بۇگىن ۇكىمەت ۇيىندە قر پرەمەر-ءمينيسترى باقىتجان ساعىنتاەۆتىڭ توراعالىعىمەن قازاق ءتىلى ءالىپبيىن لاتىن گرافيكاسىنا كوشىرۋ جونىندەگى ۇلتتىق كوميسسيانىڭ ءبىرىنشى وتىرىسى ءوتتى, دەپ حابارلايدى Primeminister.kz.
ۇلتتىق كوميسسيا ۇكىمەتتىڭ جانىنداعى كونسۋلتاتيۆتىك-كەڭەسشى ورگان بولىپ تابىلادى, ونىڭ نەگىزگى ماقساتى — قازاق ءالىپبيىن لاتىن گرافيكاسىنا كوشىرۋ بويىنشا ۇسىنىستار ازىرلەپ بەكىتۋ, جۇمىس بارىسىن ۇيلەستىرۋ جانە ونىڭ ساپالى ورىندالۋىنا باقىلاۋ جاساۋ.
باقىتجان ساعىنتاەۆتىڭ توراعالىعىمەن كوميسسيا قۇرامىنا توراعانىڭ ورىنباسارى — قر پرەمەر-ءمينيسترىنىڭ ورىنباسارى ەربولات دوساەۆ, سونىمەن قاتار قر پرەزيدەنتى اكىمشىلىگىنىڭ, «نۇر وتان» پارتياسىنىڭ, قر پارلامەنتىنىڭ, جوعارعى وقۋ ورىندارىنىڭ, بۇقارالىق اقپارات قۇرالدارىنىڭ, قوعامدىق ۇيىمداردىڭ, بەلگىلى عالىمدار مەن قوعام قايراتكەرلەرى تارتىلدى. كوميسسيانىڭ جۇمىس ورگانى – قر مادەنيەت جانە سپورت مينيسترلىگى.
«لاتىن الىپبيىنە كوشۋ — ەلىمىز ءۇشىن ايرىقشا ءمانى بار تاريحي وقيعا. ەلباسى ايتقانداي, حالقىمىز سان مىڭ جىلدىق تاريحىندا ەشقانداي سىرتقى ىقپالسىز, ءوز ەركىمەن, جالپىحالىقتىق تالقىلاۋمەن, تۇڭعىش رەت ءالىپبيىن اۋىستىرىپ وتىر. ونى جۇزەگە اسىرۋ — ءبىز ءۇشىن زور مارتەبە, ءارى ۇلكەن جاۋاپكەرشىلىك», - دەپ اتاپ ءوتتى باقىتجان ساعىنتاەۆ.
لاتىن گرافيكاسىنا كوشۋ بويىنشا نەگىزگى جۇمىس باعىتتارى جونىندە مادەنيەت جانە سپورت ۆيتسە-ءمينيسترى ا. رايىمقۇلوۆا, ءبىلىم جانە عىلىم ءمينيسترى ە. ساعاديەۆ, قارجى ءمينيسترى ب. سۇلتانوۆ بايانداما جاسادى. سونىمەن قاتار قر پرەمەر-ءمينيسترىنىڭ ورىنباسارى ە. دوساەۆ, «نۇر وتان» پارتياسى توراعاسىنىڭ ءبىرىنشى ورىنباسارى م. قۇل-مۇحاممەد, ءدىن ىستەرى جانە ازاماتتىق قوعام ءمينيسترى ن. ەرمەكباەۆ, ا. بايتۇرسىنوۆ اتىنداعى ءتىل ءبىلىمى ينستيتۋتىنىڭ ديرەكتورى ە. قاجىبەك, فيلولوگيا عىلىمدارىنىڭ دوكتورى, پروفەسسور, اباي اتىنداعى قازاق ۇلتتىق ۋنيۆەرسيتەتىنىڭ كافەدرا مەڭگەرۋشىسى ت. اياپوۆا ءوز پىكىرلەرىمەن ءبولىستى.
ءالىپبيىن لاتىن گرافيكاسىنا 2025 جىلعا دەيىن بىرتىندەپ كوشىرۋ كوزدەلگەن. ءبىرىنشى كەزەڭ: 2018-2020 جىلداردى, ەكىنشى كەزەڭ: 2021-2023 جىلداردى, ءۇشىنشى كەزەڭ: 2024-2025 جىلداردى قامتيدى.سونىمەن قاتار اپروباتسيالىق كەزەڭ, ۇستازدار كورپۋسىن دايىنداۋ بارىسى, نورماتيۆتىك قۇقىقتىق بازانى جاساۋ جانە جالپى جاڭا ءالىپبيدى قولدانىسقا ەنگىزۋ ءۇردىسى ۇلتتىق كوميسسيانىڭ ءجىتى نازارىندا بولادى.