وقو-دا ورتا ازياداعى تۇڭعىش «بيوگاز قوندىرعىلار كەشەنى» ىسكە قوسىلدى

اشىلۋ سالتاناتىنا قاتىسقان وبلىس اكىمى جانسەيىت تۇيمەباەۆ بۇل جوبا ەكسپو-2017 حالىقارالىق مامانداندىرىلعان كورمەدە وڭتۇستىك قازاقستان وبلىسىنان ۇسىنىلىپ كورسەتىلگەنىن ايتتى.

«قوندىرعىلار كەشەنىندە حالىقارالىق كورمەدە ۇسىنىلعان چەحيالىق «HEDVIGA GROUP» كومپانياسىنىڭ جاڭا تەحنولوگيالارى قولدانىلدى. تەحنولوگيانىڭ ەرەكشەلىگى قالانىڭ سارقىن سۋلاردى تازالاۋ عيماراتىنان شىققان شوگىندىلەردى وڭدەپ, ودان بيوگاز الىپ قولدانۋ ارقىلى, جىلۋ جانە ەلەكتر ەنەرگيالارىن ءوندىرۋ بولىپ وتىر. ناتيجەسىندە بۇل تەحنولوگيا سىرتقى ورتانىڭ لاستانۋىن ەداۋىر تومەندەتىپ ەكولوگيانى جاقسارتۋعا ۇلكەن ۇلەس قوسادى. جالپى وبلىستا جاڭعىرمالى ەنەرگيا كوزدەرى سالاسىن دامىتۋ باستى نازارعا الىنعان. مىسالى, وبلىستا جالپى قۋاتى 183,9 مەگاۆاتت بولاتىن 14 جوبانى ىسكە اسىرۋ جوسپارلانعان. بۇگىندە ونىڭ 4 جوباسى جۇزەگە اسىرىلدى», دەدى اكىم. 

«سۋ رەسۋرستارى - ماركەتينگ» جشس ينيتسياتور بولعان بۇل جوبانىڭ  قۇنى  2 ملرد. 200 ملن. تەڭگە. تەحنولوگيالىق پروتسەسكە سايكەس قوندىرعى  قالدىقتاردى  وڭدەۋ  ارقىلى  تاۋلىگىنە 300 م3 مەتاندى گازدى (بيوگاز) وندىرەدى. مۇندا 20 ادام تۇراقتى جۇمىس ورنىمەن قامتىلىپ وتىر. سونىمەن قاتار, وندىرىلگەن ەنەرگيا كاسىپورىننىڭ جىلۋ ەنەرگياسىنا قاجەتتىلىگىن تولىعىمەن, ال ەلەكتر ەنەرگياسىنا قاجەتتىلىگىنىڭ 50 پايىزىن جاباتىن بولادى.

جالپى وبلىس كولەمىندە مەملەكەت باسشىسىنىڭ جاڭا ەنەرگەتيكانى دامىتۋ تاپسىرماسىنا سايكەس جوبالار كەزەڭ-كەزەڭىمەن جۇزەگە اسىرىلۋدا. ماسەلەن, وبلىستا جالپى قۋاتى 183,9 مەگاۆاتت بولاتىن 14 جوبانى ىسكە اسىرۋ جوسپارلانسا, بۇگىندە ونىڭ 4 جوباسى جۇزەگە اسىرىلدى. ال وسى جىلدىڭ سوڭىنا دەيىن قازىعۇرت اۋدانىندا دوستىق شاعىن سۋ ەلەكتر ستانتسياسى ىسكە قوسىلادى. بۇدان بولەك, سارىاعاش اۋدانى, جىلعا اۋىلدىق وكرۋگىندە قۋاتى 20 مۆت «جىلعا» جانە ماقتارال اۋدانى, جەتىساي قالاسى ماڭىندا قۋاتى 5,0 مۆت ەكى كۇن ەلەكتر ستانتسيالارىنىڭ قۇرىلىس جۇمىستارى باستالدى.