىس ىستەۋدىڭ قىر-سىرىنا قانىعىپ كەلىپتى. بىلگەن-تۇيگەنىن وقۋشىلارعا ۇيرەتۋگە ءازىر ەكەندىگىن جەتكىزدى. سالتاناتتى شاراعا قاتىسقان اۋداندىق ءبىلىم ءبولىمىنىڭ باسشىسى سامال داۋىتباەۆا «روبوت تەحنيكاسى» كابينەتى تارباعاتايدا ەڭ العاش بولىپ جەتىارالدا اشىلعانىن اتاپ ءوتىپ, جاقىندا ارنايى شتات بولىنەتىندىگىن تىلگە تيەك ەتتى.
قازىرگى ۋاقىتتا وبلىسىمىزدا «تۋعان مەكتەپ» اتتى اۋقىمدى اكتسيا جۇزەگە اسىرىلىپ جاتقانى بەلگىلى. شارا اياسىندا ايماقتاعى بارلىق ءبىلىم وشاقتارىن نازارباەۆ ينتەللەكتۋالدى مەكتەبى ۇلگىسىندەگى فيزيكا, حيميا, بيولوگيا جانە «روبوت تەحنيكاسى» كابينەتتەرىمەن جابدىقتاۋ جوسپارلانعان. تارباعاتاي اۋدانىنىڭ اكىمى دىلدابەك ورازباەۆ ءوڭىردىڭ سىرتتا جانە وبلىس اۋماعىندا جۇرگەن ازاماتتارى اتالعان اكتسياعا بەلسەنە قاتىسىپ, 75 ميلليون, 270 مىڭ تەڭگە كولەمىندە قاراجاتتارىن اۋدارعانىن ايتادى. بۇل قارجىعا اۋدانداعى 17 مەكتەپتىڭ سىنىپتارى جابدىقتالاتىن بولادى. «اكتسياعا ەڭكەيگەن كارىدەن ەڭبەكتەگەن بالاعا دەيىن اتسالىسىپ جاتىر دەۋگە بولادى. اقجار مەن اقسۋات اۋىلدارىندا تۇلەكتەر فورۋمىن وتكىزدىك. فورۋمعا ءارىسى الماتى مەن استانادا, بەرىسى وسكەمەن مەن سەمەيدە ەڭبەك ەتىپ جۇرگەن تارباعاتايدىڭ تۋمالارى ارنايى كەلدى. ولاردىڭ ەلىنە, جەرىنە دەگەن سۇيىسپەنشىلىكتەرىنە ءتانتىمىز. ءتىپتى 70-كە كەلگەن اقساقالدار دا «مەن وسى مەكتەپتى ءبىتىرىپ ەدىم» دەپ قولدا بارىن اكەلىپ, قولداۋىن ءبىلدىرىپ جاتىر», - دەيدى اۋدان اكىمى.
د.ورازباەۆتىڭ ايتۋىنشا, تارباعاتاي اۋدانىندا 50-گە جۋىق مەكتەپ بار. سوڭعى جىلدارى 8 جاڭا مەكتەپ سالىنىپ, ءبىلىم وشاقتارىن جوندەۋگە 500 ميلليونعا جۋىق قارجى ءبولىنىپتى.
ازامات قاسىم, «ەگەمەن قازاقتان»
شىعىس قازاقستان وبلىسى,
تارباعاتاي اۋدانى