مەملەكەت باسشىسىنىڭ تاپسىرماسىمەن قر پرەمەر-ءمينيسترى باقىتجان ساعىنتاەۆ جۇمىس ساپارىمەن جامبىل وبلىسىنا باردى, وندا وڭىردە مەملەكەتتىك باعدارلامالاردىڭ جانە «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋى مىندەتتەرىنىڭ ىسكە اسىرىلۋ بارىسىمەن تانىسادى, سونداي-اق, اوك دامىتۋ ماسەلەلەرى جونىندە جەكە كەڭەس وتكىزىپ, وڭىرلىك كاسىپكەرلەرمەن كەزدەسەدى, دەپ جازادى primeminister.kz.
باقىتجان ساعىنتاەۆ تارازعا كەلگەن بويدا ءوڭىردىڭ بىرقاتار الەۋمەتتىك نىساندارىن ارالادى.
پرەمەر-مينيستر «اراي» شاعىن اۋدانىنىڭ كوپقاباتتى تۇرعىن ۇيلەرىنىڭ قۇرىلىسى مىسالىندا وڭىردە «نۇرلى جەر» تۇرعىن ءۇي قۇرىلىسى باعدارلاماسىنىڭ ىسكە اسىرىلۋ بارىسىمەن تانىستى. جامبىل وبلىسى اكىمىنىڭ ورىنباسارى عالىمجان ءابدىرايىموۆ قۇرىلىستىڭ قازىرگى جاعدايى مەن كەلەشەگى تۋرالى باياندادى.
بيىل وبلىستا «نۇرلى جەر» باعدارلاماسى بويىنشا 17,7 مىڭ م2-قا 258-دەن استام پاتەردى پايدالانۋعا بەرۋ بويىنشا ءتورت جوبا ىسكە اسىرىلىپ جاتىر, سونىمەن قاتار جتق بويىنشا 922 جەر تەلىمى بولىنگەن. 2018 جىلى 13 كوپقاباتتى ءۇي قۇرىلىسىن اياقتاۋ نەمەسە 1 070 پاتەردى پايدالانۋعا بەرۋ كوزدەلگەن.
جالپى وسى جىلدىڭ 10 ايىندا قازاقستاندا قۇرىلىس قارقىنىنىڭ كورسەتكىشتەرى 2016 جىلدىڭ وسى كەزەڭىمەن سالىستىرعاندا 1,8%-عا جاقسارعان. بارلىعى 8,8 ملن م2 تۇرعىن ءۇي پايدالانۋعا بەرىلگەن.
سونداي-اق, پرەمەر-مينيسترگە وبلىستا سپورتتى دامىتۋ كەلەشەگى تۋرالى باياندالدى. باقىتجان ساعىنتاەۆ 2 مىڭنان استام سپورتشى كۇن سايىن سپورتتىڭ ءتۇرلى كۇش قولدانىلاتىن تۇرلەرى: گرەك–ريم كۇرەسىمەن, كيكبوكسينگپەن, تاەكۆوندومەن, ارمرەستلينگپەن جانە ت. ب. اينالىساتىن «اتلەتيك» وليمپيادا رەزەرۆىن دايىندايتىن وقىتۋ-جاتتىعۋ كەشەنىنە باردى.
جامبىل وبلىسىندا بارلىعى 46 سپورت مەكەمەسى بار, 22 مىڭعا جۋىق سپورتشى جۇيەلى تۇردە ءتۇرلى سپورت تۇرلەرىمەن اينالىسادى, ولاردىڭ 14 مىڭى — اۋىلدىق سپورت مەكتەپتەرىندە جاتتىعادى. بۇگىنگى تاڭدا ءوڭىر سپورتشىلارى رەسمي حالىقارالىق جانە رەسپۋبليكالىق جارىستاردا 1 387 مەدال يەلەنگەن, ولاردىڭ 577-ءسى — التىن.
پرەمەر-مينيسترگە وبلىستىق پەريناتالدىق ورتالىقتى ارالاۋ بارىسىندا وڭىردە دەنساۋلىق ساقتاۋ جۇيەسىن دامىتۋ بويىنشا قابىلدانىپ جاتقان شارالار تۋرالى باياندالدى. 2015 جىلى حالىقارالىق تالاپتاردى ەسكەرە وتىرىپ سالىنعان جاڭا كلينيكا 200 ەمدەلۋشىگە ءبىر ۋاقىتتا قىزمەت كورسەتەتىن قاجەتتى زاماناۋي جابدىقپەن جاراقتاندىرىلعان. 2017 جىلى وبلىستىڭ دەنساۋلىق ساقتاۋ جۇيەسىن قارجىلاندىرۋعا بارلىعى 24,2 ملرد تەڭگە قاراستىرىلعان. وسى جىلدىڭ 1 قاراشاسىنداعى جاعداي بويىنشا 19,6 ملرد تەڭگەسى نەمەسە ەسەپتىك كەزەڭ جوسپارىنىڭ 99,7%-ى يگەرىلگەن.
ايتا كەتەيىك, قر پرەمەر-ءمينيسترى بۇعان دەيىن جۇمىس ساپارلارى اياسىندا باتىس قازاقستان, اقتوبە, شىعىس قازاقستان, قىزىلوردا, الماتى, پاۆلودار, سولتۇستىك قازاقستان, قوستاناي, قاراعاندى, اقمولا, اتىراۋ, وڭتۇستىك قازاقستان, ماڭعىستاۋ وبلىستارىندا جانە استانا, الماتى قالالارىندا بولىپ قايتتى.