ونەرىمەن دە, ومىرىمەن دە ەلگە قىزمەت ەتىپ جۇرگەن تۇلعالار از ەمەس. سولاردىڭ قاتارىندا وتەگەن ورالباەۆتىڭ دا ەسىمى قۇرمەتپەن اتالادى. ول - اقىن, قازاقستاننىڭ ەڭبەك سىڭىرگەن قايراتكەرى, مەملەكەتتىك قىزمەتتىڭ ۇزدىگى, پرەزيدەنت سىيلىعىنىڭ جانە حالىقارالىق «الاش» ادەبي سىيلىعىنىڭ لاۋرەاتى, جۋرناليستيكا اكادەمياسىنىڭ اكادەميگى, فيلولوگيا عىلىمدارىنىڭ كانديداتى, جازۋشىلار وداعىنىڭ باسقارما مۇشەسى, جىلىوي اۋدانىنىڭ قۇرمەتتى ازاماتى, مادەنيەت جانە قوعام قايراتكەرى.
اتىراۋدا شىعارماشىلىق كەشىن وتكىزگەن اقىن: «تۋعان جەرگە تاعزىم ەتۋدىڭ ماقساتى - ەلگە العىس ايتۋ, بۇگىنگە دەيىن ەتكەن ەڭبەگىڭدى, جاساعان جۇمىسىڭدى كورسەتۋ, جەتكەن مەجەڭدى بەلگىلەۋ جانە الداعى ساپارىڭدى ساراپتاۋ. جەرلەستەرىممەن جۇزدەسىپ, جانىما جىگەر, قۋات پەن شۋاق الىپ كەتۋ ءۇشىن جايىققا كەلدىم», - دەدى.
«ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنىڭ «تۋعان جەر» جوباسى اياسىندا وتكەن شاراعا اتىراۋ وبلىسى اكىمىنىڭ ورىنباسارى الىبەك ناۋتيەۆ, وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى سالامات سابىر, قازاقستان جازۋشىلار وداعى باسقارما توراعاسىنىڭ ءبىرىنشى ورىنباسارى, حالىقارالىق «الاش» سىيلىعىنىڭ يەگەرى عالىم جايلىباي, فيلولوگيا عىلىمدارىنىڭ دوكتورى, پروفەسسور قۇلبەك ەرگوبەك, بەلگىلى اقىن, مادەنيەت قايراتكەرى جاقسىلىق ايجان مەن كەش يەسىنىڭ وتباسى قاتىستى.
قازاقستان جازۋشىلار وداعى باسقارما توراعاسىنىڭ ءبىرىنشى ورىنباسارى, حالىقارالىق «الاش» سىيلىعىنىڭ يەگەرى عالىم جايلىباي: «وتەگەن اقىن – سوعىستان سوڭعى تۋعانداردىڭ بۋىنى. اقكيىزتوعاي اتالعان كىشكەنتاي اۋىلدان شىعىپ, قازاق پوەزياسى دەگەن ۇلكەن قاسيەتتى مەكەننەن ءوز ورىنىن العان اقىن. كەز كەلگەن جىرىن وقىساڭ, اۋىلىڭ, اناڭ مەن اكەڭ ەسىڭە تۇسەدى, شىنايىلىعىمەن باۋرايدى. بۇل كەش – كوڭىلدىڭ مەرەكەسى, ولەڭ مەن ساعىنىشتىڭ, پاراساتتىڭ مەرەكەسى», - دەگەن لەبىزىن ارنادى.
وتەگەن ورالباي ۇلى – وتىزدان استام انگە ءسوز جازعان اقىن. جەرگىلىكتى ونەرپازدارمەن بىرگە قر ەڭبەك سىڭىرگەن قايراتكەرى, ءانشى قۇرمانبەك الىمعازى مەن ريزا قايىرباي ءان شىرقاپ, كەشتىڭ كوركىن كەلتىردى. «ەگەمەن قازاقستان» گازەتىندە ءبىر كەزدەرى ءوزى دە ەڭبەك ەتكەن قالامگەر ءالى كۇنگە دەيىن بايلانىسىن ۇزبەي, ويلى دا وزەكتى ماقالالارىن جاريالاپ تۇرادى. مەملەكەتتىك قىزمەتتە ءجۇرىپ تە ولەڭ ولكەسىنەن جىراقتاماعان, 22 كىتاپتىڭ اۆتورى, قايراتكەرلىك پەن قالامگەرلىكتى تەڭ ۇستاپ, حالىقتىڭ ىقىلاسىنا بولەنگەن وتەگەن ورالباي ۇلى تۋعان جەرىنىڭ تورىندە تەبىرەنە ءسوز الىپ, ولەڭدەرىن وقىدى.
باقىتگۇل باباش,
«ەگەمەن قازاقستان».
اتىراۋ.
سۋرەتتى تۇسىرگەن: ەرلان التىباەۆ