قازاقستان پرەزيدەنتى «Royal Dutch Shell» كونتسەرنىنىڭ باس اتقارۋشى ديرەكتورى بەن ۆان بەردەنمەن كەزدەستى, دەپ حابارلادى akorda.kz.
كەزدەسۋ بارىسىندا تاراپتار ەلىمىزدىڭ مۇناي-گاز سەكتورىنداعى قازىرگى احۋال مەن ىنتىماقتاستىق پەرسپەكتيۆالارىن, سونىڭ ىشىندە قاراشىعاناق پەن قاشاعان جوبالارىن ودان ءارى دامىتۋ ماسەلەلەرىن تالقىلادى.
مەملەكەت باسشىسى «Royal Dutch Shell» كونتسەرنى حالىقارالىق «ەكسپو-2017» مامانداندىرىلعان كورمەسىن ۇيىمداستىرۋعا بەلسەندى اتسالىسقانىن ايتىپ, كومپانيا باسشىلىعىنا ريزاشىلىق ءبىلدىردى.
بەن ۆان بەردەن نۇرسۇلتان نازارباەۆقا كەزدەسۋگە مۇمكىندىك تۋعىزعانى ءۇشىن العىس ايتىپ, قازاقستان جۇرتشىلىعىن حالىقارالىق كورمەنىڭ تابىستى وتۋىمەن قۇتتىقتادى.
– ءسىزدى «ەكسپو» كورمەسىنىڭ تابىستى وتۋىمەن قۇتتىقتايمىن. مەن كورمەدەگى ەڭ تارتىمدى پاۆيلون – «نۇر الەم» سفەراسىندا بولدىم. ودان العان اسەرىم دە كەرەمەت, – دەدى كونتسەرننىڭ باس اتقارۋشى ديرەكتورى.
بەن ۆان بەردەن بيىلعى 18 قاراشادا اتالعان كەن ورىندارىنا قاتىستى ءونىمدى ءبولۋ تۋرالى كەلىسىمگە قول قويىلعانىنا 20 جىل تولاتىنىن ايتىپ, ولاردى ىسكە اسىرۋدا قازاقستان پرەزيدەنتىنىڭ ەرەكشە ءرول اتقارعانىن اتاپ ءوتتى.
– بۇل جوبالار وتە جاقسى جانە ءتيىمدى بولىپ شىقتى. بارلىق شىعىندار دەر كەزىندە وتەلدى, ەندى تابىس تابۋ ءۇشىن جۇمىس اتقارىلۋدا, – دەدى مەملەكەت باسشىسى.