اۋليەاتا ءوڭىرىنىڭ تۋريستىك الەۋەتىن كوپشىلىككە تانىتۋ جانە وڭىرگە كەلۋشىلەر سانىن كوبەيتۋ ماقساتىندا وبلىستىق كاسىپكەرلىك جانە يندۋستريالىق-يننوۆاتسيالىق دامىتۋ باسقارماسىنىڭ باستاماسىمەن «رۋحاني قازىنا» باعدارلاماسى اياسىندا تاراز قالاسىنداعى «ARAI PLAZA» كەشەنىندە «Ancient Taraz» حالىقارالىق فورۋمى ءوتتى.
ال فورۋم جۇمىسىن ەلىمىزدىڭ تۋريستىك وڭ ءيميدجىن قالىپتاستىرۋ جانە تۋريستىك ينفراقۇرىلىمدى دامىتۋ ماقساتىندا ەڭبەك ەتىپ كەلە جاتقان «قازاقستان تۋريستىك اسسوتسياتسياسى» ۇيىمى ۇيىمداستىردى.
فورۋم جۇمىسىنا قىتاي, كورەيا, مالايزيا, گەرمانيا, رەسەي, قىرعىزستان, وزبەكستان, موڭعوليا جانە تاجىكستان ەلدەرىنەن تۋريزم سالاسىنا قاتىسى بار بيزنەس قۇرىلىمدارىنىڭ وكىلدەرى, سونداي-اق مادەنيەت جانە سپورت مينيسترلىگىنەن, وبلىس اكىمدىكتەرىنەن, سول سياقتى اتالعان سالاعا قاتىسى بار مەملەكەتتىك جانە ۇكىمەتتىك ەمەس ۇيىمدار وكىلدەرى دە قاتىستى.
فورۋمنىڭ العاشقى كۇنى «قازاقستان رەسپۋبليكاسىندا ءتۋريزمنىڭ جانە قوناق ءۇي نارىعىنىڭ دامۋىنىڭ قازىرگى كەزدەگى جاعدايى مەن پەرسپەكتيۆاسى» تاقىرىبىندا جانە جامبىل وبلىسىنىڭ ءتۋريزمى مەن قوناق ۇيلەردىڭ دامۋى تاقىرىبى توڭىرەگىندە ديسكۋسسيالار مەن تۇساۋكەسەرلەر وتكىزىلدى. مۇندا تاراز ءتۋريزمىن دامىتۋ ماسەلەسى كوتەرىلىپ, تاريحي ولكەنىڭ بۇگىنگى تىنىس-تىرشىلىگىنە بارلاۋ جاسالدى. سونداي-اق كەلەسى كۇنى «بالاساعۇن» ورتالىق كونتسەرت زالىندا قولونەر شەبەرلەرىنىڭ كورمەسى, فورۋم قاتىسۋشىلارىنا ارنالعان اقپاراتتىق تۋر جانە «ەكولوگيالىق ءتۋريزمدى دامىتۋ ستاندارتتارى مەن پرينتسيپتەرى» تاقىرىپتارىندا شەبەرلىك سىنىپتارى ۇيىمداستىرىلدى. فورۋم جۇمىسىنا قاتىسۋشىلار تاراز توپىراعىنان تابىلعان كونە جادىگەرلەردى تاماشالاپ, ۇلت تاريحىنىڭ شەجىرەسىنە قانىقتى.
بۇدان كەيىن بۇقارالىق اقپارات قۇرالدارىنىڭ وكىلدەرىنە ارنالعان كونفەرەنتسيا ءوتىپ, كونفەرەنتسيا بارىسىندا وبلىس اكىمى كارىم كوكىرەكباەۆ فورۋمعا قاتىسۋشىلاردى جامبىلدىقتار اتىنان قۇتتىقتادى. اكىم ءوز سوزىندە جامبىل جەرىنىڭ تەرەڭ تاريحىنا توقتالىپ, ەلباسىنىڭ «بولاشاققا باعدار; رۋحاني جاڭعىرۋ» باعدارلامالىق ماقالاسى بويىنشا وبلىستا اتقارىلىپ جاتقان جۇمىستاردى دا اڭگىمەلەدى. ءوز كەزەگىندە «اتامەكەن» ۇلتتىق كاسىپكەرلەر پالاتاسى توراعاسىنىڭ ورىنباسارى يۋليا ياكۋپباەۆا جانە قىتاي حالىق رەسپۋبليكاسى تۋريزم اكادەمياسىنىڭ پرەزيدەنتى داي بين ءسوز الىپ, جالپى الەمدىك تۋريزم سالاسى تۋرالى اڭگىمەلەي كەلە, جامبىل جەرىنىڭ ءتۋريزمىن دامىتۋ تۋرالى دا ويلارىن ورتاعا سالدى.
جالپى, جامبىل ءوڭىرى ەلىمىزدەگى تاريحي مەكەندەردىڭ بىرىنەن سانالادى. كونە زامانداردان بەرى جالعاسىپ كەلە جاتقان جادىگەرلەر كوشى, ۇلت تاريحىندا ايتۋلى ورىن الاتىن كەشەندەر دە وسى اۋليەاتا وڭىرىندە ورنالاسقان. سول سەبەپتى ءوڭىر ءتۋريزمىن دامىتۋ بۇگىنگى كۇنى اسا ماڭىزدى ماسەلەلەردىڭ ءبىرى. وسى ورايدا, فورۋم اياسىندا قازاقستاندىق جانە قىتاي تۋروپەراتورلارىنا ارنالعان اقپاراتتىق تۋر, مادەنيەت جانە سپورت مينيسترلىگىمەن ۇيىمداستىرىلىپ وتىرعان «قازاقستاننىڭ ۇلى جىبەك جولى بويىنشا ساياحات» تاقىرىبىندا حالىقارالىق فەستيۆال, قولونەرشىلەر كورمەسى, سونىمەن قاتار قولونەر شەبەرلەرى, مەكتەپ وقۋشىلارى جانە كيىم تىگۋمەن اينالىساتىن وبلىس تۇرعىندارىنىڭ قاتىسۋىمەن «TARAZ FASHION DAY» بايقاۋى ءوتتى. بايقاۋ بارىسىندا ۇزدىك شىققان ۇمىتكەرلەرگە «ۇزدىك سۋرەت», «ۇزدىك كوللەكتسيا» جانە «ۇزدىك قولونەر شەبەرى» اتالىمدارى تابىستالدى. ال قولونەرشىلەر كورمەسىنە كەلگەن قوناقتار وبلىس قولونەر شەبەرلەرىنىڭ كادەسىي ونىمدەرىن, زەرگەرلىك بۇيىمداردى جانە تەرىدەن, قىشتان جاسالعان قولونەر بۇيىمدارىن تاماشالادى. سول سياقتى وزبەكستان جانە قىرعىزستان ەلدەرىنىڭ ۇزدىك ديزاينەرلەرى دە ءوز كيىم كوللەكتسيالارىن كوپشىلىك نازارىنا ۇسىندى. سونداي-اق شەتەلدىك مەيماندار ءۇشىن قاراحان, ايشا ءبيبى, اقىرتاس تاريحي كەشەندەرىنە دە ساياحاتتار ۇيىمداستىرىلىپ, فورۋم قاتىسۋشىلارى مەن جەرگىلىكتى تۋروپەراتورلار اراسىندا ۆ2ۆ فورماتىندا تاجىريبە الماسۋ ماقساتىندا كەزدەسۋلەر ۇيىمداستىرىلدى.
اۋليەاتا ءوڭىرىنىڭ تۋريستىك الەۋەتىن ارتتىرۋعا باعىتتالعان فورۋم بارىسىندا قازاقستاندىق جانە شەتەلدىك قوناقتار ءۇشىن وبلىستىڭ تۋريستىك الەۋەتى تۋرالى مول ماعلۇماتتار بەرىلدى. جامبىل جەرىندەگى تاريحي كەشەندەردى ءۇش كۇن بويى تاماشالاپ, تاريحىنا ۇڭىلگەن شەتەلدىكتەر وڭىردەگى تاريحي-مادەني نىساندارعا قىزىعۋشىلىق تانىتىپ, جوعارى پىكىر ءبىلدىردى.
حاميت ەسامان, «ەگەمەن قازاقستان»
جامبىل وبلىسى