تابيعاتتىڭ اسەمدىگى قىس ماۋسىمىندا دا كوركىن جويا قويمايدى. ۇشار باسىنا قاراعان كىسىنىڭ تاقياسى تۇسەتىن نۋ قاراعاي مۇلگىپ تۇر. وسى قاراعايدى ىرگەلەپ جۇرەتىن تاس جول تەننيس ورتالىعىنا اكەلەدى.
ول وسىدان ەكى جىل بۇرىن تاپسىرىلعان بولاتىن. كولەمى – 2763 شارشى مەتر, قۇرىلىسىنا بيۋدجەتتەن 788 ميلليون تەڭگە قاراجات جۇمسالدى. جاڭا ءتيپتى سپورت عيماراتىندا ءۇش جابىق, ءۇش اشىق تەننيس كورتى بار. وتكەن جىلدان بەرى ونىڭ اشىق جانە جابىق كورتتارىندا بىرنەشە رەت رەسپۋبليكالىق تۋرنيرلەر ءوتتى.
ەلباسى كەلەدى دەگەننەن سپورت مەكتەبىنىڭ ديرەكتورى ليۋدميلا وكۋنەۆا باستاعان ۇجىمنىڭ, تەننيس ورتالىعىنداعى جاتتىقتىرۋشىلاردىڭ, جاس سپورتشىلاردىڭ كوڭىلى ەرەكشە الابۇرتتى. جاتتىعۋ ساباقتارى دا اسا ءبىر قىزىعۋشىلىقپەن ءوتتى. بالالار مەن جاسوسپىرىمدەر سپورت مەكتەبىندەگى ۇزدىك سپورتشىلاردىڭ ءبىرى 13 جاسار تەننيسشى ەكاتەرينا سيتنيكوۆا دا بۇل حابارعا قاتتى قۋانعان.
اكەسىنىڭ اعاسى, اۋلەتىندەگى بار بالا «اتا» دەپ اتايتىن گەننادي ۆەدياەۆ كاتيانىڭ التى جاسىندا قولىنان جەتەكتەپ, تەننيس سپورتىنا اپارعان. دارىگەر گەننادي پەتروۆيچتىڭ ءوزى دە سپورتشى, جەتپىستەن اسسا دا سۇيىكتى ماماندىعى دارىگەرلىكتى دە, سۇيىكتى ءىسى ۆولەيبولدى دا تاستاعان جوق. تەننيس كىشكەنتاي كاتياعا دا ەرەكشە ۇناپ, التى جىلدان بەرى سپورت مەكتەبىنىڭ ۇزدىك وقۋشىسىنا اينالدى. مەكتەپتە دە بەلسەندى, جاقسى وقيدى.
سيتنيكوۆا نۇرسۇلتان نازارباەۆتى تەلەديداردان عانا كورگەن. ەلباسىمەن جاقىن تۇرىپ سويلەسۋ, قولىن الۋ ونىڭ بالا قيالىنىڭ جاي ەرتەگىسى سياقتاناتىن. تەننيس كورتىنا كىرىسىمەن نۇرسۇلتان ءابىش ۇلى اينالاعا ريزاشىلىقپەن قارادى. ات شاپتىرىم, جارىق, بيىك كورت. ول ءوزىن كۇتىپ تۇرعان سپورت مەكتەبىنىڭ ۇركەردەي ۇزدىك تەننيسشىلەرىنە جاقىندادى.
– قوستاناي تەننيستىڭ جابىق كورتىنا ءزارۋ بولاتىن. بۇل ءوڭىردىڭ قىسى ۇزاق, قاتال, جازى قىسقا. مۇندا بۇرىن قىس مەزگىلىندە جاتتىعۋ ءۇشىن ەشتەڭە بولمايتىن. مىنە, سەندەردە ەندى تەننيس كورتى, كۇشتىلىك سپورت تۇرلەرىنىڭ اكادەمياسى, جابىق مۇز ايدىنى, فۋتبول ستاديونى – ءبارى بار. قىستا دا جاتتىعۋلار ۇزىلمەيدى. سپورت – كەرەمەت ءىس, ونىمەن بالا كەزدەن اينالىسىڭدار, سوندا ءومىر بويى دەنساۋلىقتارىڭ جاقسى بولادى, سپورتتان قول ۇزبەيتىن بولاسىڭدار, – دەدى نۇرسۇلتان ءابىش ۇلى. ەلباسى ءسوزىن اياقتاعاندا بالالاردىڭ الدىڭعى جاعىندا تۇرعان ەكاتەرينا سيتنيكوۆا نۇرسۇلتان ءابىش ۇلىنىڭ كەلگەنىنە بالالاردىڭ بارلىعى وتە قۋانىشتى ەكەنىن جانە ءوزىنىڭ سپورتتاعى جەتىستىكتەرىن ايتىپ بەردى.
– مەن 2016 جىلى رەسپۋبليكالىق تۋرنيردە ءۇشىنشى ورىن, بيىلعى وتكەن رەسپۋبليكالىق ەكى تۋرنيردە دە ەكىنشى ورىندى يەلەندىم. تەننيستى وتە جاقسى كورەمىن.وسكەندە ەلىمىزدىڭ نامىسىن قورعايتىن بولامىن, الەمدىك جارىستاردا قازاقستاننىڭ تۋىن جەلبىرەتۋدى ارماندايمىن جانە سوعان قول جەتكىزەمىن, – دەدى كاتيا. ارمانى اسقاق ءناپ-نازىك قىزدى ەلباسى ءوز پەرزەنتىندەي مەيىرلەنە باۋىرىنا قىستى.
ەلباسى بالالارعا ءوزىنىڭ دە تەننيسپەن اينالىسقانىن ايتتى. ەلباسىنىڭ: «مەن دە تەننيسپەن اينالىستىم. دەنساۋلىعى مىقتى جانە ءبىلىمدى ادام عانا ومىردە جەتىستىكتەرگە قول جەتكىزەدى. سوندىقتان جاستار سپورتپەن اينالىسۋى, دوستاسۋى كەرەك. سەندە دە دوستارىڭا سپورتتى سەرىك ەتۋ كەرەكتىگىن ايتىڭدار», دەگەن ءسوزى بالالاردىڭ كوكەيىندە جاتتالىپ قالاتىنى كۇمانسىز.
سول كۇنى ەلباسىنىڭ تەننيس كورتىنا بارعانىن, بالالارمەن ارادا بولعان اڭگىمەسىن, ونىڭ الدىندا كاتيانىڭ جانە جاس تەننيسشىلەر سانجار بۇقانوۆتىڭ, ديانا ءشارىپوۆانىڭ سويلەگەنىن سوڭعى جاڭالىقتاردان كورسەتتى.
– قۋانعاننان جىلاي بەرىپپىن. قىزىمنىڭ ۇستازدارى, جاتتىقتىرۋشىلارى, تۋىستار, دوس-جاراندار تەلەفون تۇتقاسىن قويدىرمادى, قۇتتىقتاپ جاتىر. ءتىپتى رەسەيدەگى تۋىستارىمىز بەن تانىستارىمىز كورىپ, تەلەفون شالدى عوي, – دەيدى كاتيانىڭ اناسى ەلەنا. سيتنيكوۆتەر ەلباسىنىڭ جاس تەننيسشىلەرمەن سۇحباتتاسىپ تۇرعان جانە كاتيانى باۋىرىنا تارتقان ءساتى بەينەلەنگەن سۋرەتتەردى ۇلكەيتىپ, رامكاعا سالىپ, تورىنە ءىلىپ تە ۇلگەردى.
مۇنداي سۋرەتتەر تەننيس ورتالىعىنا دا ءىلىنىپتى. جاتتىعۋعا كەلگەن سپورتشىلار مەن تەننيس اۋەسقويشىلارى وعان قاراعان سايىن قوستاناي تەننيسىنىڭ جارقىن بولاشاعى ساۋلە شاشقانداي بولادى.
ءنازيرا جارىمبەت, «ەگەمەن قازاقستان»
قوستاناي